ທ່ານ ຍຸກ ຊຳບາດ ຮອງລັດຖະມົນຕີກະຊວງສາທາລະນະສຸກຂອງກຳປູເຈຍ ກ່າວວ່າ: ຢາດັ່ງກ່າວເປັນຢາສັກທຸກ 2 ເດືອນ ແລະ ມີປະສິດທິພາບປ້ອງກັນການຕິດເຊື້ອໄວຣັດ HIV ເຖິງ 95% ຖືເປັນທາງເລືອກການປ້ອງກັນຕົນເອງແບບໃໝ່ ແລະ ມີປະສິດທິພາບຫຼາຍຂຶ້ນສຳລັບກຸ່ມທີ່ມີຄວາມສ່ຽງສູງ, ນອກຈາກຢາ PrEP ແບບກິນ ທີ່ຈຳໜ່າຍໃນກຳປູເຈຍຕັ້ງແຕ່ປີ 2019 ເປັນຕົ້ນມາ.
ທ່ານ ຊຳບັດ ກ່າວວ່າ: ກຳປູເຈຍເປັນປະເທດທຳອິດໃນພາກພື້ນທີ່ໄດ້ນຳໃຊ້ຢາ cabotegravir ແບບສັກທີ່ມີປະສິດທິພາບມາໃຊ້ໃນການປ້ອງກັນການຕິດເຊື້ອ HIV ກ່ອນສຳຜັດເຊື້ອ (PrEP). ໂດຍໃນເບື້ອງຕົ້ນ, CAB-PrEP ຈະມີບໍລິການຢູ່ຄລີນິກແຫ່ງຊາດ ສຳລັບຕ້ານເອດ, ໂຣກຜິວໜັງ ແລະ ພະຍາດຕິດຕໍ່ທາງເພດສຳພັນ, ສູນສຸຂະພາບຕວນກຸກ ແລະ ສະມາຄົມໂຊກສາ ທີ່ນະຄອນຫຼວງພະນົມເປັນ.
ທັງນີ້, ກຳປູເຈຍ ໄດ້ວາງເປົ້າໝາຍການປິ່ນປົວ HIV ແບບ 95-95-95% ພາຍໃນປີ 2025 ຊຶ່ງ95% ທຳອິດແມ່ນອັດຕາຜູ້ຕິດເຊື້ອ HIV ທີ່ຮູ້ສະຖານະເຊື້ອຂອງຕົນ, 95% ທີສອງ ແມ່ນອັດຕາຂອງຜູ້ທີ່ຮູ້ວ່າຕົນຕິດເຊື້ອ HIV, ເຂົ້າມາປິ່ນປົວ ແລະ ຮັບຢາຕ້ານໄວຣັດ ແລະ 95% ທີສາມ ແມ່ນອັດຕາຂອງຜູ້ທີ່ໄດ້ຮັບການປິ່ນປົວ ແລະ ສາມາດຢັບຢັ້ງເຊື້ອໄວຣັດໄດ້.
ບົດລາຍງານລະບຸວ່າ: ກຳປູເຈຍມີຜູ້ຕິດເຊື້ອ HIV ຫຼື AIDS ປະມານ 76,000 ຄົນ, ໃນນັ້ນ 69,413 ຄົນ ໄດ້ຮັບຢາຕ້ານເຊື້ອໄວຣັດ, ໃນຂະນະທີ່ມີປະມານ 7,000 ຄົນ ຍັງບໍ່ຮູ້ວ່າຕົນເອງຕິດເຊື້ອ HIV ແລະ ຍັງບໍ່ໄດ້ຮັບຢາຕ້ານເຊື້ອໄວຣັດ.
ຄໍາເຫັນ