ການ​ອະ​ນຸ​ລັກ​ຮັກ​ສາ​ພູ​ຂຽວ​ນ້ຳ​ໃສ​ຄື “ສິ່ງ​ສຳ​ຄັນ​ຂອງ​ຊາດ”

ປັດຈຸບັນ, ຜູ້ຄົນມີສ່ວນຮ່ວມໃນການອະນຸລັກຮັກສາສາຍພູສິນຫຼິ້ງນັບມື້ນັບຫຼາຍຂຶ້ນ.
ກ່ອນໜ້ານີ້ 5 ປີ, ຄືໃນວັນທີ 20 ເມສາ 2020, ທ່ານ ສີຈິ້ນຜິງ ປະທານປະເທດຈີນໄດ້ເດີນທາງໄປເຄື່ອນໄຫວຢ້ຽມຢາມແຂວງສ້ານຊີ່ ຊຶ່ງບ່ອນທຳອິດທີ່ເດີນທາງໄປຢ້ຽມຢາມກໍແມ່ນສາຍພູສິນຫຼິ້ນ. ຢູ່ເຂດສະຫງວນທຳມະຊາດແຫ່ງຊາດນິວເປີ້ຍຫຼຽງສາຍພູສິນຫຼິ້ງ, ເພິ່ນໄດ້ຊີ້ໃຫ້ເຫັນຢ່າງເລິກເຊິ່ງວ່າ: “ການສ້າງຄວາມສິວິໄລດ້ານນິເວດບໍ່ແມ່ນໝາຍຄວາມວ່າຈະກຳເອົາເງິນຄຳຢູ່ໃນມືໄດ້ຫຼາຍສ່ຳໃດ, ແຕ່ແມ່ນເຮັດເພື່ອປະຫວັດສາດ ແລະ ເພື່ອລູກຫຼານຄົນຮຸ່ນຫຼັງ.”
ໃນໄລຍະຜ່ານມາ, ສິ່ງແວດລ້ອມທຳມະຊາດຢູ່ສາຍພູສິນຫຼິ້ນເຄີຍຖືກທຳລາຍທິດເໜືອຂອງສາຍພູສິນຫຼິ້ນຕອນຢູ່ໃນນະຄອນຊີ່ອ່ານ ແຂວງສ້ານຊີ່, ເຮືອນວິນລາຈຳນວນຫຼວງຫຼາຍທີ່ສ້າງຂຶ້ນຢ່າງຜິດລະບຽບກົດໝາຍໄດ້ກືນກິນພື້ນທີ່ສີຂຽວຢູ່ເຂດຕີນພູ, ລະຫວ່າງປີ2014-2018, ທ່ານ ສີຈິ້ນຜິງ ໄດ້ອອກຄຳສັ່ງຊີ້ນຳ 6 ຄັ້ງຕາມລຳດັບ ເພື່ອຊຸກຍູ້ການແກ້ໄຂບັນຫາດັ່ງກ່າວນີ້.
ຕໍ່ກັບບັນຫາສິ່ງແວດລ້ອມທຳມະຊາດຖືກທຳລາຍ, ທ່ານ ສີຈິ້ນຜິງ ມີຄວາມຄັບຄາໃຈທີ່ສຸດມາໂດຍຕະຫຼອດ.
ຫຼາຍປີຜ່ານມານີ້, ເພິ່ນໄດ້ມີຄຳສັ່ງຊີ້ນຳສຳຄັນຕໍ່ເຫດການທຳລາຍສິ່ງແວດລ້ອມທຳມະຊາດທີ່ເກີດຂຶ້ນຢູ່ທ້ອງຖິ່ນຈຳນວນໜຶ່ງໂດຍຮຽກຮ້ອງໃຫ້ແກ້ໄຂໃຫ້ເຖິງຖອງບໍ່ປ່ອຍປະເດັດຂາດ. ເພິ່ນເຫັນວ່າການເຮັດວຽກເຫຼົ່ານີ້ແມ່ນລ້ວນແຕ່ສຸມໃສ່ຮັບປະກັນໃຫ້ປະຊາຊາດຈີນມີການພັດທະນາຍາວນານ, ຮັບປະກັນການບັນລຸເປົ້າໝາຍສູ້ຊົນ “ຮ້ອຍປີສອງປະການ”, ເປັນແຜນລວມໄລຍະຍາວ, ເປັນສິ່ງສຳຄັນຂອງຊາດ.
