ທ່ານ ໜູພອນ ໄຊປັນຍາຈິດ ວ່າການຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ໄດ້ລາຍງານສະພາບໄພພິບັດທີ່ເກີດຂຶ້ນທົ່ວແຂວງໄຊຍະບູລີໃນປີ 2024 ແລະ ການແກ້ໄຂຊ່ວຍເຫຼືອສຸກເສີນຜູ້ປະສົບໄພພິບັດໃນປີ 2024 ຜ່ານມາ ເປັນຕົ້ນແມ່ນພາຍຸພັດ, ອັກຄີໄພ, ນ້ຳຖ້ວມ, ສັດຕູພືດທຳລາຍຜົນລະປູກ ແລະ ອື່ນໆ. ຈາກນັ້ນ, ທ່ານ ກອງໄຊ ໄຊຍະລາດ ກຳມະການປະຈຳພັກເມືອງ ຕາງໜ້າປະທານຄະນະກຳມະການຄູ້ມຄອງໄພພິຂັ້ນເມືອງ ໄດ້ລາຍງານສະພາບໄພພິບັດທີ່ເກີດຂຶ້ນຢູ່ເມືອງພຽງໃນປີ 2024 ຜ່ານມາ ຊຶ່ງມີໄພພິບັດເກີດຂຶ້ນ 16 ຄັ້ງ, ມີ 39 ບ້ານ, ມີ 928 ຄົວຄອບ ມູນຄ່າເສຍຫາຍ 13 ຕື້ກວ່າກີບ ເປັນຕົ້ນແມ່ນ ອັກຄີໄພ, ໄພນໍ້າຖ້ວມ, ສັດຕູພືດທໍາລາຍເຂົ້ານາ. ຕໍ່ກັບເຫດການດັ່ງກ່າວ, ຄະນະກໍາມະການຄຸ້ມຄອງໄພພິບັດຂັ້ນເມືອງ ໄດ້ໃຫ້ການຊ່ວຍເຫຼືອສຸກເສີນເບື້ອງຕົ້ນ ໂດຍນຳໃຊ້ກອງທຶນຄຸ້ມຄອງໄພພິບັດຂັ້ນເມືອງ.
ໃນໂອ້ກາດນີ້, ກໍໄດ້ມອບເຄື່ອງຊ່ວຍເຫຼືອ ປະເພດເຂົ້າກິນ (ເຂົ້າສານໜຽວ) ຈໍານວນ 9 ໂຕນກວ່າ ມູນຄ່າ 100 ລ້ານກວ່າກີບໃຫ້ກັບຜູ້ປະສົບໄພພິບັດ 3 ບ້ານຄື: ບ້ານ ນາຕານ, ໜອງບົວພີ້ນ້ອງ ແລະ ບ້ານນໍ້າເຮ້ຍ ຈຳນວນ 190 ກວ່າຄອບຄົວ, ໃຫ້ກຽດມອບໂດຍທ່ານ ເພັດພິໄຊ ສູນວິໄລ.
(ຂ່າວ: ວົງສະຫວັນ ສຸທິໂວຫານ)
ຄໍາເຫັນ