HSBC ຍົກລະດັບການຄາດຄະເນການເຕີບໂຕເສດຖະກິດ ຫວຽດນາມ

ຂ່າວຕ່າງປະເທດລາຍງານ ໃນວັນທີ 2 ເມສາ ຜ່ານມາວ່າ: ກະຊວງການເງິນ ແລະ ພາສີຂອງມຽນມາໄດ້ປະກາດຍົກເວັ້ນພາສີຊົ່ວຄາວສຳລັບການນຳເຂົ້ານໍ້າມັນກາຊວນ HSD 500 ppm ແຕ່ວັນທີ 1 ຫາ 30 ເມສາ ເພື່ອຮັກສາສະຖຽນລະພາບ ແລະ ຫຼຸດຜ່ອນລາຄາສິນຄ້າ ຫຼັງຈາກລາຄານໍ້າມັນເຊື້ອໄຟທົ່ວໂລກເພີ່ມສູງຂຶ້ນ, ເຊັ່ນດຽວກັນກັບການເພີ່ມຂຶ້ນຂອງລາຄານໍ້າມັນເຊື້ອໄຟພາຍໃນປະເທດທີ່ເກີດຈາກຂໍ້ຂັດແຍ່ງໃນຕາເວັນອອກກາງ.

ຂ່າວຕ່າງປະເທດລາຍງານ ໃນວັນທີ 1 ເມສາ ຜ່ານມາວ່າ: ທ່ານ ລີແຈມຽງ ປະທານາທິບໍດີ ສ ເກົາຫຼີ ແລະ ທ່ານ ພຣາໂບໂວ ຊູບຽນໂຕ ປະທານາທິບໍດີ ຂອງອິນໂດເນເຊຍ ໄດ້ຕົກລົງຍົກລະດັບສາຍພົວພັນລະຫວ່າງສອງປະເທດໃຫ້ເປັນ "ຫຸ້ນສ່ວນຍຸດທະສາດພິເສດຮອບດ້ານ" ຊຶ່ງເປັນລະດັບການຮ່ວມມືສູງສຸດ ແລະ ຖືເປັນຄັ້ງທຳອິດທີ່ ສ ເກົາຫຼີ ໄດ້ສ້າງຕັ້ງສາຍພົວພັນໃນລະດັບນີ້ກັບປະເທດອື່ນ. ພ້ອມກັນນີ້, ຜູ້ນຳທັງສອງຍັງໄດ້ຕົກລົງທີ່ຈະຂະຫຍາຍການຮ່ວມມືໃນດ້ານຊັບພະຍາກອນ ແລະ ຄວາມໝັ້ນຄົງ ເພື່ອແກ້ໄຂວິກິດການພະລັງງານ ແລະ ຕ່ອງໂສ້ການສະໜອງທົ່ວໂລກ ທີ່ໄດ້ຮັບຜົນກະທົບຈາກຂໍ້ຂັດແຍ່ງໃນຕາເວັນອອກກາງ.

ຂ່າວສານຊີອາໄອລາຍງານໃນວັນທີ 3 ເມສາ ຜ່ານມາວ່າ: ສະມາຄົມອຸດສາຫະກຳກົນຈັກຈີນເປີດເຜີຍໃຫ້​ຮູ້ວ່າ, ໃນ 2 ເດືອນຕົ້ນປີນີ້ ມູນຄ່າເພີ່ມຂອງອຸດສາຫະກຳກົນຈັກ 5 ​ປະ​ເພດຫຼັກ​ຂອງຈີນ ໄດ້​ຮັກ​ສາ​ທ່າ​ອ່ຽງ​ການເຕີບໂຕທີ່​ດີເມື່ອທຽບໃສ່​ໄລ​ຍະ​ດຽວ​ກັນ​ຂອງປີກາຍ. ໃນນັ້ນ, ອຸດສາຫະກຳຜະລິດອຸ​ປະ​ກອນໃຊ້ງານທົ່ວໄປເພີ່ມຂຶ້ນ 8.9%, ອຸດສາຫະກຳຜະລິດ​ອຸ​ປະ​ກອນໃຊ້ງານພິ​ເສດເພີ່ມຂຶ້ນ 8.8%, ອຸດສາຫະກຳຜະລິດລົດຍົນເພີ່ມຂຶ້ນ 3.4%. ການຜະລິດ ແລະ ການສະໜອງຜະລິດຕະພັນປະ​ເພດຕ່າງໆ ໄດ້ເພີ່ມຂຶ້ນຢ່າງວ່ອງໄວ, ຄວາມຕ້ອງການຂອງຕະຫຼາດ​ໄດ້ເພີ່ມຂຶ້ນ​ຢ່າງ​ໝັ້ນ​ທ່ຽງ ​ເຮັດ​ໃຫ້ອຸດສາຫະກຳກົນຈັກ​ມີການເລີ່ມຕົ້ນທີ່ດີ.