ນັບແຕ່ປີ 2012 ເປັນຕົ້ນມາ, ວຽກງານປົກປັກຮັກສາສິ່ງແວດລ້ອມທຳມະຊາດໄດ້ກາຍເປັນ “ສິ່ງສຳຄັນຂອງຊາດ”.
ໃນແຜນຍຸດທະສາດລວມ “ການພັດທະນາ 5 ພາລະກິດຢ່າງເປັນເອກະພາບກັນ” ແມ່ນໄດ້ກວມເຖິງການສ້າງຄວາມສີວິໄລດ້ານນິເວດ; ໃນທິດທາງຍຸດທະສາດພື້ນຖານກ່ຽວກັບການຢຶດໝັ້ນ ແລະ ພັດທະນາສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່, ການຢຶດໝັ້ນຄົນກັບທຳມະຊາດຢູ່ຮ່ວມກັນຢ່າງກົມກຽວກໍແມ່ນເນື້ອໃນຂໍ້ໜຶ່ງ; ໃນແນວຄວາມຄິດການພັດທະນາແບບໃໝ່, ສີຂຽວເປັນໜຶ່ງໃນເນື້ອໃນສຳຄັນ; ໃນສາມບັ້ນບຸກຂອດຫຍຸ້ງຍາກໃຫຍ່, ໜຶ່ງໃນຫັ້ນກໍແມ່ນບັ້ນປ້ອງກັນ ແລະ ຄວບຄຸມມົນລະພິດ… ສາມາດເວົ້າໄດ້ວ່າ “ສິ່ງສຳຄັນຂອງຊາດ” ແມ່ນເຊື່ອມສານຢູ່ໃນພູຂຽວນ້ຳໃສ. ປີ 2021, ທ່ານ ສີຈິ້ນຜິງ ໄດ້ເດີນທາງໄປຢ້ຽມຢາມທະເລສາບຊິງໄຫເທິງພູພຽງຂອງແຂວງຊິງໄຫ ຊຶ່ງເປັນທະເລສາບນ້ຳເຄັມໃຫຍ່ທີ່ສຸດຂອງຈີນ.
ກ່ອນໜ້ານັ້ນ, ເພິ່ນໄດ້ເດີນທາງໄປສຳຫຼວດຊອກຮູ້ຂໍ້ມູນຢູ່ຕົ້ນແມ່ນ້ຳສາມສາຍ ຫຼື ສ່ານຈ່ຽງຢວນ, ສາຍພູສີຫຼຽນມາແລ້ວໃນໂອກາດລົງເຄື່ອນໄຫວຢ້ຽມຢາມທ້ອງຖິ່ນ, ເພິ່ນໃຫ້ຮູ້ວ່າ: “ເທື່ອນີ້ມາເບິ່ງທະເລສາບຊິງໄຫເປັນການສະເພາະ.” ເມື່ອເວົ້າເຖິງສາເຫດດ້ານຍຸດທະສາດຂອງສູນກາງພັກໃນການຕັດສິນໃຈ ປົກປັກຮັກສາສິ່ງແວດລ້ອມທຳມະຊາດຊິງໄຫ, ເພິ່ນເນັ້ນໜັກຢ່າງໜັກແໜ້ນວ່າ: “ການປົກປັກຮັກສາສິ່ງແວດລ້ອມທຳມະຊາດຊິງໄຫເປັນ ‘ສິ່ງສຳຄັນຂອງຊາດ’”.

