ກະຊວງຍຸຕິທຳ ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ

ໂດຍ: ບຸນຕອມ
ຄະນະບໍລິຫານງານພັກກະຊວງຍຸຕິທຳຍາມໃດກໍຖືສຳຄັນ ແລະ ເອົາໃຈໃສ່ຕໍ່ວຽກງານສຶກສາອົບຮົມການເມືອງ-ແນວຄິດໃຫ້ສະມາຊິກພັກ, ພະນັກງານ-ລັດຖະກອນ ຢ່າງເປັນປົກກະຕິ.
 ສະຫາຍ ບຸນທາ ຊົງເຍີທ່າວ ຮອງເລຂາຄະນະບໍລິຫານງານພັກກະຊວງ ໄດ້ຜ່ານບົດສະຫຼຸບການນຳພາຂອງຄະນະບໍລິຫານງານພັກກະຊວງປະຈຳໄຕມາດ III ແລະ ທິດທາງແຜນການປະຈຳໄຕມາດ IV ປະຈຳປີ 2023 ຕໍ່ກອງປະຊຸມຄົບຄະນະບໍລິຫານງານພັກກະຊວງຍຸຕິທໍາ ຄັ້ງທີ XI ສະໄໝທີ IV ໃນບົດສະຫຼຸບລາຍງານໄດ້ຍົກໃຫ້ເຫັນວ່າ: ຍາມໃດຄະນະບໍລິຫານງານພັກກະຊວງ ກໍຖືສຳຄັນ ແລະ ເອົາໃຈໃສ່ຕໍ່ວຽກງານສຶກສາອົບຮົມການເມືອງ-ແນວຄິດໃຫ້ສະມາຊິກພັກ, ພະນັກງານ-ລັດຖະກອນຢ່າງເປັນປົກກະຕິ ແລະ ຕໍ່ເນື່ອງດ້ວຍການຈັດຕັ້ງເຊື່ອມຊຶມບັນດາມະຕິ, ຄຳສັ່ງ ແລະ ເອກະສານສຳຄັນຂອງພັກ-ລັດ. ພ້ອມນັ້ນໄດ້ເອົາໃຈໃສ່ໃນການຊີ້ນຳ-ນຳພາການຈັດຕັ້ງປະຕິບັດວຽກງານວິຊາສະເພາະ ໄດ້ຮັບຜົນສໍາເລັດຫຼາຍດ້ານເປັນຕົ້ນ ວຽກງານສ້າງ ແລະ ປັບປຸງກົດໝາຍ, ວຽກງານໂຄສະນາເຜີຍແຜ່ກົດໝາຍ, ວຽກງານສ້າງບຸຄະລາກອນກົດໝາຍ, ວຽກງານບໍລິການກົດໝາຍ ແລະ ຍຸຕິທໍາ. 
ວຽກງານປະຕິບັດຄໍາຕັດສິນຂອງສານ, ວຽກງານພົວພັນຮ່ວມມືສາກົນ ແລະ ວຽກງານຫ້ອງການ, ອັນພົ້ນເດັ່ນແມ່ນອົງຄະນະພັກກະຊວງ ໄດ້ຕົກລົງຫັນເອົາພະນັກງານຫຼັກແຫຼ່ງ ຈໍານວນ 17 ສະຫາຍ ຍິງ 3 ສະຫາຍ ທັງເປັນຄະນະພັກກະຊວງ ເປັນຫົວໜ້າກົມ, ຮອງຫົວໜ້າກົມ 8 ສະຫາຍ ແລະ ຫົວໜ້າພະແນກ 6 ສະຫາຍ ລົງເຄື່ອນໄຫວຊີ້ນຳການປະຕິບັດ 5 ກິດຈະກຳວຽກງານຍຸຕິ ທໍາຮາກຖານ, ວຽກງານສ້າງນິຕິກຳ ແລະ ວຽກງານປະຕິບັດຄໍາຕັດສິນຂອງສານເປັນເວລາ 3 ເດືອນ ຊຶ່ງໄດ້ສ້າງຄວາມເຂັ້ມແຂງໃຫ້ແກ່ພະແນກຍຸຕິທຳ 17 ແຂວງໃນວຽກງານດັ່ງກ່າວ ແລະ ຍົກລະດັບຄວາມຮູ້ຂອງພະນັກງານພວກເຮົາ ໂດຍຜ່ານຂະບວນການວຽກງານຕົວຈິງຫຼາຍຂຶ້ນ. ນອກຈາກວຽກງານດັ່ງກ່າວແລ້ວ ຍັງໄດ້ເອົາໃຈໃສ່ຊີ້ນຳອົງການຈັດຕັ້ງມະຫາຊົນ, ວຽກງານປ້ອງກັນຄວາມສະຫງົບພາຍໃນ, ວຽກງານການນຳພາກໍ່ສ້າງພັກ, ປັບປຸງກົງຈັກການຈັດຕັ້ງ ແລະ ວຽກງານກວດກາ. ນອກນັ້ນ, ໃນບົດສະຫຼຸບຍັງໄດ້ຍົກໃຫ້ເຫັນດ້ານດີ, ຂໍ້ຄົງຄ້າງຈຳນວນໜຶ່ງ ທີ່ຈະຕ້ອງສືບຕໍ່ປັບປຸງແກ້ໄຂປະຈຳໄຕມາດ IV ປີ 2023.