ວິທະຍຸກະຈາຍສຽງຫວຽດນາມລາຍງານວ່າ: ໃນ​ການ​ຖະ​ແຫຼງ​ຂ່າວ​ປະ​ຈຳ​ໄລ​ຍະ​ທີ່​ດຳ​ເນີນ​ຫວ່າງມໍ່ໆມານີ້ ທີ່ນະຄອນຫຼວງ​ຮ່າ​ໂນ້ຍ, ກະ​ຊວງກ​ະ​ສິ​ກຳ ແລະ ສິ່ງ​ແວດ​ລ້ອມ ຫວຽດ​ນາມ ໃຫ້​ຮູ້​ວ່າ, ວົງ​ເງິນ​ສົ່ງ​ອອກ​ຜະ​ລິດ​ຕະ​ພັນ​ກະ​ເສດ, ເຄື່ອງ​ປ່າ​ຂ​ອງ​ດົງ, ສິນ​ໃນ​ນ້ຳ​ຂອງ ຫວຽດ​ນາມ ໃນ​ເດືອນ ເມ​ສາ 2026 ຄາດ​ວ່າ​ບັນ​ລຸ 6.02 ຕື້ໂດລາ (ເພີ່ມ​ຂຶ້ນ​ຢ່າງ​ແຮງ ເຖິງ 47.8% ເມື່ອ​ທຽບ​ໃສ່​ເດືອນ​ກ່ອນ). ໄລ່​ສະ​ເລ່ຍ 3 ເດືອນ​ຕົ້ນ​ປີ 2026, ວົງ​ເງິນ​ສົ່ງ​ອອກ​ຜະ​ລິດ​ຕະ​ພັນ​ກະ​ເສດ, ເຄື່ອງ​ປ່າ​ຂອງ​ດົງ, ສິນ​ໃນ​ນ້ຳ ​ບັນ​ລຸ 16.69 ຕື້ໂດລາ (ເພີ່ມ​ຂຶ້ນ 5.9% ເມື່ອ​ທຽບ​ໃສ່​ໄລ​ຍະ​ດຽວ​ກັນ​ຂອງ​ປີ 2025).

ຂ່າວສານຊີອາໄອລາຍງານໃນວັນທີ 1 ເມສາ ຜ່ານມາວ່າ: ໂຕ​ເລກ​ຂໍ້​ມູນ​ທີ່​ສະ​ມາ​ຄົມ​ລົດ​ ສະຫະລັດ ອາ​ເມ​ຣິ​ກາ​ເປີດ​ເຜີຍ​ໃນ​ວັນ​ທີ 31 ມີ​ນາ​ຜ່ານ​ມາ​ສະ​ແດງ​ໃຫ້​ເຫັນ​ວ່າ, ລາ​ຄາ​​ນ້ຳ​ມັນ​ແອັດ​ຊັງ​ທຳ​ມະ​ດາ​ສະ​ເລ່ຍໃນ​ທົ່ວ​ປະ​ເທດ​​ໄດ້​ເພີ່ມ​ຂຶ້ນ​ເປັນ 4.02 ໂດ​ລາ​ຕໍ່​ກາ​ລອນ ຊຶ່ງໄດ້​ສ້າງ​ສະ​ຖິ​ຕິ​ສູງ​ສຸດ​ໃນ​ຮອບ 4 ປີ ແລະ ໄດ້​ເພີ່ມ​ຂຶ້ນຫຼາຍກວ່າ 1 ໂດ​ລາ​ ເມື່ອ​ທຽບ​ໃສ່​ໄລ​ຍະ​ທີ່​ ສະຫະລັດ ອາ​ເມ​ຣິ​ກາ ແລະ ອິ​ສ​ຣາ​ແອນ ​ເລີ່ມເຄື່ອນ​ໄຫວ​ທາງ​ການ​ທະ​ຫານ​ຕໍ່​ອີ​ຣານ​ໃນ​ວັນ​ທີ 28 ກຸມ​ພາ​ຜ່ານ​ມາ.

ຂ່າວຕ່າງປະເທດລາຍງານໃນທ້າຍເດືອນມີນາ ຜ່ານມາວ່າ: ທ່ານ ແດນ ຢໍເກັນເຊນ ຄະນະກໍາມາທິການພະລັງງານຂອງສະຫະພາບເອີຣົບ (EU) ໄດ້ກ່າວຫຼັງຈາກກອງປະຊຸມກັບບັນດາລັດຖະມົນຕີກະຊວງພະລັງງານຂອງEU ເພື່ອປຶກສາຫາລືກ່ຽວກັບການປະສານງານຮັບມືກັບສະຖານະການຄວາມຂໍ້ຂັດແຍ່ງໃນຕາເວັນອອກກາງທີ່ມີທ່າອ່ຽງຈະສົ່ງຜົນກະທົບຍາວນານຕໍ່ຕະຫຼາດພະລັງງານ, ເຖິງແມ່ນວ່າການຕໍ່ສູ້ຈະຢຸດລົງກໍຕາມ ເພາະວ່າພື້ນຖານໂຄງລ່າງພະລັງງານຂອງພາກພື້ນໄດ້ຮັບຄວາມເສຍຫາຍຢ່າງຮ້າຍແຮງ.

