 |
ແລກປ່ຽນດ້ານວິຊາການ ລະຫວ່າງ ສະຖາບັນການຕ່າງ ປະເທດ ແລະ ສະຖານເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ຊຶ່ງໃນຄັ້ງນີ້ຖືເປັນກິດຈະກໍາທໍາອິດທີ່ທັງສອງຝ່າຍໄດ້ຈັດຮ່ວມກັນພາຍຫຼັງການມາປະຈໍາການຂອງ ທ່ານ ນາງ ຟ່າງ ຫົງ ເອກອັກຄະລັດຖະທູດ ແຫ່ງ ສປ ຈີນ ຄົນໃໝ່. ພ້ອມກັນນີ້ກໍເປັນການລໍາລຶກເຖິງວັນຄົບຮອບ 80 ປີແຫ່ງໄຊຊະນະຂອງ ສປ ຈີນ ໃນການຕ້ານການຮຸກຮານຈາກພາຍນອກ ແລະ ສົງຄາມໂລກຕ້ານລັດທິຟາຊິດ ແລະ ເພື່ອເປັນການແລກປ່ຽນຄວາມຄິດເຫັນ ແລະ ຖອດຖອນບົດຮຽນຈາກອະດີດ ນໍາມາປັບໃຊ້ໃຫ້ເຂົ້າກັບສະພາບການຂອງໂລກໃນປັດຈຸບັນ. ກອງປະຊຸມສໍາມະນາໃນຄັ້ງນີ້ໄດ້ໃຫ້ກຽດເຂົ້າຮ່ວມເປັນປະທານ ແລະ ກ່າວເປີດໂດຍ ທ່ານ ໄມທອງ ທໍາມະວົງສາ ຮອງລັດຖະມົນຕີກະຊວງການຕ່າງປະເທດ ແລະ ມີບັນດາຜູ້ເຂົ້າຮ່ວມຈາກກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ, ຫ້ອງວ່າການສູນກາງພັກ, ຄະນະໂຄສະນາອົບຮົມສູນກາງພັກ, ທ່ານທູດອາວຸໂສ ຈາກສະໂມສອນນັກການທູດ, ສະຖານ ທູດ ສປ ຈີນ ປະຈໍາລາວ ແລະ ບັນດາກະຊວງອ້ອມຂ້າງທັງໝົດຫຼາຍກວ່າ 120 ທ່ານ.
ໃນໂອກາດນີ້, ທ່ານປະທານກອງປະຊຸມ ໄດ້ສະເເດງຄວາມຊົມເຊີຍ ແລະ ຕີລາຄາສູງຕໍ່ກອງປະຊຸມ ທີ່ມີຄວາມໝາຍຄວາມສໍາຄັນ ໂດຍສະເພາະຕໍ່ກັບ ລາວ-ຈີນ ທີ່ທັງສອງຝ່າຍລ້ວນແຕ່ໄດ້ຜ່ານປະ ຫວັດສາດ ດ້ານການຕໍ່ສູ້ມາຢ່າງຍາວນານ, ພ້ອມທັງເປັນໂອກາດອັນດີໃນການເສີມຂະຫຍາຍການຮ່ວມມືລະຫວ່າງ ສະຖາບັນການຕ່າງປະເທດ ແລະ ສະຖານເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ, ພ້ອມທັງເປັນເວທີປຶກສາຫາລື ແລະ ຊຸກຍູ້ໂຄງການການຮ່ວມມືທີ່ສອງຝ່າຍໄດ້ຈັດຕັ້ງປະຕິບັດຮ່ວມກັນ ແລະ ໄດ້ສະເໜີຄໍາຄິດເຫັນຕໍ່ກັບທິດທາງແຜນການຮ່ວມມືໃນຕໍ່ໜ້າ.
ກອງປະຊຸມສໍາມະນາ ໄດ້ຕີລາຄາສະພາບການຂອງໂລກໃນດ້ານຕ່າງໆ, ໂດຍສະເພາະອິດທິພົນຂອງບັນດາປະເທດມະຫາອໍານາດ ທີ່ສົ່ງຜົນໃຫ້ມີການຈັດລະບຽບຂອງໂລກຄືນໃໝ່ ທັງໃນໄລຍະສົງຄາມໂລກ ແລະ ຫຼັງສົງຄາມໂລກຄັ້ງທີ 2 ເປັນຕົ້ນມາ. ພ້ອມດຽວກັນນັ້ນ, ກໍໄດ້ແລກປ່ຽນບົດຮຽນ ແລະ ທັດສະນະຂອງສອງຝ່າຍ ຕໍ່ກັບສະພາບການຂອງໂລກທີ່ກໍາລັງປ່ຽນແປງ ແລະ ຢູ່ໃນຄວາມບໍ່ແນ່ນອນຕັ້ງແຕ່ອະດີດຈົນເຖິງປັດຈຸບັນ. ນອກຈາກນີ້, ຍັງໄດ້ຮັບຟັງການແລກປ່ຽນຄຳຄິດຄຳເຫັນຈາກຜູ້ເຂົ້າຮ່ວມ ທີ່ມີປະສົບການຈາກຫຼາຍພາກສ່ວນ. ກອງປະຊຸມໄດ້ປິດລົງດ້ວຍຜົນສຳເລັດອັນຈົບງາມ, ໂດຍບັນດາຜູ້ເຂົ້າຮ່ວມໄດ້ຮັບຟັງ ແລະ ແລກປ່ຽນບົດຮຽນ ຈາກກອງປະຊຸມໃນຄັ້ງນີ້ ເພື່ອໄປຜັນຂະຫຍາຍ ແລະ ຈັດຕັ້ງປະຕິບັດເຂົ້າໃນໜ້າທີ່ວຽກງານຂອງຕົນ.
(ຂ່າວ: ກ
ຕທ)
ຄໍາເຫັນ