ເມືອງມິດຕະພາບ ຢຸນນານ-ລາວ ໄດ້ສ້າງເງື່ອນໄຂຮັບປະກັນດ້ານກົນໄກໃຫ້ແກ່ການສ້າງຄູ່ຮ່ວມຊະຕາກຳ ຈີນ-ລາວ ຜ່ານການສ້າງຕັ້ງກົນໄກການຕິດຕໍ່ພົວພັນເປັນປົກກະຕິ. ປີ 2004, ກົນໄກຄະນະປະສານງານການຮ່ວມມື ແຂວງຢຸນນານ ສປ ຈີນ ກັບ ພາກເໜືອຂອງລາວໄດ້ຮັບການສ້າງຕັ້ງຂຶ້ນຢ່າງເປັນທາງການ, ເຊິ່ງເປັນການເປີດສາກການຮ່ວມມືຮອບດ້ານ ລະຫວ່າງ ຢຸນນານ ແລະ ລາວ.
ຕະຫຼອດ 20 ກວ່າປີຜ່ານມາ, ສອງຝ່າຍໄດ້ຈັດກອງປະຊຸມຢ່າງປະສົບຜົນສຳເລັດມາແລ້ວ 14 ຄັ້ງ, ກົນໄກຄະນະປະສານງານ ໄດ້ເຄື່ອນໄຫວຢ່າງມີປະສິດທິພາບສູງ, ການຮ່ວມມືທີ່ເປັນຮູບປະທຳໃນແຕ່ລະຂົງເຂດ ໄດ້ຮັບການລົງເລິກຢ່າງຕໍ່ເນື່ອງ, ປະກອບສ່ວນເປັນກຳລັງແຮງອັນສຳຄັນ ເຂົ້າໃນການຊຸກຍູ້ການສ້າງຄູ່ຮ່ວມຊະຕາກຳ ຈີນ-ລາວ. ນອກນີ້, ການບໍລິຫານແບບປະສານສົມທົບກັນ ຢູ່ເຂດຊາຍແດນ ໄດ້ກາຍເປັນຈຸດພົ້ນເດັ່ນ. ປີ 2022 ນະຄອນຄຸນໝິງໄດ້ຮັບການມອບສິດຄຸ້ມຄອງບໍ່ຫານ ເຊິ່ງເປັນການລິເລີ່ມຮູບແບບໃໝ່ທີ່ ເມືອງເອກຂອງແຂວງ ຄຸ້ມຄອງລວມການພັດທະນາດ່ານຊາຍແດນ, ເຮັດໃຫ້ຜົນກະທົບ “1+1>2” ຂະຫຍາຍຕົວຢ່າງຕໍ່ເນື່ອງ.ປັດຈຸບັນ, ດ່ານທາງລົດໄຟບໍ່ຫານ ໄດ້ກາຍເປັນດ່ານທາງລົດໄຟທີ່ມຸ່ງໜ້າສູ່ອາຊຽນທີ່ມີຂະໜາດໃຫຍ່ທີ່ສຸດ,ມີປະສິດທິພາບໃນການຜ່ານດ່ານສູງທີ່ສຸດ ແລະ ມີການຂະຫຍາຍຕົວຂອງການຂົນສົ່ງສິນຄ້າໄວທີ່ສຸດຂອງທົ່ວປະເທດ, ພ້ອມດຽວກັນນັ້ນ ກໍຍັງໄດ້ກາຍເປັນ "ທ່າບົກອະນາໄມສາກົນ" ແຫ່ງທໍາອິດທີ່ໄດ້ຮັບການຮັບຮອງຈາກອົງການອະນາໄມໂລກ, ສອງຝ່າຍ ຈີນ-ລາວ ບັນລຸການແບ່ງປັນພື້ນທີ່ການພັດທະນາຮ່ວມກັນ.
ເມືອງມິດຕະພາບ ຢຸນນານ-ລາວ ຖືເອົາການເຊື່ອມຈອດພື້ນຖານໂຄງລ່າງ ເປັນຈຸດບຸກທະລຸ, ສ້າງແຮງຂັບເຄື່ອນຢ່າງແຂງແຮງໃຫ້ແກ່ການສ້າງປະຊາຄົມເສດຖະກິດ ຈີນ-ລາວ.ການເຊື່ອມໂຍງດ້ານເສດຖະກິດ-ການຄ້າ-ສ້າງປະຊາຄົມການພັດທະນາຂ້າມຊາດ.
