 |
ໃນຊຸມປີຜ່ານມາ, “ເສດຖະກິດຕອນກາງຄືນ” ໄດ້ເຕີບໃຫຍ່ຂະຫຍາຍຕົວຢ່າງຄຶກຄື້ນຊຶ່ງໄດ້ກາຍເປັນຫົວຈັກທີ່ຂັບເຄື່ອນການເຕີບໂຕຂອງເສດຖະກິດຈີນແລະໄດ້ເຮັດໃຫ້ຕົວເມືອງຕ່າງໆມີຊີວິດຊີວາຂຶ້ນ. ອີງຕາມ “ບົດລາຍງານສຳຫຼວດຄວາມຊິນເຄີຍດ້ານການບໍລິໂພກຂອງຊາວເມືອງຈີນ” ທີ່ກະຊວງການຄ້າຈີນເປີດເຜີຍໃນປີ 2024ໃຫ້ຮູ້ວ່າ, ການບໍລິໂພກໃນຕົວເມືອງຕ່າງໆຂອງຈີນມີ 60% ໄດ້ເກີດຂຶ້ນຢູ່ຕອນກາງຄືນ, ມູນຄ່າການບໍລິໂພກໃນລະຫວ່າງເວລາ 18:00ໂມງຫາ 22:00ໂມງທຸກມື້ຂອງສູນການຄ້າຂະໜາດໃຫຍ່ຂອງຈີນ ກວມຫຼາຍກວ່າເຄິ່ງໜຶ່ງຂອງຍອດມູນຄ່າການບໍລິໂພກຂອງວັນນັ້ນ; ການປະກອບສ່ວນຂອງການບໍລິໂພກໃນຕອນກາງຄືນໄດ້ສູງກວ່າການບໍລິໂພກໃນຕອນກາງເວັນ3 ເທົ່າ ສຳລັບການບໍລິໂພກດ້ານການທ່ອງທ່ຽວ.
 |
ເມື່ອສັງເກດຈາກຂະໜາດຕະຫຼາດແລ້ວເຫັນວ່າ: ຂະໜາດຕະຫຼາດເສດຖະກິດຕອນກາງຄືນຂອງຈີນໄດ້ເພີ່ມຂຶ້ນຈາກ 22,540 ຕື້ຢວນໃນປີ 2018 ມາເປັນ 50,250 ຕື້ຢວນໃນປີ 2024, ໄດ້ເພີ່ມຂຶ້ນ 21.7% ຕໍ່ປີ. ໂຕເລກເຫຼົ່ານີ້ສະແດງໃຫ້ເຫັນວ່າ: ເວລາການບໍລິໂພກໄດ້ແກ່ຍາວອອກ, ສະຖານທີ່ການບໍລິໂພກໄດ້ຂະຫຍາຍກວ້າງອອກແລະການພັດທະນາເສດຖະກິດໄດ້ມີໂອກາດໃໝ່.
ປັດຈຸບັນ, ເສດຖະກິດຕອນກາງຄືນຂອງຈີນບໍ່ມີພຽງແຕ່ຂະແໜງອາຫານການກິນແລະການຊື້ເຄື່ອງເທົ່ານັ້ນ, ຍັງໄດ້ກວມເອົາຂະແໜງວັດທະນະທຳ, ການທ່ອງທ່ຽວແລະວິທະຍາສາດເຕັກໂນໂລຊີອີກດ້ວຍ. ຢູ່ຕະຫຼາດກາງຄືນລາຊະວົງຖັງຂອງນະຄອນຊີອານຂອງຈີນ, ການສະແດງແບບລາຊະວົງຖັງໄດ້ປະສານສົມທົບກັບໄຟແສງສີທີ່ທັນສະໄໝ, ສາມາດດຶງດູດນັກທ່ອງທ່ຽວໄດ້ຫຼາຍກວ່າ 3 ແສນເທື່ອຄົນຕໍ່ວັນ, ໂຄງການທ່ອງທ່ຽວຕອນກາງຄືນແບບນີ້ໄດ້ເຮັດໃຫ້ມູນຄ່າການຈຳໜ່າຍຜະລິດຕະພັນວັດທະນະທຳຕ່າງໆເພີ່ມຂຶ້ນ 40%; ຢູ່ຕາມເສັ້ນທາງໃນໃຈກາງນະຄອນຫຼວງປັກກິ່ງ, ຜູ້ຂີ່ລົດຖີບຕ່າງໆສາມາດສຳຜັດກັບຮອງຮອຍປະຫວັດສາດໃນຕອນກາງຄືນ; ລະຄອນຈີນແລະຕ່າງປະເທດທີ່ມີຊື່ສຽງໄດ້ຜັດປ່ຽນກັນສະແດງຢູ່ໃນໂຮງລະຄອນນະຄອນເສິງຕູ. ທັງໝົດນີ້ເຮັດໃຫ້ເສດຖະກິດຕອນກາງຄືນຂອງຈີນເຕັມໄປດ້ວຍສີສັນແຫ່ງວັດທະນະທຳແລະວິທະຍາສາດເຕັກໂນໂລຊີ.
 |
ເສດຖະກິດຕອນກາງຄືນໄດ້ຮັບການພັດທະນາຢ່າງຄຶກຄື້ນຍັງໄດ້ເຮັດໃຫ້ເກີດມີການປະກອບອາຊີບໃໝ່ແລະຮູບແບບທຸລະກິດໃໝ່. 600 ກວ່າຮ້ານໃນຕະຫຼາດກາງຄືນເມືອງຈິ້ງຕິ້ງໄດ້ເຮັດໃຫ້ 2,000 ກວ່າຄົນມີວຽກເຮັດງານທຳ. ຊາວໜຸ່ມໄດ້ເລີ່ມຕົ້ນເປັນ “ຜູ້ປະກອບການໃນຕະຫຼາດກາງຄືນ” ໃນແອັບວິດີໂອສັ້ນເພື່ອໂຄສະນາເຜີຍແຜ່ສິນຄ້າທີ່ມີເອກະລັກພິເສດໃນຕະຫຼາດກາງຄືນໄປສູ່ທົ່ວໂລກດ້ວຍວິທີການໄລສົດ, ການໃຫ້ຄະແນນຕໍ່ອາຫານການກິນແລະອື່ນໆຊຶ່ງໄດ້ເຮັດໃຫ້ເສດຖະກິດກາງຄືນມີຜົນຕອບຮັບນັບມື້ນັບຂະຫຍາຍກວ້າງອອກ.
ສິ່ງທີ່ສຳຄັນກວ່ານັ້ນກໍຄື: ເສດຖະກິດກາງຄືນພວມໄດ້ກາຍເປັນສິ່ງສຳຄັນທີ່ໄດ້ສະແດງໃຫ້ເຫັນເຖິງກຳລັງດຶງດູດຂອງຕົວເມືອງ. ຢູ່ນະຄອນຊຽງໄຮ້, ໄຟແສງສີທີ່ຮຸ່ງເຮືອງຢູ່ເຂດວາຍທານກັບຕຶກອາຄານທີ່ທັນສະໄໝຢູ່ຄຸ້ມລູເຈຍຈຸຍສ່ອງແສງສະທ້ອນກັນ, ການຂີ່ເຮືອທ່ຽວໜອງຊີຫູໃນຕອນກາງຄືນຢູ່ນະຄອນຫາງໂຈ່ວໄດ້ສະແດງໃຫ້ເຫັນເຖິງວັດທະນະທຳທີ່ມີສະເໜ່ໃນລາຊະວົງຊົ້ງຂອງຈີນ. ພາບວິວທິວທັດແບບນີ້ບໍ່ພຽງແຕ່ສະແດງໃຫ້ເຫັນເຖິງຄວາມມີສະເໜ່ທີ່ມີເອກະລັກພິເສດຕ່າງໆຂອງຕົວເມືອງຂອງຈີນເທົ່ານັ້ນ, ຫາກຍັງສາມາດດຶງດູດຜູ້ທີ່ມີຄວາມຮູ້ຄວາມສາມາດ, ທຶນແລະນັກທ່ອງທ່ຽວທົ່ວໂລກມາທ່ອງທ່ຽວ, ເຮັດວຽກຫຼືລົງທຶນຢູ່ຕົວເມືອງເຫຼົ່ານີ້.
ຢູ່ຈີນ, ຍັງມີຫຼາຍຕົວເມືອງມີຕະຫຼາດກາງຄືນທີ່ຄຶກຄື້ນປານຕະຫຼາດກາງຄືນຂອງເມືອງເຈິ້ງຕິ້ງ. ຈາກອາຫານທີ່ແຊບນົວເຖິງວັດທະນະທຳທີ່ມີຫຼາກຫຼາຍສີສັນ, ຈາກການປະກອບອາຊີບເຖິງການປະດິດສ້າງໃໝ່, ເສດຖະກິດຕອນກາງຄືນທີ່ໄດ້ເຕີບໂຕຢ່າງຄຶກຄື້ນພວມໄດ້ເພີ່ມພະລັງຂັບເຄື່ອນທີ່ແຂງແຮງໃຫ້ແກ່ການພັດທະນາເສດຖະກິດຈີນດ້ວຍຄຸນນະພາບສູງແລະໄດ້ສະແດງໃຫ້ເຫັນເຖິງຊີວິດການເປັນຢູ່ທີ່ດີງາມຂອງປະຊາຊົນຈີນ.
ໂດຍ: ຊີອາໄອ
ຄໍາເຫັນ