ຫຼາຍປີຜ່ານມານີ້, ບໍ່ວ່າຈະເປັນການເຮັດວຽກຢູ່ທ້ອງຖິ່ນ ຫຼື ຢູ່ສູນກາງ, ທ່ານ ສີຈິ້ນຜິງ ໄດ້ໃຫ້ຄວາມສຳຄັນເປັນຢ່າງສູງຕໍ່ວຽກງານຫໍພິພິທະພັນມາໂດຍຕະຫຼອດ.
ຕອນເຮັດວຽກຢູ່ແຂວງເຈີ້ຈ່ຽງ, ພາຍໃຕ້ຄວາມເອົາໃຈໃສ່ຈາກທ່ານ ສີຈິ້ນຜິງ, ພາກສ່ວນການເງິນຂອງແຂວງເຈີ້ຈ່ຽງໄ ດ້ແກ້ໄຂບັນຫາດ້ານງົບປະມານ 10 ລ້ານຢວນ ໃຫ້ເມືອງໂຫຼງສວນ ທີ່ເປັນເມືອງທຸກຍາກຢູ່ເຂດພູດອຍເພື່ອຊ່ວຍເມືອງນີ້ເປີດໂຄງການກໍ່ສ້າງຫໍພິພິທະພັນເຄື່ອງປັ້ນດິນເຜົາເຄືອບຂຽວ.
ບໍ່ພຽງແຕ່ເທົ່ານັ້ນ, ຕອນເຮັດວຽກຢູ່ທ້ອງຖິ່ນ, ທ່ານ ສີຈິ້ນຜິງ ຍັງໄດ້ສະໜັບສະໜູນນະຄອນສວນໂຈ່ວ ແຂວງຟູຈ້ຽນ ສ້າງຕັ້ງຫໍພິພິທະພັນປະຫວັດສາດດ້ານການຄົມມະນາຄົມທາງທະເລ, ເພິ່ນຍັງເປັນຜູ້ຕົກລົງສະຫງວນຫໍວາງສະແດງແຂວງເຈີ້ຈ່ຽງທີ່ແຕ່ເດີມຖືກຈັດຢູ່ໃນບັນຊີສິ່ງກໍ່ສ້າງທີ່ຕ້ອງທັບມ້າງຖິ້ມຕາມແຜນງານ ແລະ ອື່ນໆ.
ພາຍຫຼັງດຳລົງຕຳແໜ່ງເປັນເລຂາທິການໃຫຍ່ຄະນະກຳມະການສູນກາງພັກກອມມູນິດຈີນແລ້ວ, ທ່ານ ສີຈິ້ນຜິງ ຍັງຄົງໃຫ້ຄວາມສຳຄັນເປັນຢ່າງສູງຕໍ່ວຽກງານການວານງແຜນແລະ ກໍ່ສ້າງຫໍພິພິທະພັນຄືເກົ່າ.
ໃນເກືອບ 10 ປີຜ່ານມານີ້, ຈຳນວນຫໍພິພິທະພັນຂອງຈີນໄດ້ຂະຫຍາຍຕົວດ້ວຍຈັງຫວະເພີ່ມຂຶ້ນ 200 ກວ່າແຫ່ງຕໍ່ປີ. ນັບມາຮອດທ້າຍປີ2024, ທົ່ວປະເທດຈີນມີຫໍພິພິທະພັນທີ່ຈົດທະບຽນລວມທັງໝົດ 7,046 ແຫ່ງ ຊຶ່ງປົກຄຸມ 300 ກວ່ານະຄອນໃນທົ່ວປະເທດ, ສະເລ່ຍແລ້ວ, ແຕ່ລະ 206,300 ຄົນ ຈະມີຫໍພິພິທະພັນແຫ່ງໜຶ່ງ.
ເດືອນມິຖຸນາ 2021, ທ່ານ ສີຈິ້ນຜິງ ພ້ອມດ້ວຍບັນດາສະຫາຍຜູ້ນຳພັກ ແລະ ລັດໄດ້ເດີນທາງໄປຫໍວາງສະແດງປະຫວັດສາດພັກກອມມູນິດຈີນ ທີ່ນະຄອນຫຼວງປັກກິ່ງ ໂດຍໄດ້ຢ້ຽມຊົມການວາງສະແດງປະຫວັດສາດພັກກອມມູນິດຈີນພາຍໃຕ້ຫົວຂໍ້ “ບໍ່ລືມອຸດົມການແຕ່ຫົວທີ ຈົດຈຳພາລະກຳຢ່າງໜັກແໜ້ນ” ເພື່ອສຳນຶກຮູ້ເສັ້ນທາງການສູ້ຊົນຮ້ອຍປີຂອງພັກ.
ຫໍວາງສະແດງແຫ່ງນີ້ກວມເນື້ອທີ່ກໍ່ສ້າງທັງໝົດ 147,000 ຕາແມັດ ແມ່ນທ່ານ ສີຈິ້ນຜິງ ເປັນຜູ້ກຳນົດວາງແຜນ ແລະ ອະນຸມັດກໍ່ສ້າງດ້ວຍຕົນເອງ ແລະ ງານວາງສະແດງປະຫວັດສາດພັກກອມມູນິດຈີນຄັ້ງນັ້ນກໍແມ່ນຈັດຂຶ້ນພາຍໃຕ້ຄວາມເອົາໃຈໃສ່ຈາກເພິ່ນເຊັ່ນດຽວກັນ.
