 |
ເປັນກຽດໃນພິທີມີ ສະຫາຍ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ຮອງປະທານ ຜູ້ປະຈໍາການຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ຮອງນາຍົກລັດຖະມົນຕີ, ສະຫາຍ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ, ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ, ສະຫາຍ ນາງ ສູນທອນ ໄຊຍະຈັກຄະນະເລຂາທິການສູນກາງພັກ ຮອງປະທານສະພາແຫ່ງຊາດ, ສະຫາຍ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ບັນດາລັດຖະມົນຕີ, ຮອງລັດຖະມົນຕີ, ຜູ້ຕາງໜ້າອົງການຈັດຕັ້ງມະຫາຊົນ, ແຂກຖືກເຊີນ ພ້ອມດ້ວຍນັກຮຽນ-ນັກສຶກສາປັນຍາຊົນທັງລາວ-ຫວຽດນາມ ເຂົ້າຮ່ວມ.
 |
ສະຫາຍ ຟາມ ມິ່ງ ຈ້ຽນ ອຸປະທູດ ແຫ່ງ ສສ ຫວຽດນາມ ປະຈໍາລາວ ໃຫ້ສໍາພາດຕໍ່ນັກຂ່າວໜັງສືພິມປະຊາຊົນ ວ່າ: ຈຸດປະສົງການເຕົ້າໂຮມໃນມື້ນີ້ ເພື່ອຊົມລາຍການຖ່າຍທອດສົດ ພິທີສວນສະໜາມ ສະເຫຼີມສະຫຼອງວັນຊາດແຫ່ງ ສສ ຫວຽດນາມ ຄົບຮອບ 80 ປີ ທີ່ນະຄອນຫຼວງຮ່າໂນ້ຍ, ເພື່ອຮັດແໜ້ນສາຍພົວພັນລະຫວ່າງຫວຽດນາມ-ລາວ, ຢາກໃຫ້ປວງຊົນລາວ-ຫວຽດນາມ ໄດ້ຫວນຄືນປະຫວັດສາດທີ່ສະຫງ່າອົງອາດຂອງປະເທດຊາດຫວຽດນາມ.
 |
ໃນເມື່ອກ່ອນ ວັນທີ 2/9/1945 ທີ່ສະໜາມຫຼວງ ນະຄອນຫຼວງຮ່າໂນ້ຍ ປະທານ ໂຮ່ຈິມິນ ໄດ້ອ່ານບົດຖະແຫຼງການປະກາດເອກະລາດ ສະຖາປະນາສາທາລະນະລັດ ປະຊາທິປະໄຕ ຫວຽດນາມ, ມູນເຊື້ອການປະຕິວັດຂອງປະຊາຊົນຫວຽດນາມ ພາຍໃຕ້ການນໍາຂອງພັກກອມມູນິດອິນດູຈີນ.
 |
ໃນພິທີ ນອກຈາກຮັບຊົມ ການເດີນສວນສະໜາມແລ້ວ ຍັງໄດ້ຊົມງານວາງສະແດງຮູບພາບ ຈໍານວນ 80 ພາບ ຊຶ່ງສະແດງໃຫ້ເຫັນເຖິງບັນດາຜົນງານ ຂອງປະເທດວຽດນາມ ໃນຕະຫຼອດໄລຍະ 80 ປີ ແຫ່ງການສ້າງສາພັດທະນາ ສສ ຫວຽດນາມ, ບັນດາຮູບພາບດັ່ງກ່າວ ໄດ້ພັນລະນາສາຍພົວພັນພິເສດ ລະຫວ່າງ ຫວຽດ-ລາວ, ນັບແຕ່ໄດ້ຮັບການສ້າງຕັ້ງ ສາທາລະນະລັດ ປະຊາທິປະໄຕ ຫວຽດນາມ ຂຶ້ນ ຈົນ ຮອດປັດຈຸບັນ ໂດຍສະເພາະ ແມ່ນບັນດາຜົນງານທີ່ຍາດມາໄດ້ ໃນໄລຍະທີ່ ສອງຊາດ ຫວຽດ-ລາວ ຕໍ່ສູ້ຄຽງບ່າຄຽງໄຫຼ່ ຕ້ານສັດຕູໂຕດຽວກັນ ກໍຄື ໄລຍະຮ່ວມມືກັນ ໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ສອງປະເທດຫວຽດ-ລາວ ຈົນເຖິງປັດຈຸບັນ.