ຂ່າວຕ່າງປະເທດລາຍງານ ໃນວັນທີ 1 ເມສາ ຜ່ານມາວ່າ: ສື່ມວນຊົນມຽນມາລາຍງານວ່າ, ກົມປະມົງມຽນມາໄດ້ອອກຄຳສັ່ງຫ້າມການຫາປາເປັນເວລາ 3 ເດືອນໃນລະດູການວາງໄຂ່ຂອງປາ ເລີ່ມແຕ່ວັນທີ 1 ເມສາເປັນຕົ້ນໄປ. ໂດຍເຫດຜົນຫຼັກໃນກຳນົດເວລາ ແລະ ເຂດຫວງຫ້າມຫາປາ ເພື່ອປ້ອງກັນການຫຼຸດລົງຂອງຊະນິດພັນປາ ແລະ ສົ່ງເສີມການເຕີບໂຕຂອງຊັບພະຍາກອນການປະມົງ.ນອກຝັ່ງ

ຂ່າວຕ່າງປະເທດລາຍງານ ໃນວັນທີ 1 ເມສາ ຜ່ານມາວ່າ: ມາຮອດທ່ຽງຄືນຂອງວັນທີ 31 ມີນາ ຜ່ານມາ, ກະຊວງການຄ້າຂອງກຳປູເຈຍລາຍງານວ່າ, ລາຄານໍ້າມັນເຊື້ອໄຟຂາຍຍ່ອຍພາຍໃນປະເທດຍັງສືບຕໍ່ເພີ່ມຂຶ້ນ ຍ້ອນສະຖານະການຄວາມຂັດແຍ່ງໃນຕາເວັນອອກກາງທະວີຄວາມຮຸ່ນແຮງຂຶ້ນ.

ຂ່າວສານຊີອາໄອລາຍງານວ່າ: ໃນວັນ​ທີ 31 ມີ​ນາ​ຜ່ານ​ມາ, ເຮືອ​ບິນ​ຂົນ​ສົ່ງ​ບໍ່​ມີ​ຄົນ​ຂັບຂະ​ໜາດ​ໃຫຍ່ NORINCO LUCA ທີ່​ກຸ່ມ​ບໍ​ລິ​ສັດ NORINCO ຂອງ​ຈີນ​ຄົ້ນ​ຄວ້າ​ຜະ​ລິດ​ເອງ​ໄດ້​ສຳ​ເລັດ​ການ​ທົດ​ລອງ​ບິນ​ເປັນ​ຄັ້ງ​ທຳ​ອິດ​ຢູ່​ນະ​ຄອນ​ເຈິ້ງ​ໂຈ່ວ ​ແຂວງ​ເຫີ​ໜານ, ໂດຍ​ໄດ້​ສຳ​ເລັດ​ການ​ກວດ​ສອບລາຍ​ການ​ສຳ​ຄັນ​ຂອງ​ລະ​ບົບ​ຕ່າງໆ ແລະ ກາຍ​ເປັນ​ເຮືອ​ບິນ​ຂົນ​ສົ່ງ​ບໍ່​ມີ​ຄົນ​ຂັບ​ຂະ​ໜາດ​ໃຫຍ່​ທີ່​ສຸດ​ທີ່​ສຳ​ເລັດ​ການ​ທົດ​ລອງ​ບິນ​ເປັນ​ຄັ້ງ​ທຳ​ອິດ​ຂອ​ງ​ໂລກ.

ວິທະຍຸກະຈາຍສຽງຫວຽດນາມລາຍງານວ່າ: ໃນ​ວັນ​ທີ 1 ເມ​ສາ ຜ່ານມາ, ຢູ່​ສຳ​ນັກ​ງານ​ສູນ​ກາງ​ພັກ​ກອມ​ມູ​ນິດ ຫວຽດ​ນາມ ທີ່ນະຄອນຫຼວງຮ່າ​ໂນ້ຍ ໄດ້​ຈັດ​ກອງ​ປະ​ຊຸມ​ປະ​ກາດ​ຂໍ້​ຕົກ​ລົງ​ຂອງ​ກົມ​ການ​ເມືອງ​ກ່ຽວ​ກັບ​ວຽກ​ງານ​ຈັດ​ຕັ້ງ ແລະ ພະ​ນັກ​ງານ. ເຂົ້າ​ຮ່ວມກອງ​ປະ​ຊຸມ​ມີ​ທ່ານ ຟ້າມ​ມິງຈິງ ນາ​ຍົກ​ລັດ​ຖະ​ມົນ​ຕີ ຫວຽດ​ນາມ; ທ່ານ ເຈິ່ນ​ເກິມ​ຕູ ຜູ້​ປະ​ຈຳ​ການ​ຄະ​ນະ​ເລ​ຂາ​ທິ​ການ​ສູ​ນ​ກາງ​ພັກກອມ​ມູ​ນິດຫວຽດ​ນາມ.