 |
ໃນໂອກາດດັ່ງກ່າວ, ສະຫາຍຫົວໜ້າຫ້ອງວ່າການສູນກາງພັກ ໄດ້ມີຄຳເຫັນວ່າ: ການເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ XI ແມ່ນມີຄວາມສໍາຄັນຫຼາຍ ເພື່ອເປັນການສະຫຼຸບຕີລາຄາກ່ຽວກັບການຈັດຕັັ້ງປະຕິບັດແຜນພັດທະນາເສດຖະກິດ - ສັງຄົມ ແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ປະຈໍາ 6 ເດືອນ ຕົ້ນປີ 2025 ແລະ ທິດທາງແຜນການ 6 ເດືອນທ້າຍປີ 2025 ຕິດພັນກັບ 2 ວາລະແຫ່ງຊາດ. ກອງປະຊຸມໄດ້ຕີລາຄາຢ່າງພາວະວິໄສຕໍ່ກັບບັນດາຜົນສໍາເລັດພື້ນຖານ ໃນການຈັດຕັັ້ງປະຕິບັດແຜນພັດທະນາເສດຖະກິດ - ສັງຄົມແຫ່ງຊາດ, ແຜນງົບປະ ມານແຫ່ງລັດ ແລະ ແຜນເງິນຕາ ປະຈໍາ 6 ເດືອນຕົ້ນປີ 2025 ຊຶ່ງເຫັນວ່າລັດຖະບານ ແລະ ອົງການປົກຄອງທ້ອງຖິ່ນທຸກຂັັ້ນ ໄດ້ມີຄວາມພະຍາຍາມສູງ ໃນການແກ້ບັນຫາເຄັ່ງຮ້ອນໃຫ້ຜ່ອນຄາຍລົງ, ເຮັດໃຫ້ປະເທດເຮົາສາມາດຜ່ານຜ່າ ແລະ ແກ້ໄຂບັນຫາໄດ້ໂດຍພື້ນຖານ, ການພັດທະນາເສດຖະກິດ-ສັງຄົມ ຍັງຮັກສາໄດ້ຈັງຫວະການຂະຫຍາຍຕົວຕໍ່ເນື່ອງ ເປັນຕົ້ນການຜະລິດສິນຄ້າການຈັດເກັບລາຍຮັບງົບປະມານ ປະຕິບັດໄດ້ຕາມຄາດໝາຍ, ຍັງຮັກສາໄດ້ຄວາມສະຖຽນລະພາບທາງການເມືອງ ແລະ ສັງຄົມມີຄວາມສະຫງົບ-ປອດໄພ ໂດຍພື້ນຖານ. ຕໍ່ມາໃນຕອນເຊົ້າວັນດຽວກັນ ກໍໄດ້ຈັດພິທີປະກາດການແຕ່ງຕັ້ງຕຳ ແໜ່ງບໍລິຫານ ພາຍໃນ ຫສພ, ສະຫາຍ ຄຳພອນ ສຸວັນນະແສງ ຫົວໜ້າກົມຈັດຕັ້ງ - ພະນັກງານ ຫສພ ໄດ້ຂຶ້ນຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງຕຳແໜ່ງບໍລິຫານ, ມະຕິຕົກລົງ ເລກທີ 514/ຄລສພ ລົງວັນທີ 23/5/2025 ແຕ່ງຕັ້ງ ສະຫາຍ ບຸນທັນ ກຸສົນສະໜອງ ເປັນຫົວໜ້າກົມ ຄວບຕຳແໜ່ງເປັນເລຂານຸການປະຈຳ ສະຫາຍເລຂາທິການໃຫຍ່ຄະນະບໍລິຫານງານສູນກາງພັກ,ມະຕິຕົກລົງຂອງຄະນະບໍລິຫານງານສູນກາງພັກ ເລກທີ 515/ຄລສພ, ລົງວັນທີ 23/5/2025 ແຕ່ງຕັ້ງ ສະຫາຍ ພູນໄຊ ພົມມີໄຊ ເປັນຫົວໜ້າກົມ ຄວບຕຳແໜ່ງເປັນເລຂານຸການປະຈຳສະຫາຍຜູ້ປະຈຳການຄະນະເລຂາທິການສູນກາງພັກ, ໂດຍແມ່ນ ສະຫາຍຫົວໜ້າຫ້ອງວ່າການສູນກາງພັກເປັນຜູ້ມອບຂໍ້ຕົກລົງໃຫ້ແກ່ສອງສະຫາຍ, ໂອກາດດັ່ງກ່າວ ສະຫາຍຫົວໜ້າຫ້ອງວ່າການສູນກາງພັກ ໄດ້ມີຄຳເຫັນວ່າ: ການແຕ່ງຕັ້ງຕໍາແໜ່ງບໍລິຫານຄັ້ງນີ້ແມ່ນມີຄວາມໝາຍສໍາຄັນຫຼາຍ, ຖືເປັນເລື່ອງປົກກະຕິຂອງການຈັດຕັ້ງຂອງພັກ-ລັດເຮົາ, ເພື່ອແນໃສ່ປັບປຸງບຸກຄາລາກອນ ໃຫ້ສອດຄ່ອງສົມຄູ່ກັບຄວາມຮຽກຮ້ອງຕ້ອງການຂອງວຽກງານໃນແຕ່ລະໄລຍະ ແລະ ຮັບປະກັນໃນການຈັດຕັ້ງປະຕິບັດໜ້າທີ່ວຽກງານຕາມການມອບໝາຍໃຫ້ສໍາເລັດ.
 |
ສໍາລັບບັນດາສະຫາຍ ທີ່ໄດ້ຮັບການແຕ່ງຕັ້ງໃນຄັ້ງນີ້ ກໍລ້ວນແລ້ວແຕ່ເປັນຜູ້ທີ່ມີຄວາມຮູ້, ຄວາມສາມາດ, ໄດ້ຜ່ານການທົດສອບໃນຂະບວນການຈັດຕັ້ງປະຕິບັດໜ້າທີ່ວຽກງານຕົວຈິງ, ໄດ້ຜ່ານການທາບທາມຄັດເລືອກຕາມຂັ້ນຕອນ ແລະ ໄດ້ຮັບຄວາມໄວ້ເນື້ອເຊື່ອໃຈຈາກຂັ້ນເທິງ ກໍຄືຄວາມເປັນເອກະພາບໃນຄະນະປະຈໍາພັກ ພາຍໃນຫ້ອງວ່າການສູນກາງພັກ,
ພາຍຫຼັງບັນດາສະຫາຍສະມາຊິກພັກ-ພະນັກງານໄດ້ເຊື່ອມຊຶມມະຕິຄັ້ງນີ້ ແລະ ບັນດາສະຫາຍທີ່ໄດ້ຮັບຕໍາແໜ່ງໃໝ່ ຂ້າພະເຈົ້າຂໍມີບາງຄວາມເຫັນເພື່ອໃຫ້ບັນດາສະຫາຍເອົາໃຈໃສ່ຕື່ມບາງຈຸດ ດັ່ງນີ້:
1. ໃຫ້ບັນດາສະຫາຍສະມາຊິກພັກ, ພະນັກງານ - ລັດຖະກອນ ພາຍໃນຫ້ອງວ່າການສູນກາງພັກ ຈົ່ງພ້ອມກັນເຊື່ອມຊຶມ, ກໍາແໜ້ນເນື້ອໃນມະຕິ 10 ຂອງສູນກາງພັກຄັ້ງນີ້ໃຫ້ລະອຽດເລິກເຊິ່ງ, ເພີ່ມທະວີຄວາມສາມັກຄີໃຫ້ເປັນປຶກແຜ່ນ, ພ້ອມກັນເຊີດຊູຄວາມເປັນເຈົ້າການບຸກບືນສູ້ຊົນໃນການຈັດຕັັ້ງປະຕິບັດບັນດາໜ້າທີ່ວຽກງານ ທີ່ກອງປະຊຸມໃຫຍ່ ຄັັ້ງທີ XI ຂອງພັກວາງອອກໃຫ້ໄດ້ຮັບຜົນສໍາເລັດອັນຈົບງາມ;