 |
ໂອກາດດັ່ງກ່າວ ສະຫາຍ ຟາມ ມິ່ງ ຈ້ຽນ ສະແດງຄວາມຂອບໃຈມາຍັງບັນດາສະຫາຍການນໍາພັກ, ລັດ, ແຂກຖືກເຊີນ, ປວງຊົນລາວ-ຫວຽດ ທີ່ໄດ້ສະໜັບສະໜູນ ພ້ອມທັງເຂົ້າຮ່ວມຊົມການຖ່າຍທອດສົດ ພິທີສວນສະ ໜາມໃນຄັງນີ້ ຂໍອວຍພອນໃຫ້ນໍ້າໃຈມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ, ປະຊາຊົນສອງຊາດ ຫວຽດນາມ-ລາວ, ລາວ-ຫວຽດນາມ ຈົ່ງໝັ້ນຄົງຂະໜົງແກ່ນແລະ ຂຽວສົດງົດງາມໄປສູ່ກາລະນານ.
 |
ໂອກາດເຂົ້າທີ່ສະຫງ່າລາສີນີ້, ສະຫາຍ ນາງ ສຸກັນຍາ ຈັນທະວົງ ແລະ ສະຫາຍ ທອງສະໄໝ ປາທໍ່ ພະນັກງານບໍານານ ຕ່າງກໍຜັດປ່ຽນກັນ ສະແດງຄວາມຮູ້ສຶກດີໃຈ ພາກພູມໃຈທີ່ໄດ້ເຂົ້າຮ່ວມໃນພິທີຊົມການສວນສະໜາມສະເຫຼີມສະຫຼອງວັນຊາດຫວຽດນາມ, ເຫັນການເຕີບໃຫຍ່ຂະຫຍາຍຕົວຂອງທຸກໆກ້ອນກໍາລັງ ໂດຍສະເພາະຄວາມເຂັ້ມແຂງ ຂອງກໍາລັງປະກອບອາວຸດ ເພື່ອປ້ອງກັນປິຕຸພູມທີ່ແສນຮັກ,
 |
ເຫັນໄດ້ການພັດທະນາປະເທດຊາດ ເຮັດໃຫ້ປະເທດຫວຽດນາມມີໂສມໜ້າໃໝ່ທີ່ໃຫຍ່ຫຼວງ, ສາຍພົວພັນ ກໍຄືການຮ່ວມມືໄລຍະຜ່ານມາ ລະຫວ່າງ ສອງປະເທດ ຖືວ່າ ເປັນອ້າຍ-ນ້ອງ ມີຄວາມໝັ້ນຄົງ ຕັ້ງແຕ່ສະໄໝປະທານ ໂຮ່ຈິມິນ, ປະທານ ສຸພານຸວົງ, ປະທານໄກສອນ ພົມວິຫານ ເປັນຜູ້ກໍ່ຕັ້ງ ສອງພັກ, ສອງລັດມາ ແລະ ມອບໃຫ້ປວງຊົນທັງສອງຊາດ
 |
ໄດ້ສືບຕໍ່ເສີມຂະຫຍາຍມູນເຊື້ອອັນດີງາມ ແລະ ຄວາມສາມັກຄີດັ່ງກ່າວຢ່າງບໍ່ຢຸດຢັ້ງ ຂໍອວຍພອນໃຫ້ບັນດາ ສະຫາຍການນໍາທັງສອງປະເທດ ຈົ່ງມີສຸຂະພາບແຂງແຮງ, ເຂັ້ມແຂງໝັ້ນຍືນ ແລະ ອວຍພອນແດ່ ການຮ່ວມມື ສອງປະເທດ ຈົ່ງຍືນຍົງຢູ່ໃນດວງໃຈຂອງປວງຊົນທັງສອງປະເທດຕະຫຼອດກາລະນານ.
 |
(ຂ່າວ: ແສງຈັນ)
ຄໍາເຫັນ