ກະຊວງ ຮສສຫວນຄືນມູນເຊື້ອ 2 ວັນປະຫວັດສາດ ແລະ ເຊື່ອມຊຶມມະຕິກອງປະຊຸມຄົບຄະນະຄັ້ງທີ 7 ຂອງສູນກາງພັກ ສະໄໝທີ XI

ຄະນະພັກກະຊວງແຮງງານ ແລະ ສະຫວັດດີການ-ສັງຄົມ (ຮສສ) ໄດ້ຈັດຕັ້ງປາຖະກະຖາຫວນຄືນມູນເຊື້ອວັນຊາດທີ 2 ທັນວາ ຄົບຮອບ 48 ປີ (2 ທັນວາ 1975-2 ທັນວາ 2023 ) ແລະ ວັນເກີດຂອງທ່ານປະທານໄກສອນ ພົມວິຫານ ຄົບຮອບ 103 ປີ (13 ທັນວາ 1920-13 ທັນວາ 2023) ແລະ ເຊື່ອມຊຶມຜັນຂະຫຍາຍມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ XIຂຶ້ນໃນວັນທີ 8ທັນວານີ້ ທີ່ກະຊວງດັ່ງກ່າວ ພາຍໃຕ້ການເປັນປະທານ ແລະ ໃຫ້ກຽດເຜີຍແຜ່ເອກະສານຂອງທ່ານນາງ ໃບຄຳ ຂັດທິຍະ ລັດຖະມົນຕີກະຊວງ ຮສສ, ມີບັນດາເລຂາໜ່ວຍພັກ, ສະມາຊິກພັກ, ພະນັກງານ-ລັດຖະກອນເຂົ້າຮ່ວມ.
ທ່ານນາງ ໃບຄຳ ຂັດທິຍະ ໄດ້ຍົກໃຫ້ເຫັນມູນເຊື້ອວັນຊາດທີ 2 ທັນວາ ຄົບຮອບ 48 ປີ ແລະ ວັນຄ້າຍວັນເກີດຂອງທ່ານປະທານໄກສອນ ພົມວິຫານ ຄົບຮອບ 103 ປີ ແລະ ເຊື່ອມຊຶມຜັນຂະຫຍາຍມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ XI.
ການປາຖະກະຖາ 2 ວັນປະຫວັດສາດ ແລະ ເຜີຍແຜ່ເອກະສານໃນຄັ້ງນີ້ ເພື່ອເຮັດໃຫ້ຄະນະພັກ, ຄະນະນຳຄະນະໜ່ວຍພັກແຕ່ລະຂັ້ນ, ພະນັກງານ, ສະມາຊິກພັກທົ່ວອົງຄະນະພັກກະຊວງ ຮສສໄດ້ຄົ້ນຄວ້າ, ເຊື່ອມຊຶມ, ກຳແໜ້ນ ແລະ ສ້າງຈິດສຳນຶກ ກໍຄືສຶກສາອົບຮົມໃຫ້ສະມາຊິກພັກ, ພະນັກງານ-ລັດຖະກອນໃຫ້ມີຈິດໃຈຮັກຊາດ, ຮັກລະບອບໃໝ່ ຮັກລະບອບປະຊາທິປະໄຕປະຊາຊົນ ເພື່ອເປັນການຮຽນຮູ້ເຖິງຄຸນສົມບັດ-ສິນທຳປະຕິວັດຂອງປະທານໄກສອນ ພົມວິຫານ ພ້ອມທັງເປັນການສ້າງຄວາມຮັບຮູ້-ເຂົ້າໃຈ ແລະ ເປັນເອກະພາບສູງຕໍ່ເນື້ອໃນມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ XI ເພື່ອພ້ອມກັນສຸມຈິດໃຈ, ເພີ່ມທະວີຄວາມຮັບຜິດຊອບໃນການຈັດຕັ້ງປະຕິບັດໜ້າທີ່ການເມືອງໃນໄລນະຕໍ່ໜ້າໃຫ້ມີຜົນສຳເລັດ ຮັບປະກັນຄຸນນະພາບ ແລະ ມີປະສິດທິຜົນ.
ຂ່າວ-ພາບ: ພູວັນ