 |
ການຫົດສົງ ມຸທິຕາມະຫາເຖຣາພິເສກ ແດ່ພະອາຈານໃຫຍ່ ມະຫາເວດ ມະເສໄນ ຈັດຂຶ້ນໃນໂອກາດທີ່ພະອາຈານໃຫຍ່ ໄດ້ຖືກເລືອກຕັ້ງໃຫ້ເປັນປະທານສູນກາງ ອພສ ອົງທີ 7 ທັງເປັນການສະແດງຄວາມກະຕັນຍູກະຕະເວທີຕໍ່ຜູ້ນຳພາສູງສຸດຂອງຄະນະສົງລາວ ແລະ ຍົກຍ້ອງບຸກຄົນຜູ້ມີຄຸນງາມຄວາມດີ ຜູ້ທີ່ເສຍສະຫຼະກຳລັງກາຍກຳລັງໃຈໃນການຊີ້ນຳ-ນຳພາພະສົງ ແລະ ຮຽບຮຽງພະທຳຄຳສອນ. ການໄດ້ຮ່ວມຫົດສົງພະມະຫາເຖຣະ ຖືເປັນມຸງຄຸນອັນສູງສຸດ ຊຶ່ງໃນຊີວິດໜຶ່ງບໍ່ໄດ້ມີໂອກາດພົບເຫັນໄດ້ງ່າຍໆ.
 |
ໂອກາດນີ້, ບັນດາການນຳພັກ-ລັດ ພ້ອມດ້ວຍຊາວພຸດທະສາສະນິກະຊົນລາວບັນດາເຜົ່າ ໄດ້ຮ່ວມໃສ່ບາດຖວາຍສັງຄະທານແດ່ພະສົງ 130 ອົງເພື່ອເປັນສິລິມຸງຄຸນ ແລະ ເປັນບຸນເປັນກຸສົນຕື່ມອີກ. ພ້ອມທັງຮ່ວມພິທີສະຫຼອງຍົກຍອດຊໍ່ຟ້າອາຄານສໍານັກງານປະທານສູນກາງ ອພສ ຫຼັງໃໝ່ ຊຶ່ງເປັນສູນກາງບໍລິຫານງານສົງທີ່ທັນສະໄໝ. ພ້ອມນີ້, ຄະນະກຳມະການຈັດງານຍັງໄດ້ເປີດໂອກາດໃຫ້ພຸດທະສາສະນິກະຊົນ ໄດ້ຮ່ວມບໍລິຈາກທຶນສົມທົບ ເພື່ອຊຳລະຄ່າກໍ່ສ້າງອາຄານທີ່ຍັງຄ້າງຊຳລະ, ການຮ່ວມບໍລິຈາກປັດໄຈ ແລະ ຮ່ວມພິທີຍົກຍອດຊໍ່ຟ້າ ປຽບເໝືອນການໄດ້ຝາກຊື່ ແລະ ບຸນກຸສົນໄວ້ໃນແຜ່ນດິນ, ເປັນວິຫານທານທີ່ມີອານິສົງແຮງ ກໍ່ໃຫ້ເກີດຄວາມສົມບູນພູນສຸກໃນຊີວິດ.
 |
ຂ່າວ: ທະນູທອງ; ພາບ: ຂັນໄຊ
ຄໍາເຫັນ