ຄວາມລັບແຫ່ງຄວາມສຳເລັດຂອງຮ້ານກາເຟ “ຊ່ຽງບັກ”, ກ່ອນອື່ນແມ່ນໄດ້ຄົ້ນພົບຈຸດເຊື່ອມຈອດຄວາມຕ້ອງການຂອງຕົວເມືອງ ແລະ ຊົນນະບົດຢ່າງແມ່ນຢຳ. ໃນປັດຈຸບັນເນື່ອງຈາກວິຖີຊີວິດໃນຕົວເມືອງນັບມື້ຈະເລີນກ້າວໜ້າໄວຂຶ້ນ ແລະ ມີການແຂ່ງຂັນກັນນັບມື້ດຸເດືອດກວ່າເກົ່າ, ປະຊາຊົນມີຄວາມປາຖະໜາຕໍ່ຊີວິດທີ່ປາສະຈາກການຊຸມແຊວ ແລະ ຢາກໃກ້ຊິດກັບທຳມະຊາດຢູ່ຊົນນະບົດ. ຮ້ານກາເຟ “ຊ່ຽງບັກ” ໄດ້ເຊື່ອມໂຍງກາເຟທີ່ໄດ້ຮັບຄວາມນິຍົມໃນຕົວເມືອງ ກັບທິວທັດທົ່ງນາທີ່ງຽບສະຫງົບ ແລະ ສວຍງາມຂອງຊົນນະບົດຢ່າງມີຫົວຄິດປະດິດສ້າງ ແລະ ໄດ້ສ້າງສະພາບການບໍລິໂພກແບບພິເສດ. ການເຊື່ອມໂຍງແບບມີຫົວຄິດປະດິດສ້າງຄືແນວນີ້, ໄດ້ດຶງດູດນັກທ່ອງທ່ຽວຈາກຕົວເມືອງຢ່າງຫຼວງຫຼາຍໄປບໍລິໂພກຢູ່ຊົນນະບົດ ຊຶ່ງໄດ້ຊຸກຍູ້ສົ່ງເສີມຄວາມມີຊີວິດຊີວາໃນການພັດທະນາເສດຖະກິດຢູ່ຊົນນະບົດ.
ເມື່ອສັງເກດຈາກການພັດທະນາອຸດສາຫະກຳແລ້ວເຫັນວ່າ, ຮ້ານກາເຟ “ຊ່ຽງບັກ” ໄດ້ເສີມຂະຫຍາຍບົດບາດການເປັນແບບຢ່າງໃນການພັດທະນາແບບເຊື່ອມໂຍງອຸດສາຫະກຳ ໂດຍຖືເອົາທຸລະກິດຮ້ານກາເຟເປັນຈຸດລົງມື ຫຼື ຈັດຕັ້ງປະຕິບັດ, ຂະຫຍາຍກວ້າງອອກເປັນອຸດສາຫະກຳຕ່າງໆ, ເປັນຕົ້ນ ຢູ່ບໍລິເວນອ້ອມຂ້າງຮ້ານກາເຟໄດ້ສ້າງເດີ່ນຕັ້ງແຄ້ມ ແລະ ເຮືອນພັກໂຮມສະເຕຫຼາຍແຫ່ງ, ໃນອະນາຄົດຈະໃຫ້ການບໍລິການໂຮມສະເຕທີ່ສົມບູນກວ່າເກົ່າແກ່ນັກທ່ອງທ່ຽວ; ທົດລອງຈັດສົ່ງກາເຟດ້ວຍໂດຣນ, ຄົ້ນຄວ້າຮູບແບບໃໝ່ແຫ່ງການຈໍລະຈອນສິນຄ້າໃນຊົນນະບົດ ແລະ ເປີດກວ້າງຂອບເຂດບໍລິການ. ຮູບແບບການພັດທະນາອຸດສາຫະກຳແບບເຊື່ອມໂຍງກັນຄືແນວນີ້, ໄດ້ຍົກສູງມູນຄ່າເພີ່ມ ແລະ ກຳລັງການແຂ່ງຂັນແບບສັງລວມຂອງອຸດສາຫະກຳໃນຊົນນະບົດ ຊຶ່ງໄດ້ເພີ່ມແຮງຂັບເຄື່ອນທີ່ບໍ່ເຫືອດແຫ້ງໃຫ້ແກ່ການພັດທະນາເສດຖະກິດຢູ່ຊົນນະບົດ.
