ການນຳ ແຂວງຫຼວງພະບາງ ຊຸກຍູ້ວຽກງານຮອບດ້ານຢູ່ເມືອງວຽງຄໍາ

ທ່ານ ສອນສັກ ສຸລິເສີມ ກຳມະການພັກແຂວງ, ເລຂາຄະນະບໍລິຫານງານພັກເມືອງ ແລະ ປະທານຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງວຽງຄໍາ ໄດ້ລາຍງານສະພາບລວມໂດຍຫຍໍ້ຂອງເມືອງວ່າ: ເມືອງວຽງຄໍາ ມີ 72 ບ້ານ, ພົນລະເມືອງ 33,290 ຄົນ, ຍິງ 15,900 ຄົນ, ວຽກງານຈຸດສຸມຂອງເມືອງ ທີ່ກໍານົດໄວ້ຕາມແຜນພັດທະນາເສດຖະກິດ-ສັງຄົມໃນປີ 2026 ວາງໄວ້ ທັງໝົດ 72 ໂຄງການ ມູນຄ່າ 41 ຕື້ກວ່າກີບ ຈັດຕັ້ງປະຕິບັດໄດ້ 27 ໂຄງການ ທຽບໃສ່ແຜນປີ ປະຕິບັດໄດ້ 37.50%, ພ້ອມນັ້ນ ທ່ານໄດ້ຕາງໜ້າການນຳ ແລະ ປະຊາຊົນພາຍໃນເມືອງ, ສະເໜີໃຫ້ການນຳຂອງແຂວງ ຊ່ວຍຊີ້ນໍາພະແນກການທີ່ກ່ຽວຂ້ອງ ຊຸກຍູ້ບໍລິສັດ ສືບຕໍ່ດຳເນີນການກໍ່ສ້າງຕິດຕັ້ງ-ໄຟຟ້າ ຈໍານວນ 3 ບ້ານ, ສືບຕໍ່ກໍ່ສ້າງເສັ້ນທາງ ຕາມການອະນຸບັດທຶນໄພພິບັດ ຢູ່ພາຍໃນເມືອງ, ເພື່ອອຳນວຍຄວາມສະດວກໃນການພັດທະນາເສດຖະກິດຂອງທ້ອງຖິ່ນ.

ຈາກນັ້ນ ຜູ້ຕາງໜ້າຂະແໜງການກ່ຽວຂ້ອງຂັ້ນແຂວງ ໄດ້ຂຶ້ນຊີ້ແຈງ ແລະ ເຜີຍແຜ່ນິຕິກຳທີ່ກ່ຽວຂ້ອງ ເພື່ອໃຫ້ປະຊາຊົນມີສ່ວນຮ່ວມໃນການຮັກສາສິ່ງແວດລ້ອມ, ອະນາໄມຮ່ອງລະບາຍນ້ຳແຄມທາງ ແລະ ສົ່ງເສີມການປູກກາເຟ ເພາະເປັນພືດເສດຖະກິດ ທີ່ສ້າງລາຍຮັບໃຫ້ປະຊາຊົນ ໄດ້ດີ. ໂອກາດນີ້, ທ່ານ ບຸນເລື່ອມ ມະນີວົງ ໄດ້ນຳສະເໜີເນື້ອໃນ ແລະ ຜົນສຳເລັດສຳຄັນຂອງກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ X ແລະ ສະພາປະຊາຊົນແຂວງ ຊຸດທີ V ໃຫ້ຜູ້ເຂົ້າຮ່ວມຮັບຮູ້ຢ່າງກວ້າງຂວາງ ແລະ ໃຫ້ທິດຊີ້ນຳວຽກງານບາງດ້ານ ຢູ່ພາຍໃນເມືອງວຽງຄໍາ, ເພື່ອໃຫ້ປະຊາຊົນຮ່ວມກັນສ້າງສາ ແລະ ພັດທະນາທ້ອງຖິ່ນ ໃຫ້ມີຄວາມຈະເລີນກ້າວໜ້າ. ຕອນທ້າຍ ທ່ານໄດ້ຕາງໜ້າສະພາປະຊາຊົນ ແລະ ການນຳຂັ້ນແຂວງ ໄດ້ມອບເງິນ 50 ລ້ານກີບ ພ້ອມຄອມພິວເຕີ 2 ຊຸດ ໃຫ້ແກ່ສະພາປະຊາຊົນເມືອງວຽງຄໍາ ເພື່ອນຳໃຊ້ໃນວຽກງານສະພາປະຊາຊົນແຂວງປະຈຳເມືອງ, ທັງມອບເງິນຈຳນວນ 25 ລ້ານກີບ ໃຫ້ແກ່ 5 ບ້ານທີ່ເຂົ້າຮ່ວມ ເພື່ອນຳໄປຊຸກຍູ້ການຈັດຕັ້ງປະຕິບັດວຽກງານຢູ່ຮາກຖານ ໃຫ້ມີປະສິດທິຜົນສູງຂຶ້ນ. (ຂ່າວ-ພາບ: ທະນູສິນ ອິດທິພົນ)