ທ່ານ ສີຈິ້ນຜິງ ເນັ້ນໜັກຕື່ມວ່າ: “ໃນດ້ານການປົກປັກຮັກສາສິ່ງແວດລ້ອມທຳມະຊາດ, ບໍ່ວ່າຈະເປັນການຊຸກຍູ້ສົ່ງເສີມ ຫຼື ຕຳໜິສະກັດກັ້ນ, ຂ້າພະເຈົ້າລ້ວນແຕ່ບໍ່ແມ່ນເຮັດເພື່ອສິ່ງໃດໜຶ່ງໃນເວລາໃດໜຶ່ງເທົ່ານັ້ນ, ແຕ່ແມ່ນເພື່ອສຸມໃສ່ສິ່ງແວດລ້ອມ ແລະ ທຳມະຊາດໂດຍລວມ, ສຸມໃສ່ການພັດທະນາແບບຍືນຍົງຂອງຈີນ ແລະ ອະນາຄົດຂອງປະຊາຊາດຈີນ.”
ໄປຄຽງຄູ່ກັບເວລາຜ່ານໄປຢ່າງວ່ອງໄວ, ແນວຄວາມຄິດປ່ຽນແປງແລ້ວ, ດິນແດນປະເທດຊາດຈີນກໍໄດ້ມີໂສມໜ້າໃໝ່ອ່ຽມບໍ່ຄືຜ່ານມາ.
ຫຼາຍປີຜ່ານມານີ້, ເຂດແຂວງ ແລະ ກຳແພງນະຄອນຕ່າງໆຢູ່ລຽບຕາມແມ່ນ້ຳຢາງຊີກ້ຽງເຊັ່ນ: ແຂວງຈ່ຽງຊູ, ແຂວງຈ່ຽງຊີ່, ກຳແພງນະຄອນຊຽງໄຮ, ແຂວງຫູເປີຍ ເປັນຕົ້ນ ໄດ້ພາກັນປະຕິບັດໂຄງການອະນຸລັກສິ່ງແວດລ້ອມທຳມະຊາດເພື່ອ “ຄືນແມ່ນ້ຳ, ຝັ່ງນ້ຳທີ່ມີທິວທັດທຳມະຊາດອັນສວຍສົດງົດງາມໃຫ້ປະຊາຊົນ”, ພາບທຳມະຊາດທີ່ນ້ຳໃສຕາຝັ່ງຂຽວປະກົດຕົວຢູ່ສອງຟາກຝັ່ງແມ່ນ້ຳຢາງຊີກ້ຽງທີ່ເປັນແມ່ນ້ຳຫຼໍ່ລ້ຽງຊີວິດປະຊາຊາດຈີນ.
ວັນທີ 3 ເມສາ 2025 ນີ້, ທ່ານ ສີຈິ້ນຜິງ ໄດ້ຮ່ວມປູກຕົ້ນໄມ້ຢູ່ແຄມຝັ່ງແມ່ນ້ຳຢົງຕີ້ງ ນະຄອນຫຼວງປັກກິ່ງ ໂດຍໄດ້ປູກຕົ້ນໄມ້ຫຼາຍຕົ້ນ. ເພິ່ນເວົ້າກັບຫຼານນ້ອຍນັກຮຽນທັງຫຼາຍທີ່ຮ່ວມປູກຕົ້ນໄມ້ນຳກັນວ່າ: ປັດຸຈບັນ, ເນື້ອທີ່ປົກຫຸ້ມປ່າໄມ້ຂອງປະເທດຈີນໄດ້ບັນລຸຫຼາຍກວ່າ 25%, ໂດຍສາມາດປະກອບສ່ວນສ້າງພື້ນທີ່ສີຂຽວເພີ່ມໃໝ່ໃຫ້ທົ່ວໂລກປະມານ 25%.
ເວລາຜ່ານໄປຫຼາຍປີ, ປະຊາຊົນຈີນນຳໃຊ້ສອງຝາມືສາມາດສ້າງຜົນສຳເລັດທີ່ບໍ່ທຳມະດາຄືເປັນປະເທດທີ່ມີປະລິມານຊັບພະຍາກອນປ່າໄມ້ເພີ່ມຂຶ້ນຫຼາຍກວ່າໝູ່ຢູ່ໃນໂລກ, ພ້ອມທັງພາໃຫ້ເກີດມີເລື່ອງລາວທີ່ໜ້າປະທັບໃຈຢ່າງຫຼວງຫຼາຍກ່ຽວກັບຄົນກັບທຳມະຊາດຢູ່ຮ່ວມກັນຢ່າງກົມກຽວ.
ໂດຍ: ຊີອາໄອ