2. ການປັບປຸງລັດຖະທໍາມະນູນສະບັບນີ້ ມີຄວາມໝາຍສໍາຄັນຍິ່ງ, ຍ້ອນວ່າແນໃສ່ສືບຕໍ່ສ້າງການຫັນປ່ຽນໃໝ່ຢ່າງແຂງແຮງ, ເລິກເຊິ່ງ ແລະ ຮອບດ້ານໃນລະບົບອໍານາດລັດໃຫ້ມີປະສິດທິພາບສູງ, ສ້າງບາດລ້ຽວໃໝ່ໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດ, ການເຊື່ອມໂຍງເສດຖະກິດກັບພາກພື້ນ ແລະ ສາກົນ, ຍູ້ແຮງການສ້າງເສດຖະກິດເອກະລາດເປັນເຈົ້າຕົນເອງໃນໄລຍະ ໃໝ່. ທັງເປັນການປັບປຸງນິຕິກໍາສູງສຸດຂອງລັດເຮົາທີ່ເປັນກົດໝາຍພື້ນຖານຂອງຊາດໃຫ້ສອດຄ່ອງກັບແນວທາງປ່ຽນແປງໃໝ່ ແລະ ການຄຸມຄອງບໍລິຫານລັດໃນໄລຍະໃໝ່
3. ຜູ້ທີ່ໄດ້ຮັບຕໍາແໜ່ງໃໝ່ຕ້ອງເອົາໃຈໃສ່ຍົກສູງລະດັບຄວາມຮູ້, ຄວາມສາມາດດ້ານວຽກງານຂອງຕົນຢູ່ສະເໝີ ເພື່ອຮັບປະກັນໃນການເປັນເສນາທິການຮອບດ້ານໃນການປະຕິບັດລະບອບ ແລະ ແບບແຜນເຮັດວຽກການ ໃຫ້ການນໍາຂັ້ນສູງ ໃນແຕ່ລະໄລຍະມີຜົນສໍາເລັດຕາມຄາດໝາຍ, ສົມທົບກັບພາກສ່ວນກ່ຽວຂ້ອງຄົ້ນຄວ້າ, ກໍາແໜ້ນແນວທາງນະໂຍບາຍ, ມະຕິ-ຄໍາສັ່ງຂອງພັກ-ລັດ ເພື່ອເຮັດໃຫ້ການສັງລວມຮ່າງເນື້ອໃນບົດຄໍາເຫັນ, ບົດໂອ້ລົມ, ບົດສູນທອນພົດ ແລະ ອື່ນໆ ມີເນື້ອໃນຄົບຖ້ວນ ແລະ ປະສານສົມທົບພາກສ່ວນກ່ຽວຂ້ອງ ເພື່ອຕິດຕາມ ແລະ ອໍານວຍຄວາມສະດວກໃນການເຄື່ອນໄຫວວຽກງານ, ການເບິ່ງແຍງສຸຂະພາບ, ການດໍາລົງຊີວິດ, ການປະຕິບັດນະໂຍບາຍຕໍ່ການນໍາ, ຮັກສາຄວາມປອດໄພໃຫ້ເປັນປົກກະຕິປະຈໍາວັນ ລວມທັງຄວາມປອດໄພໃນໄລຍະການເຄື່ອນໄຫວວຽກງານຢູ່ທ້ອງຖິ່ນ ແລະ ຕ່າງປະເທດ.
ຂ່າວ-ພາບ: ພູວຽງຄຳ
ຄໍາເຫັນ