ໂດຍອີງໃສ່ "ຊ່ອງທາງການຄ້າ" ຂອງທາງລົດໄຟ ລາວ-ຈີນ, ໃນປີ 2024 ມູນຄ່າການຄ້າຂາເຂົ້າ-ຂາອອກ ຈີນ-ລາວ ບັນລຸ 52,728 ລ້ານຢວນ, ເພີ່ມຂຶ້ນ 89.23% ເມື່ອທຽບໃສ່ປີ 2021, ອັດຕາການເຕີບໂຕສະເລ່ຍເກືອບ 30%ຕໍ່ປີ, ໃນນັ້ນ ມູນຄ່າການຄ້າຂາເຂົ້າ-ຂາອອກ ຂອງຢຸນນານຕໍ່ລາວບັນລຸ 18,987 ລ້ານຢວນ, ເພີ່ມຂຶ້ນ 1.25 ເທົ່າ ເມື່ອທຽບໃສ່ປີ 2021. ການເຊື່ອມຈອດຂອງທາງລົດໄຟ ລາວ-ຈີນ ບໍ່ພຽງແຕ່ເຮັດໃຫ້ການຄ້າ ແລະ ໂລຈິສຕິກ ມີຄວາມຄຶກຄື້ນເທົ່ານັ້ນ, ແຕ່ຍັງໄດ້ເຊື່ອມຕໍ່ການພັດທະນາແບບປະສານສົມທົບກັນຂອງເຂດອຸດສາຫະກຳຕາມແລວທາງລົດໄຟອີກດ້ວຍ. ເພື່ອສືບຕໍ່ເສີມຂະຫຍາຍບົດບາດ ການແຜ່ຂະຫຍາຍ ແລະ ຊຸກຍູ້ ຂອງເຂດຄຸນໝິງ, ຄຸນໝິງ, ບໍ່ຫານ ແລະ ວຽງຈັນ ພວມຕັ້ງໜ້າຄົ້ນຄວ້າຮູບແບບການພັດທະນາໃໝ່ “ການເຊື່ອມໂຍງສາມພື້ນທີ່”. ເດືອນມັງກອນ 2024, ເຂດພັດທະນາເສດຖະກິດຄຸນໝິງ (ເຂດຄຸນໝິງ ຂອງເຂດທົດລອງການຄ້າເສລີ), ເຂດຮ່ວມມືເສດຖະກິດ ບໍ່ຫານ-ບໍ່ເຕັນ ຈີນ-ລາວ ແລະ ເຂດພັດທະນາກວມລວມໄຊເສດຖາ ນະຄອນຫຼວງວຽງຈັນ ຂອງລາວ ໄດ້ລົງນາມໃນສັນຍາການຮ່ວມມືຍຸດທະສາດ "ການເຊື່ອມໂຍງສາມເຂດ". ໃນອະນາຄົດຜ່ານການຮ່ວມມືທີ່ເປັນຮູບປະທຳໃນຂົງເຂດການດຶງດູດການລົງທຶນ, ການຮ່ວມມືໂຄງການ, ການສ້າງຄວາມເຂັ້ມແຂງ ແລະ ເສີມຂະຫຍາຍຫ່ວງໂສ້ອຸດສາຫະກຳ ແລະ ອື່ນໆ, ຢຸນນານ-ລາວ ຈະຮ່ວມມືກັນສ້າງສວນສາທິດການປະສານງານດ້ານອຸດສາຫະກຳຄຸນໝິງ-ວຽງຈັນ, ສ້າງເປັນການວາງຜັງອຸດສາຫະກຳໃໝ່ ທີ່ມີການແບ່ງງານ ແລະ ຮ່ວມມືກັນລະຫວ່າງຄຸນໝິງ-ບໍ່ຫານ-ວຽງຈັນ.