ການພັດທະນາຂອງຮ້ານກາເຟ “ຊ່ຽງບັກ” ໄດ້ສ້າງໂອກາດໃຫ້ແກ່ການພັດທະນາຊົນນະບົດດ້ວຍຜູ້ມີຄວາມຮູ້ຄວາມສາມາດ. ເຖິງວ່າທ່ານ ຫວາງຊວີ່ຈິງ ຜູ້ກໍ່ຕັ້ງຮ້ານກາເຟມີອາຍຸກາຍຮັບບຳນານແລ້ວ, ແຕ່ຍັງມີຄວາມກະຕືລືລົ້ນປະກອບສ່ວນເຂົ້າໃນການສ້າງສາພັດທະນາບ້ານເກີດ, ຮ່ວມກັບເພື່ອນມິດຈຳນວນໜຶ່ງທີ່ມີຄວາມປາຖະໜາຮ່ວມກັນກັບຄືນບ້ານເກີດ ເພື່ອດຳເນີນທຸລະກິດໃໝ່. ເຂົາເຈົ້າໄດ້ນຳເອົາແນວຄິດໃນການດຳເນີນທຸລະກິດ, ບົດຮຽນການຄຸ້ມຄອງ ແລະ ຫົວຄິດປະດິດສ້າງທີ່ທັນສະໄໝ, ກາຍມາເປັນ “ແຮງຂັບເຄື່ອນທາງສະຕິປັນຍາ” ໃນການພັດທະນາຊົນນະບົດ. ຂະນະດຽວກັນ, ການໄດ້ຮັບຄວາມນິຍົມຊົມຊອບເປັນຢ່າງດີຂອງຮ້ານກາເຟ “ຊ່ຽງບັກ” ໄດ້ດຶງດູດຊາວໜຸ່ມຈຳນວນຫຼວງຫຼາຍໄປບໍລິໂພກ ແລະ ເຮັດວຽກ, ຈົນມີບາງວິສາຫະກິດມີຈຸດປະສົງຢາກເຂົ້າມາຕັ້ງຢູ່ບ້ານເຢນເຫີ. ນີ້ບໍ່ພຽງແຕ່ໄດ້ນຳເອົາໂອກາດໃໝ່ມາໃຫ້ແກ່ຊົນນະບົດເທົ່ານັ້ນ, ຫາກຍັງໄດ້ສ້າງບັນຍາກາດແຫ່ງການສ້າງທຸລະກິດ ແລະ ການປະດິດສ້າງໃໝ່ທີ່ດີ, ດຶງດູດຜູ້ມີຄວາມຮູ້ຄວາມສາມາດຫຼາຍກວ່າເກົ່າກັບຄືນສູ່ຊົນນະບົດ ແລະ ມີສ່ວນຮ່ວມເຂົ້າໃນການສ້າງສາພັດທະນາຊົນນະບົດ.
ການຂະຫຍາຍຕົວຂອງຮ້ານກາເຟ “ຊ່ຽງບັກ” ຢູ່ນະຄອນອູຮັ້ນ ບໍ່ເປັນພຽງກໍລະນີໜຶ່ງດຽວ. ໃນກະແສຟອງແຫ່ງການພັດທະນາຊົນນະບົດໃຫ້ຈະເລີນຮຸ່ງເຮືອງຂອງຈີນ, “ຮ້ານກາເຟໃນຊົນນະບົດ” ໃນຖານະເປັນຮູບແບບອຸດສາຫະກຳທີ່ເກີດ ໃໝ່, ຄ່ອຍໆເຂົ້າສູ່ສາຍຕາຂອງປະຊາຊົນ. “ບົດລາຍງານສັງເກດຕະຫຼາດກາເຟຈີນ 2024” ສະແດງໃຫ້ເຫັນວ່າ, ປະລິມານໃບສັ່ງກາເຟຢູ່ຕົວເມືອງທີ່ເສດຖະກິດພັດທະນາອ່າວຊ້າຂອງຈີນໄດ້ເພີ່ມຂຶ້ນ 250% ເມື່ອທຽບໃສ່ປີ 2023 ແລະ ຈຳນວນຮ້ານກາເຟຂັ້ນເມືອງໄດ້ເພີ່ມຂຶ້ນຢ່າງຕໍ່ເນື່ອງ.