ໃນເວລາຢ້ຽມຊົມການວາງສະແດງ, ທ່ານ ສີຈິ້ນຜິງ ໄດ້ເນັ້ນໜັກວ່າຕ້ອງຮຽນຮູ້ ແລະ ສະຫຼຸບຖອດຖອນປະຫວັດສາດຂອງພັກໄດ້ດີ, ສືບທອດ ແລະ ເສີມຂະຫຍາຍບົດຮຽນອັນປະເສີດຂອງພັກໃຫ້ດີ, ຈົດຈຳຂະບວນການບຸກບືນສູ້ຊົນ, ແບກຫາບພາລະກຳທາງປະຫວັດສາດ ແລະ ຮັບເອົາພະລັງແຮງຈາກປະຫວັດການສູ້ຊົນຂອງພັກເພື່ອກ້າວເດີນໄປຂ້າງໜ້າ.
ຫໍພິພິທະພັນບູຮານຄະດີຈີນ ຂອງສະຖາບັນຄົ້ນຄວ້າປະຫວັດສາດຈີນ ເປັນຫໍພິພິທະພັນທີ່ຕັ້ງຊື່ດ້ວຍບູຮານຄະດີແຫ່ງທຳອິດຂອງຈີນ. ເດືອນມິຖຸນາ 2023, ທ່ານ ສີຈິ້ນຜິງ ໄດ້ເດີນທາງໄປຢ້ຽມຢາມຫໍພິພິທະພັນແຫ່ງນີ້ເພື່ອຮັບຮູ້ຜົນງານຫຼ້າສຸດດ້ານການຂຸດຄົ້ນບູຮານຄະດີ ແລະສະ ພາບການອະນຸລັກວັດຖຸບູຮານ.
ທ່ານ ສີຈິ້ນຜິງ ເຫັນວ່າ: “ປະຊາຊາດຈີນ ແລະ ອະລິຍະທຳຈີນ ມີປະຫວັດອັນຍາວນານວັດທະນະທຳຈີນມີຄວາມເລິກເຊິ່ງ ແລະ ກວ້າງຂວາງ, ຫໍພິພິທະພັນແຫ່ງໜຶ່ງກໍເປັນໂຮງຮຽນໃຫຍ່ແຫ່ງໜຶ່ງ.”
ຫຼາຍປີມານີ້, ໃນໄລຍະລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ທ້ອງຖິ່ນຕ່າງໆ, ທ່ານ ສີຈິ້ນຜິງ ໄດ້ເດີນທາງໄປຢ້ຽມຊົມຫໍພິພິທະພັນທ້ອງຖິ່ນເຫຼົ່ານີ້, ເພິ່ນໄດ້ກ່າວເນັ້ນໜັກຫຼາຍເທື່ອວ່າ “ເຮັດໃຫ້ວັດຖຸບູຮານທີ່ສະສົມໄວ້ໃນຫໍພິພິທະພັນ, ມໍລະດົກທີ່ຢັ່ງຢາຍຢູ່ຕາມຜືນແຜ່ນດິນອັນກວ້າງໃຫຍ່ໄພສານກໍຄືຕົວໜັງສືຢູ່ໃນປຶ້ມຕຳລາບູຮານຕ່າງມີຊີວິດຊີວາຂຶ້ນ.”ເພິ່ນຍັງຊີ້ໃຫ້ເຫັນວ່າ: “ຕ້ອງຊຸກຍູ້ວັດທະນະທຳຈີນທີ່ມີມູນເຊື້ອອັນດີງາມມີການຫັນປ່ຽນແລະ ການຂະຫຍາຍຕົວຢ່າງປະດິດສ້າງ, ກະຕຸ້ນພະລັງຄວາມມີຊີວິດຊີວາຂອງວັດທະນະທຳຈີນທີ່ມີມູນເຊື້ອອັນດີງາມດ້ວຍຈິດໃຈຍຸກສະໄໝ.”
10 ກວ່າປີຜ່ານມານີ້, ຫໍພິພິທະພັນປະເພດຕ່າງໆໃນທົ່ວປະເທດຈີນໄດ້ສຸມໃສ່ເອກະລັກພິເສດພ້ອມທັງພັດທະນາຢ່າງປະດິດສ້າງໂດຍສາມາດສ້າງຊື່ສຽງໂດ່ງດັງຂຶ້ນຢ່າງຕໍ່ເນື່ອງຈົນກາຍເປັນສະຖານທີ່ທ່ອງທ່ຽວວັດທະນະທຳຢ່າງໂດດເດັ່ນທີ່ນັກທ່ອງທ່ຽວນິຍົມໄປຢ້ຽມຊົມ. ຕາມສະຖິຕິ, ປີ 2024 ຜ່ານມາ, ຫໍພິພິທະພັນແຫ່ງຕ່າງໆໃນທົ່ວປະເທດຈີນໄດ້ຕ້ອນຮັບຜູ້ເຂົ້າຊົມຈຳນວນ 1 ຕື້ 490 ລ້ານເທື່ອຄົນ. ໃນໄລຍະພັກວັນກຳມະກອນສາກົນວັນທີ 1 ພຶດສະພາ 2025, ຫໍພິພິທະພັນໃນທົ່ວປະເທດຈີນໄດ້ຕ້ອນຮັບຜູ້ເຂົ້າຊົມຫຼາຍກວ່າ 60,491,900 ເທື່ອຄົນ ຊຶ່ງໄດ້ສ້າງສະຖິຕິໃໝ່ໃນປະຫວັດສາດ.
ໂດຍ: ຊີອາໄອ
ຄໍາເຫັນ