ເມືອງມິດຕະພາບຢຸນນານ-ລາວໄດ້ລົງເລິກການແລກປ່ຽນວັດທະນະທຳ,ການຮຽນຮູ້ວັດທະນະທໍາເຊິ່ງກັນ ແລະ ກັນ ສ້າງປະຊາຄົມການເຊື່ອມຈິດໃຈຂອງປະຊາຊົນໃຫ້ແໜ້ນແກ່ນແລະ ຮັດແໜ້ນສາຍໃຍການເຊື່ອມຈິດໃຈຂອງປະຊາຊົນຢ່າງບໍ່ຢຸດຢັ້ງໂດຍຜ່ານການຮ່ວມມືໃນຫຼາຍຂົງເຂດ ເຊັ່ນ: ການຝຶກອົບຮົມບຸກຄະລາກອນ,ການທ່ອງທ່ຽວຂ້າມຊາດ, ຊີວິດການເປັນຢູ່ຂອງສັງຄົມ ແລະ ອື່ນໆ. ໃນດ້ານການຮ່ວມມືການສຶກສາ,ຢຸນນານ-ລາວ ໄດ້ສ້າງລະບົບການສ້າງຊັບພະຍາກອນມະນຸດຂ້າມຊາດທີ່ມີຫຼາຍລະດັບ ແລະ ກວ້າງຂວາງ, ສະໜອງການສະໜັບສະໜູນດ້ານຊັບພະຍາກອນມະນຸດທີ່ເຂັ້ມແຂງ ໃຫ້ແກ່ການສ້າງຄູ່ຮ່ວມຊະຕາກຳ ຈີນ-ລາວ. ຄູສອນວິຊາທາງລົດໄຟ ແລະ ຜູ້ຂັບລົດໄຟ ສັນຊາດລາວ ຮຸ່ນທຳອິດ ທີ່ສ້າງໂດຍ ວິທະຍາໄລເຕັກນິກວິຊາຊີບທາງລົດໄຟຄຸນໝິງ ໄດ້ກາຍເປັນກຳລັງຫຼັກບົນເສັ້ນທາງລົດໄຟ ລາວ-ຈີນ; ເວທີ “ຫ້ອງຮຽນອອນລາຍເມືອງມິດຕະພາບ” ທີ່ສ້າງຂຶ້ນໂດຍ ຄຸນໝິງ ໄດ້ຊ່ວຍຍົກລະດັບຄວາມສາມາດ ໃຫ້ແກ່ພະນັກງານສາທາລະນະສຸກ ຢູ່ນະຄອນຫຼວງວຽງຈັນ ແລະ ຫຼວງພະບາງ ຂອງລາວ, ຕົວຢ່າງແບບນີ້ມີຢ່າງຫຼວງຫຼາຍຈົນນັບບໍ່ຖ້ວນ. ໃນດ້ານການທ່ອງທ່ຽວຂ້າມຊາດ, ເມືອງມິດຕະພາບ ຢຸນນານ-ລາວ ໄດ້ມີການຄົ້ນຄວ້າຢ່າງຫຼາກຫຼາຍ ໂດຍອ້ອມຮອບການລົງນາມໃນສັນຍາການຮ່ວມມື, ການເພີ່ມທະວີການສະໜອງຜະລິດຕະພັນການທ່ອງທ່ຽວ, ການເຮັດໃຫ້ການຂົນສົ່ງຂ້າມຊາດອຸດົມສົມບູນ ແລະ ອື່ນໆ. ຜ່ານພັນທະມິດການທ່ອງທ່ຽວເມືອງມິດຕະພາບສາກົນຄຸນໝິງ, ສອງຝ່າຍບໍ່ພຽງແຕ່ເພີ່ມທະວີການຮ່ວມມືໃນການສົ່ງເສີມການທ່ອງທ່ຽວຂ້າມຊາດ ເທົ່ານັ້ນ, ແຕ່ຍັງໄດ້ຮ່ວມກັນສ້າງ 10 ຜະລິດຕະພັນເສັ້ນທາງທ່ອງທ່ຽວຄຸນນະພາບສູງທາງລົດໄຟ ລາວ-ຈີນ, ເຮັດໃຫ້ນັກທ່ອງທ່ຽວຂ້າມຊາດເພີ່ມຂຶ້ນຢ່າງໄວວາ. ໃນຂົງເຂດຊີວິດການເປັນຢູ່ຂອງສັງຄົມ, ບໍ່ວ່າຈະເປັນການຊ່ວຍເຫຼືອເຊິ່ງກັນ ແລະ ກັນ ລະຫວ່າງ ຢຸນນານ ແລະ ລາວ ໃນໄລຍະການລະບາດຂອງພະຍາດ, ຫຼື ການສ້າງຕັ້ງ "ເຂດສາທິດການບໍລິການດ້ານການແພດ ແລະ ສາທາລະນະສຸກ ໃນພາກພື້ນຂ້າມຊາດ ຈີນ-ລາວ", ສອງຝ່າຍລ້ວນແຕ່ໄດ້ໃຊ້ການກະທຳຕົວຈິງ ເພື່ອອະທິບາຍຄວາມໝາຍຂອງຈິດໃຈຄູ່ຮ່ວມຊະຕາກຳທີ່ວ່າ “ຍາດຕິພີ່ນ້ອງຫວັງດີຕໍ່ກັນ, ເພື່ອນບ້ານຫວັງດີຕໍ່ກັນ”.
ຄໍາເຫັນ