 |
ທ່ານ ຄໍາຫຼ້າ ວິຈິດວົງສາ ຜູ້ອໍານວຍການ ລັດວິສາຫະກິດຖືຮຸ້ນລາວ ໄດ້ລາຍງານຕໍ່ກອງປະຊຸມຊາບວ່າ: ໃນຊຸມປີຜ່ານມາ ລຮລ ໄດ້ມີຜົນສໍາເລັດ ແລະ ຜົນກໍາໄລຕະຫຼອດມາ ຊຶ່ງໄດ້ສະແດງໃຫ້ເຫັນເຖິງຜົນການດໍາເນີນທຸລະກິດທີ່ມີປະສິດທິພາບ ແລະ ຄວາມໝັ້ນຄົງຕະຫຼອດມາ, ໃນປີນີ້ ກໍເປັນອີກປີໜຶ່ງທີ່ ລຮລ ໄດ້ຮັບຜົນສໍາເລັດ ການດໍາເນີນທຸລະກິດ ສາມາດສ້າງລາຍຮັບໄດ້ 64.92 ລ້ານໂດລາ, ມີຜົນກໍາໄລທາງການບັນຊີ 41.7 ລ້ານໂດລາ. ນອກຈາກນີ້, ລຮລ ຍັງໄດ້ຊຳລະຕົ້ນທຶນ-ດອກເບັ້ຍຕາມສັນຍາກູ້ຢືມຕໍ່ໃຫ້ກະຊວງການເງິນ 51.82 ລ້ານໂດລາ, ປະຕິບັດພັນທະອາກອນຕ່າງໆ 6.4 ລ້ານໂດລາ ແລະ ຊຳລະໜີ້ເງິນກູ້ໃຫ້ ທະນາຄານທຸລະກິດພາຍໃນຕາມສັນຍາຢ່າງຄົບຖ້ວນ ຈົນໄດ້ຮັບໃບຍ້ອງຍໍຈາກກະຊວງການເງິນ ທີ່ມີຜົນງານດີເດັນ ປະເພດ 1 ໃນການປະກອບສ່ວນປະຕິບັດພັນທະໃຫ້ແກ່ລັດຖະບານຕະຫຼອດໄລຍະ 5 ປີ 2020 ຫາ 2024.
ພ້ອມດຽວກັນນີ້, ການຈັດຕັ້ງປະຕິບັດວຽກງານຂອງ 4 ໂຄງການທີ່ ລຮລ ຮ່ວມຖືຮຸ້ນ ໃນນັ້ນມີ ໂຄງການ ໄຟຟ້ານໍ້າເທີນ 2, ໂຄງການໄຟຟ້າຄວາມຮ້ອນຫົງສາ, ໂຄງການໄຟຟ້າເຊປຽນ-ເຊນໍ້ານ້ອຍ ແລະ ໂຄງການໄຟຟ້າ ນໍ້າງຽບ 1 ຍັງສືບຕໍ່ປະຕິບັດຕາມແຜນການທີ່ວາງໄວ້ ສາມາດຜະລິດໄຟຟ້າລວມກັນໄດ້ທັງໝົດ 21,852.84 ລ້ານກີໂລວັດໂມງ (kWh) ມີລາຍຮັບຈາກການຂາຍໄຟຟ້າທັງໝົດ 1,299.5 ລ້ານໂດລາ, ມອບພັນທະໃຫ້ ລັດຖະບານ 116.53 ລ້ານໂດລາ (ຄ່າພາກຫຼວງ 45.98 ລ້ານໂດລາ, ອາກອນກໍາໄລ 54.09 ລ້ານໂດລາ ແລະ ຄ່າທໍານຽມແຮ່ທາດ 16.45 ລ້ານໂດລາ)
 |
ທ່ານ ຄໍາຫຼ້າ ວິຈິດວົງສາ ກ່າວຕື່ມອີກວ່າ: ສໍາລັບທິດທາງ-ແຜນການປີ 2026 ລຮລ ຈະພະຍາຍາມສູ້ຊົນໃຫ້ມີລາຍຮັບເພີ່ມຂຶ້ນ, ເອົາໃຈໃສ່ມອບພັນທະເງິນກູ້ຢືມຕໍ່ ແລະ ອາກອນຕ່າງໆໃຫ້ລັດຖະບານຢ່າງຄົບຖ້ວນ, ກະກຽມຄວາມພ້ອມການເຂົ້າຮ່ວມລົງທຶນ ໃນໂຄງການໃໝ່. ຄຽງຄູ່ກັນນີ້, ຈະສືບຕໍ່ເອົາໃຈໃສ່ປະຕິບັດວຽກງານຕາມພາລະບົດບາດ ແລະ ໜ້າທີ່ຮັບຜິດຊອບຂອງຕົນໃຫ້ດີທີ່ສຸດ ເພື່ອເປັນຫົວໜ່ວຍທຸລະກິດໜຶ່ງຂອງລັດທີ່ມີຄວາມເຂັ້ມແຂງ, ປະກອບສ່ວນສ້າງລາຍຮັບທີ່ໝັ້ນຄົງ, ມີກຳໄລຍືນຍົງ ເພື່ອສົ່ງມອບໃຫ້ລັດຖະບານນັບມື້ຫຼາຍຂຶ້ນຕາມ 5 ວິໄສທັດໃນການຄຸ້ມຄອງບໍລິຫານທຸລະກິດ “ລົງທຶນຢ່າງມີປະສິດທິຜົນ, ສ້າງຜົນກຳໄລໃຫ້ຫຼາຍເທົ່າທີ່ຈະຫຼາຍໄດ້, ສ້າງຄວາມເຊື່ອຖືຈາກສະຖາບັນການເງິນສາກົນ ແລະ ຜູ້ສະໜອງທຶນ; ສ້າງຄວາມເຂັ້ມແຂງໃຫ້ແກ່ອົງກອນຢ່າງຕໍ່ເນື່ອງ, ບໍລິຫານລາຍຮັບ ແລະ ລາຍຈ່າຍຢ່າງໂປງໃສ”.
 |
ຂ່າວ: ລຮລ, ພາບ: ພູວຽງຄຳ
ຄໍາເຫັນ