 |
ການຈັດຊຸດຝຶກອົບຮົມໃນຄັ້ງນີ້ ມີຈຸດປະສົງເພື່ອຜັນຂະຫຍາຍເນື້ອໃນຈິດໃຈ ຂອງຜົນສໍາເລັດກອງປະຊຸມວຽກງານກວດກາທົ່ວປະເທດ ຄັ້ງທີ V ແນໃສ່ສ້າງຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ ໃຫ້ແກ່ບັນດາສະຫາຍເລຂາ, ຮອງເລຂາໜ່ວຍພັກ ແລະ ສະມາຊິກພັກ ຜູ້ທີ່ຮັບຜິດຊອບວຽກງານກວດກາໂດຍກົງຂອງກະຊວງການຕ່າງປະເທດຕໍ່ກັບທັດສະນະ, ແນວທາງນະໂຍບາຍຂອງພັກ ກ່ຽວກັບວຽກງານກວດກາ. ທັງນີ້, ກໍເພື່ອໃຫ້ບັນດາສະຫາຍທີ່ເຂົ້າຮ່ວມໄດ້ນໍາເອົາບົດຮຽນໄປໝູນໃຊ້ເຂົ້າໃນການນໍາພາ-ຊີ້ນໍາຕົວຈິງ ໃຫ້ເກີດປະສິດທິພາບ ແລະ ປະສິດທິຜົນສູງສຸດໃນຕໍ່ໜ້າ.
 |
ໃນພິທີ, ສະຫາຍ ອານຸພາບ ວົງໜໍ່ແກ້ວ ໄດ້ເນັ້ນໜັກເຖິງຄວາມສໍາຄັນຂອງວຽກງານກວດກາວ່າ: ພັກເຮົາໄດ້ຖືເອົາວຽກງານຕິດຕາມ-ກວດກາ ພາຍໃນພັກ ເປັນວຽກງານຍຸດທະສາດ ທີ່ຕິດພັນກັບບົດບາດການນໍາພາຂອງພັກ ແລະ ການຄຸ້ມຄອງຂອງລັດ ຢ່າງສະເໝີຕົ້ນສະເໝີປາຍ ດັ່ງຄໍາເວົ້າທີ່ວ່າ: "ການນໍາພາຕ້ອງຕິດພັນກັບການກວດກາ, ບໍ່ມີການກວດກາ ກໍໝາຍຄວາມວ່າບໍ່ມີການນໍາພາ". ສະນັ້ນ, ວຽກງານຕິດຕາມ-ກວດກາ ຈຶ່ງແມ່ນວຽກທີ່ສອດຫ້ອຍເຂົ້າໃນທຸກຂົງເຂດ, ຕ້ອງໄດ້ຈັດຕັ້ງປະຕິບັດຢ່າງເປັນປົກກະຕິ ແລະ ຂາດບໍ່ໄດ້.
ຊຸດຝຶກອົບຮົມຄັ້ງນີ້ຈະດໍາເນີນໄປເປັນເວລາ 2 ວັນ ແຕ່ວັນທີ 7-8 ກັນຍາ 2026 ຊຶ່ງຜູ້ເຂົ້າຮ່ວມ ຈະໄດ້ແລກປ່ຽນບົດຮຽນຢ່າງກົງໄປກົງມານໍານັກວິທະຍາກອນຜູ້ມີປະສົບການ ຈາກຄະນະກວດກາສູນກາງພັກ ແລະ ອົງການກວດກາແຫ່ງລັດ. ໂດຍເນັ້ນໃສ່ເນື້ອໃນສໍາຄັນ ເປັນຕົ້ນແມ່ນວຽກງານຕິດຕາມ-ກວດກາພັກ ແລະ ກວດກາລັດ; ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ; ການຕິດຕາມຜົນການກວດກາ ແລະ ການແກ້ໄຂບັນຫາຕັ້ງແຕ່ຫົວທີ.
ພ້ອມດຽວກັນນີ້, ສະຫາຍປະທານພິທີ ຍັງໄດ້ຮຽກຮ້ອງໃຫ້ນັກສໍາມະນາກອນທຸກສະຫາຍ ຈົ່ງຍົກສູງຄວາມຮັບຜິດຊອບ, ຕັ້ງອົກຕັ້ງໃຈຄົ້ນຄວ້າຮ່ໍາຮຽນ ແລະ ແລກປ່ຽນປະສົບການຕົວຈິງຢ່າງຈິງໃຈ ທັງກັບວິທະຍາກອນ ແລະ ນັກສໍາມະນາກອນດ້ວຍກັນ ເພື່ອສ້າງຄວາມເຂັ້ມແຂງ ແລະ ເຮັດໃຫ້ຊຸດຝຶກອົບຮົມ ບັນລຸຜົນສໍາເລັດຕາມຈຸດປະສົງ ແລະ ຄາດໝາຍທີ່ວາງໄວ້ຢ່າງຈົບງາມ.
(ຂ່າວ: ກຕທ)
ຄໍາເຫັນ