ກະຊວງຍຸຕິທຳ ຫວນຄືນມູນເຊື້ອ 2 ວັນປະຫວັດສາດ ແລະ ເຊື່ອມຊຶມມະຕິກອງປະຊຸມຄົບຄະນະຄັ້ງທີ 7 ຂອງສູນກາງພັກ ສະໄໝທີ XI

ກົມຈັດຕັ້ງ ແລະ ພະນັກງານກະຊວງຍຸຕິທຳ ໄດ້ຈັດກອງປະຊຸມປາຖະກະຖາຫວນຄືນມູນເຊື້ອວັນຊາດທີ 2 ທັນວາ ຄົບຮອບ 48 ປີ(2 ທັນວາ 1975-2 ທັນວາ 2023 ) ແລະ ວັນເກີດປະທານໄກສອນ ພົມວິຫານ ຄົບຮອບ 103 ປີ(13 ທັນວາ 1920-13 ທັນວາ 2023) ແລະ ເຊື່ອມຊຶມຜັນຂະຫຍາຍມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ XIຂຶ້ນໃນວັນທີ 8ທັນວານີ້ ທີ່ກະຊວງດັ່ງກ່າວ ພາຍໃຕ້ການເປັນປະທານ ແລະ ໃຫ້ກຽດເຜີຍແຜ່ຂອງທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ແລະ ທ່ານ ບຸນທາ ຊົງເຢີທ່າວ ຮອງລັດຖະມົນຕີກະຊວງຍຸຕິທຳ, ມີຄະນະບໍລິຫານງານພັກ, ເລຂາຄະນະພັກຮາກຖານ, ຄະນະໜ່ວຍພັກ, ເລຂາໜ່ວຍພັກ, ສະມາຊິກພັກ, ພະນັກງານ-ລັດຖະກອນເຂົ້າຮ່ວມ.
ທ່ານ ໄພວີ ສີບົວລິພາ ໄດ້ຍົກໃຫ້ເຫັນມູນເຊື້ອຄວາມໝາຍສຳຄັນຂອງ 2 ວັນປະຫວັດສາດວັນຊາດທີ 2 ທັນວາ ຄົບຮອບ 48 ປີ ແລະ ວັນຄ້າຍວັນເກີດຂອງທ່ານປະທານໄກສອນ ພົມວິຫານ ຄົບຮອບ 103 ປີ.ຈາກນັ້ນ, ທ່ານ ບຸນທາ ຊົງເຢີທ່າວ ໄດ້ໃຫ້ກຽດເຊື່ອມຊຶມມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ XI.
 ການປາຖະກະຖາຫວນຄືນມູນເຊື້ອ 2 ວັນປະຫວັດສາດ ແລະ ເຊື່ອມຊຶມຜັນຂະຫຍາຍເອກະສານໃນຄັ້ງນີ້ເປົ້າໝາຍເພື່ອເປັນການຫວນຄືນສ້າງຄວາມຮັບຮູ້ ແລະ ເຂົ້າໃຈເຖິງມູນເຊື້ອການຕໍ່ສູ້ອັນພິລະອາດຫານລະອິດລະອ້ຽວຂອງພັກ, ຂອງປະຊາຊົນລາວ ສາມາດປົດປ່ອຍໂຕເອງອອກຈາກແອກປົກຄອງຂອງພວກລ່າເມືອງຂຶ້ນແບບເກົ່າ, ທັງເປັນການສຶກສາອົບຮົມພະນັກງານ, ສະມາຊິກພັກ, ຍົກສູງນໍ້າໃຈຮັກຊາດຢ່າງດູດດື່ມ. ເພື່ອລະນຶກເຖິງຄຸນງາມຄວາມດີຂອງປະທານໄກສອນ ພົມວິຫານ ທີ່ມີຕໍ່ປະເທດຊາດ ແລະ ຮໍ່າຮຽນເອົາຄຸນສົມບັດ, ສິນທຳປະຕິວັດແບບຢ່າງອັນດີຂອງເພີ່ນເພື່ອມາພັດທະນາຕົນເອງໃຫ້ກາຍເປັນພະນັກງານ, ສະມາຊິກພັກທີ່ດີ ເພື່ອສືບທອດພາລະກິດຂອງພັກ, ຂອງຊາດ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດເພື່ອໃຫ້ພະນັກງານ-ລັດຖະກອນໄດ້ຮັບຮູ້ເຊື່ອມຊຶມ ແລະ ນໍາເອົາເນື້ອໃນຈິດໃຈກອງປະຊຸມຄັ້ງນີ້ໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງຢ່າງມີປະສິດທິຜົນສູງ.
ຂ່າວ-ພາບ: ພູວັນ