ກະຊວງຍຸຕິທຳ ສໍາມະນາວຽກງານຈັດຕັ້ງ ແລະ ພະນັກງານຢູ່ແຂວງ ບໍລິຄຳໄຊ

ວິທະຍາກອນຈາກຄະນະຈັດຕັ້ງສູນກາງພັກ ຂຶ້ນບັນຍາຍຫຼາຍຫົວຂໍ້ທີ່ກ່ຽວພັນກັບວຽກງານພັກ-ພະນັກງານ ເປັນຕົ້ນແມ່ນ ທັດສະນະຂອງພັກຕໍ່ພະນັກງານ ແລະ ວຽກພະນັກງານ, ວຽກງານຄຸ້ມຄອງພະນັກງານ, ວຽກງານສ້າງແຜນກຳນົດພະນັກງານ-ຄຸ້ມຄອງ, ການສ້າງແຜນກໍ່ສ້າງ-ບຳລຸງພະນັກງານ-ຄຸ້ມຄອງ, ການສ້າງມາດຕະຖານພະນັກງານ, ການຄົ້ນຄວ້າ-ສັງລວມວຽກງານຈັດຕັ້ງ, ການບັນຈຸ ຊັບຊ້ອນ ແລະ ການຍົກຍ້າຍພະນັກງານລັດຖະກອນ, ວຽກງານການຂຽນກຳນົດຈຳແໜ່ງງານ, ວຽກງານນະໂຍບາຍ ແລະ ການປະເມີນຜົນການຈັດຕັ້ງປະຕິບັດໜ້າທີ່ວຽກງານຂອງພະນັກງານ-ລັດຖະກອນ, “ພະນັກງານ ແມ່ນພົນລະເມືອງລາວຜູ້ຖືກຮັບບັນຈຸໃຫ້ເຮັດວຽກ, ເລືອກຕັ້ງ ຫຼື ແຕ່ງຕັ້ງໃຫ້ດຳລົງຕຳແໜ່ງໃດໜຶ່ງໃນອົງການຈັດຕັ້ງພັກ, ລັດ, ແນວລາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງ ແລະ ທ້ອງຖີ່ນ ຫຼື ໄປປະຈຳການຢູ່ສຳນັກງານຜູ້ຕາງໜ້າ ສາທາລະນະລັດ ປະຊາທິປະໄຕ ປະຊາຊົນລາວ ຢູ່ຕ່າງປະເທດ ແລະ ອົງການຈັດຕັ້ງສາກົນ ຊຶ່ງໄດ້ຮັບເງິນເດືອນ ແລະ ເງິນອຸດໜູນຈາກງົບປະມານແຫ່ງລັດ".

ມາດຕະຖານພະນັກງານ ແມ່ນປັດໄຈໜຶ່ງ ທີ່ພະນັກງານແຕ່ລະຄົນຕ້ອງຝຶກຝົນຫຼໍ່ຫຼອມໃຫ້ໄດ້ຢ່າງຄົບຖ້ວນ ຊຶ່ງປະກອບດ້ວຍ: ດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ແບບແຜນການດໍາລົງຊີວິດ, ດ້ານຄວາມຮູ້-ຄວາມສາມາດ, ແບບແຜນການນໍາພາ-ວິທີເຮັດວຽກ ແລະ ດ້ານສຸຂະພາບ. “ການສ້າງແຜນກໍ່ສ້າງ-ບຳລຸງພະນັກງານ ນໍາພາ-ຄຸ້ມຄອງ ແມ່ນການເລືອກເຟັ້ນເອົາພະນັກງານໃນແຜນກຳນົດພະນັກງານໄປກໍ່ສ້າງ-ບຳລຸງຍົກລະດັບຄວາມຮູ້ ຄວາມສາມາດໃຫ້ໄດ້ຕາມມາດຕະຖານຂອງພະນັກງານນໍາພາ-ຄຸ້ມຄອງ; ການສ້າງແຜນກໍ່ສ້າງ-ບຳລຸງພະນັກງານນໍາພາ-ຄຸ້ມຄອງ ເປັນວຽກໜຶ່ງທີ່ສໍາຄັນຂອງວຽກງານພະນັກງານ, ຮັບປະກັນໃຫ້ການກໍ່ສ້າງ-ບຳລຸງພະນັກງານໄປຕາມຫຼັກການ, ຕອບສະໜອງພະນັກງານທີ່ຄົບມາດຕະຖານເຂົ້າໃນໂຄງປະກອບແຕ່ລະຕຳແໜ່ງງານ,” ສຳລັບວຽກງານຄົ້ນຄ້ວາ-ສັງລວມມີຄວາມໝາຍສໍາຄັນເພາະເປັນວຽກງານເສນາທິການທາງດ້ານເນື້ອໃນຊ່ວຍຄະນະພັກ, ຄະນະປະຈຳພັກກໍຄືອົງການປົກຄອງໃນແຕ່ລະຂັ້ນ, ກ່ຽວກັບການວາງແຜນ, ສະຫຼຸບສັງລວມ, ສະເໜີແນະກ່ຽວກັບວິທີການ, ມາດຕະການທີ່ສໍາຄັນ, ເພື່ອໃຫ້ການນໍາຕົກລົງຕັດສິນບັນຫາໄດ້ຢ່າງຖືກຕ້ອງ ແລະ ຊັດເຈນ. ນອກຈາກຮັບຟັງການບັນຍາຍຂອງວີທະຍາກອນແລ້ວ, ທຸກໆຫົວຂໍ້ສໍາມະນາກອນຍັງໄດ້ຍົກຫຼາຍບັນຫາມາແລກປ່ຽນບົດຮຽນໂດຍອິງໃສ່ພຶດຕິກຳຕົວຈິງ. ບັ້ນຊຸດອົບຮົມຄັ້ງນີ້, ຈະໄດ້ດຳເນີນ 5 ວັນຈິ່ງຈະສຳເລັດ.

ຂ່າວ-ພາບ: ສາຍສະໝອນ