 |
ໃນພິທີ ທ່ານ ພູໂຂງ ສີສຸລາດເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ອາເມຣິກາ ແລະການາດາ ໄດ້ກ່າວຕ້ອນຮັບອັນອົບອຸ່ນຕໍ່ພີ່ນ້ອງຄົນເຊື້ອຊາດລາວທີ່ມາຮ່ວມ ພ້ອມທັງຍົກໃຫ້ເຫັນຈຸດປະສົງ ແລະ ຄວາມສໍາຄັນຂອງງານພົບປະໃນຄັ້ງນີ້. ໃນພິທີທີ່ມີຄວາມໝາຍສໍາຄັນດັ່ງກ່າວ, ພີ່ນ້ອງຄົນເຊື້ອຊາດລາວ ໄດ້ຮັບຟັງການໂອ້ລົມຂອງພະນະທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປລາວ ໂດຍທ່ານໄດ້ຍົກໃຫ້ເຫັນເຖິງຜົນສໍາເລັດເປັນກ້າວໆມາຂອງການພັດທະນາເສດຖະກິດ-ສັງຄົມຢູ່ ສປປ ລາວ, ບັນດາຄາດໝາຍສູ້ຊົນຂອງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030) ໂດຍສະເພາະຄວາມຄືບໜ້າທີ່ໜັກແໜ້ນໃນຄວາມພະຍາຍາມຂອງລັດຖະບານລາວເພື່ອນໍາພາປະເທດຊາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາ. ທ່ານຮອງນາຍົກລັດຖະມົນຕີໄດ້ເນັ້ນເຖິງຄວາມເອົາໃຈໃສ່ ແລະ ນະໂຍບາຍທີ່ເອື້ອອໍານວຍຂອງລັດຖະບານລາວ ທີ່ມີຕໍ່ພີ່ນ້ອງຄົນເຊື້ອຊາດລາວ ທີ່ດຳລົງຊີວິດຢູ່ຕ່າງປະເທດເວົ້າລວມ, ເວົ້າສະເພາະ ຢູ່ສະຫະລັດອາເມຣິກາ ແລະ ການາດາ.
ໃນໂອກາດດັ່ງກ່າວ ພີ່ນ້ອງຄົນເຊື້ອຊາດລາວທີ່ເຂົ້າຮ່ວມໄດ້ແລກປ່ຽນຄໍາຄິດຄໍາເຫັນ ແລະ ສົນທະນາໃນບາງບັນຫາທີ່ຕົນເອງມີຄວາມສົນໃຈ ຮ່ວມກັບທ່ານຮອງນາຍົກລັດຖະມົນຕີ ອັນໄດ້ເຮັດໃຫ້ເຂົາເຈົ້າມີຄວາມຮັບຮູ້ ແລະ ຄວາມເຂົ້າໃຈເປັນຢ່າງດີ ຕໍ່ກັບນະໂຍບາຍຂອງລັດຖະບານລາວທີ່ມີຕໍ່ພີ່ນ້ອງຄົນເຊື້ອຊາດລາວຢູ່ຕ່າງປະເທດ.ລັດຖະບານລາວ ຍາມໃດກໍໃຫ້ຄວາມສຳຄັນ ແລະ ຖືວ່າພີ່ນ້ອງຄົນເຊື້ອຊາດລາວຢູ່ຕ່າງປະເທດເປັນສ່ວນໜຶ່ງທີ່ບໍ່ຕັດແຍກອອກຈາກວົງຄະນະຍາດແຫ່ງຊາດລາວ, ເປັນກຳລັງແຮງໃນການປະກອບສ່ວນສ້າງສາພັດທະນາປະເທດຊາດ ໂດຍທາງກົງ ຫຼື ທາງອ້ອມ ຕາມສະພາບເງື່ອນໄຂ ແລະ ຄວາມສາມາດຕົວຈິງຂອງເຂົາເຈົ້າ. ທ່ານ ຮອງນາຍົກລັດຖະມົນຕີໄດ້ສະແດງຄວາມຊົມເຊີຍຕໍ່ພີ່ນ້ອງຄົນເຊື້ອຊາດລາວທີ່ດໍາລົງຊິວິດຢູ່ ອາເມຣິກາ ແລະ ການາດາ ທີ່ຍາມໃດກໍມີນໍ້າໃຈອັນສູງສົ່ງຕໍ່ຄວາມເປັນລາວ, ຄວາມຮັກເຊື້ອແພງຊາດ, ຮັກບ້ານເກີດເມືອງນອນ, ອະນຸລັກຮັກສາ ແລະ ສືບສານຮີດຄອງປະເພນີ ແລະ ວັດທະນະທໍາອັນດີງາມຂອງລາວຢູ່ຊຸມຊົນ ກໍຄື ໃນປະເທດທີ່ຕົນຢູ່ອາໄສ, ມີບົດບາດ ແລະ ສ່ວນຮ່ວມຢ່າງຕັ້ງໜ້າເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ກັບ ອາເມຣິກາ ແລະ ລະຫວ່າງ ສປປ ລາວ ກັບ ການາດາ. ທ່ານຮອງນາຍົກລັດຖະມົນຕີ ໄດ້ຮຽກຮ້ອງໃຫ້ພີ່ນ້ອງຄົນເຊື້ອຊາດລາວລວມທັງຄົນຮຸ່ນໃໝ່ຈົ່ງອ່ວຍໜ້າໄປຫາປະເທດຊາດ, ໄປຢ້ຽມຢາມບ້ານເກີດເມືອງນອນ ຂອງຕົນ, ຂອງພໍ່ແມ່, ປູ່ຍ່າຕາຍາຍ, ໄປທ່ອງທ່ຽວ, ເຮັດທຸລະກິດ, ຄ້າຂາຍ, ເຮັດໂຄງການພັດທະນາ, ຊ່ວຍເຫຼືອ, ຫຼື ກັບຄືນໄປຢູ່ລາວແບບຖາວອນ ເມື່ອຮອດອາຍຸກະສຽນບໍານານໂດຍນໍາເອົາຄວາມຮູ້ ແລະ ປະສົບການ, ເຕັກນິກວິຊາການ ໄປປະກອບສ່ວນເຂົ້າໃນການພັດທະນາປະເທດຊາດ. ທ່ານຮອງນາຍົກລັດຖະມົນຕີໄດ້ຕີລາຄາສູງຕໍ່ພີ່ນ້ອງເຊື້ອຊາດລາວທີ່ໄດ້ຍາມໃດກໍສະແດງອອກຢ່າງແຮງກ້າເຖິງຄວາມສະໝານສາມັກຄີ, ຄວາມເປັນປຶກແຜ່ນຂອງຄົນເຊື້ອຊາດລາວບັນດາເຜົ່າໃນອາເມຣິກາ ກໍຄື ນໍ້າໃຈອັນສູງສົ່ງຂອງຄົນລາວດ້ວຍຄວາມຮັກແພງ ແລະ ຈິງໃຈ ໃນການຕ້ອນຮັບທີມເຕະບານເຍົາວະຊົນລາວ W.I.G NAGA ທີ່ມາແຂ່ງຂັນລະດັບສາກົນຢູ່ສະຫະລັດອາເມຣິກາດ້ວຍຜົນສໍາເລັດຢ່າງຈົບງາມ.ໃນຕອນທ້າຍທ່ານຮອງນາຍົກລັດຖະມົນຕີໄດ້ຮຽກຮ້ອງໃຫ້ພີ່ນ້ອງຄົນເຊື້ອຊາດລາວບັນດາເຜົ່າທຸກຖ້ວນໜ້າ ສືບຕໍ່ປົກປັກຮັກສາຮີດຄອງປະເພນີ-ວັດທະນະທຳຂອງລາວ ແລະ ຂອງຊົນເຜົ່າ ພ້ອມຈິດພ້ອມໃຈເປັນນໍ້າໜຶ່ງໃຈດຽວກັນ ໃນການສົ່ງເສີມເອກະລັກຄວາມເປັນລາວ ອັນມີກຽດສະຫງ່າໃນປະເທດທີ່ຕົນດໍາລົງຊີວິດຢູ່.
 |
ພາຍຫຼັງການໂອ້ລົມ, ທ່ານຮອງນາຍົກລັດຖະມົນຕີ ພ້ອມຄະນະ ກໍໄດ້ຮັບປະທານອາຫານຄໍ່າຮ່ວມກັບພີ່ນ້ອງຄົນເຊື້ອຊາດລາວ ດ້ວຍບັນຍາກາດອັນສະໜິດສະໜົມ ແລະ ເປັນກັນເອງ ໄປພ້ອມໆກັບຊົມການສະແດງສິລະປະວັດທະນະທໍາຂອງລູກຫຼານລາວ ທີ່ເດີນທາງມາຈາກ ເມືອງໂລແວວ, ລັດແມັດຊາຈູເຊັດ ດ້ວຍຄວາມເບີກບານມ່ວນຊື່ນ, ພີ່ນ້ອງຄົນເຊື້ອຊາດລາວທີ່ເຂົ້າຮ່ວມມີຄວາມດີອົກດີໃຈ ທີ່ໄດ້ມີໂອກາດພົບປະໂອ້ລົມກັບການນຳຂັ້ນສູງຂອງ ສປປ ລາວ ແບບໃກ້ຊິດຕິດແທດກັບທຸກຊັ້ນຄົນ.
ຂ່າວ: ກຕທ
ຄໍາເຫັນ