ການຂະຫຍາຍຕົວຂອງ “ຮ້ານກາເຟໃນຊົນນະບົດ” ແມ່ນຍ້ອນໄດ້ຮັບຜົນປະໂຫຍດຈາກການຊຸກຍູ້ຂອງຫຼາຍປັດໄຈ. ການສະໜັບສະໜູນດ້ານນະໂຍບາຍແມ່ນປະຖົມປັດໄຈທີ່ສຳຄັນ, ການຈັດຕັ້ງປະຕິບັດແຜນຍຸດທະສາດໃນການພັດທະນາຊົນນະບົດຂອງຈີນ ໄດ້ສ້າງໂອກາດໃນການພັດທະນາຫຼາຍກວ່າເກົ່າໃຫ້ແກ່ເຂດຊົນນະບົດ, ມາດຕະການຕ່າງໆຂອງລັດຖະບານໃນການສະໜັບສະໜູນດ້ານນະໂຍບາຍ ດຶງດູດຜູ້ມີຄວາມຮູ້ຄວາມສາມາດກັບຄືນໄປດຳເນີນທຸລະກິດຢູ່ບ້ານເກີດ ແລະ ອື່ນໆ, ໄດ້ສ້າງສະພາບແວດລ້ອມດ້ານນະໂຍບາຍທີ່ດີໃຫ້ແກ່ທຸລະກິດ “ຮ້ານກາເຟຊົນນະບົດ”; ຄວາມຕ້ອງການດ້ານການຕະຫຼາດເປັນແຮງຂັບເຄື່ອນພາຍໃນ, ຄຽງຄູ່ກັບການຫັນປ່ຽນທັດສະນະການບໍລິໂພກ ແລະ ລະດັບຊີວິດການເປັນຢູ່ໄດ້ຮັບການຍົກສູງຂຶ້ນຂອງຊາວຈີນ, ກຸ່ມຄົນທີ່ສະແຫວງຫາຮູບແບບການດຳລົງຊີວິດທີ່ມີຄຸນນະພາບສູງ ແລະ ມີເອກະລັກພິເສດ.
ການຂະຫຍາຍຕົວຂອງ “ຮ້ານກາເຟຊົນນະບົດ” ເປັນຕົວແບບທີ່ມີຊີວິດຊີວາຂອງຍຸດທະສາດໃນການພັດທະນາຊົນນະບົດຂອງຈີນ. ມັນບໍ່ພຽງແຕ່ໄດ້ເພີ່ມພະລັງຊີວິດໃໝ່ໃຫ້ແກ່ເສດຖະກິດຢູ່ຊົນນະບົດເທົ່ານັ້ນ, ຫາກຍັງໄດ້ກາຍເປັນກຳລັງແຮງສຳຄັນທີ່ຊຸກຍູ້ການແລກປ່ຽນວັດທະນະທຳລະຫວ່າງຕົວເມືອງ ແລະ ຊົນນະບົດ. ໃນອະນາຄົດ, ຄຽງຄູ່ກັບການປະດິດສ້າງດ້ານເຕັກໂນໂລຊີ ການພັດທະນາຂອງຕະຫຼາດ ແລະ ການສະໜັບສະໜູນດ້ານນະໂຍບາຍເສີມຂະຫຍາຍບົດບາດຢ່າງຕໍ່ເນື່ອງ, “ຮ້ານກາເຟຊົນນະບົດ” ຈະເສີມຂະຫຍາຍບົດບາດຫຼາຍກວ່າເກົ່າໃນການຍົກລະດັບເສດຖະກິດຢູ່ຊົນນະບົດ, ປັບປຸງຜະລິດຕະພັນການທ່ອງທ່ຽວຊົນນະບົດໃຫ້ສົມບູນ, ສືບທອດວັດທະນະທຳໃນຊົນນະບົດ ແລະ ອື່ນໆເພື່ອປະກອບສ່ວນເຂົ້າໃນການພັດທະນາຊົນນະບົດໃຫ້ນັບມື້ຈະເລີນຮຸ່ງເຮືອງຢ່າງບໍ່ຢຸດຢັ້ງ.
ໂດຍ: ຊີອາໄອ
ຄໍາເຫັນ