ກະຊວງພາຍໃນສໍາມະນາວິຊາການຂອງຂະແໜງການພາຍໃນ

ກະຊວງພາຍໃນ ໄດ້ຈັດກອງປະຊຸມສຳມະນາວິຊາການຂອງຂະແໜງການພາຍໃນຂຶ້ນໃນວັນທີ 13 ກຸມພານີ້ ໂດຍການເປັນປະທານຂອງທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ, ມີບັນດາຮອງລັດຖະມົນຕີກະຊວງພາຍໃນ, ຫົວໜ້າ-ຮອງຫົວໜ້າກົມຈັດຕັ້ງ ແລະ ພະນັກງານ ຂອງບັນດາກະຊວງ, ອົງການອ້ອມຂ້າງສູນກາງ ພ້ອມດ້ວຍພະນັກງານ ກະຊວງພາຍໃນເຂົ້າຮ່ວມ.
ທ່ານ ທອງຈັນ ມະນີໄຊໄດ້ກ່າວວ່າ: ກະຊວງພາຍໃນ ເປັນອົງການຈັດຕັ້ງໜຶ່ງໃນໂຄງປະກອບກົງ ຈັກຂອງລັດຖະບານ, ມີພາລະບົດບາດເປັນເສນາທິການໃຫ້ແກ່ລັດຖະບານໃນການຄຸ້ມຄອງມະຫາພາກ ໃນວຽກງານການປົກຄອງ, ການບໍລິຫານລັດ, ການຄຸ້ມຄອງລັດຖະກອນ, ການຄຸ້ມຄອງອົງການຈັດຕັ້ງທາງສັງຄົມລາວ, ວຽກງານສາມສ້າງ, ວຽກງານສໍາຫຼວດວັດແທກ ແລະ ແຜນທີ່, ວຽກງານເອກະສານ, ວຽກງານຊົນເຜົ່າ ແລະ ສາສະໜາ, ວຽກງານຄຸ້ມຄອງພົນລະເມືອງ, ວຽກງານແຂ່ງຂັນ ແລະ ຍ້ອງຍໍ, ວຽກງານການຫັນຫົວໜ່ວຍວິຊາການເປັນເຈົ້າຕົນເອງທາງດ້ານການເງິນ ແລະ ພາລະກອນ. ໄລຍະຜ່ານມາ ກະຊວງພາຍໃນ ໄດ້ມີຄວາມເອົາໃຈໃສ່ ຢ່າງຕັ້ງໜ້າ ໃນການຈັດຕັ້ງປະຕິບັດວຽກງານຕາມພາລະບົດບາດ, ສິດ ແລະ ໜ້າທີ່ ຂອງຕົນ ຕາມການມອບໝາຍ ຂອງສູນກາງພັກ ກໍຄືລັດຖະບານ ໃນການຈັດຕັັ້ງປະຕິບັດບັນດາວຽກງານ ຂອງຂະແໜງການພາຍໃນ ຕາມມະຕິ, ຄໍາສັ່ງ, ແຜນການ, ແຜນງານ, ໂຄງການທີ່ວາງອອກໃນແຕ່ລະໄລຍະຊຶ່ງມີທັງຜົນສໍາເລັດດ້ານດີ ແລະ ຍັງມີຂໍ້ຄົງຄ້າງ  ແລະ ສິ່ງທ້າທາຍ ຫຼາຍປະການໃນການຈັດຕັ້ງປະຕິບັດວຽກງານ ຂອງຂະແໜງການພາຍໃນ ເປັນຕົ້ນແມ່ນ: ວຽກງານການປົກຄອງທ້ອງຖິ່ນ, ວຽກງານພັດທະນາການບໍລິຫານລັດ, ວຽກງານຄຸ້ມຄອງລັດຖະກອນ ແລະ ບັນຫາອື່ນໆອີກ ທີ່ຈະຕ້ອງໄດ້ມີການຄົ້ນຄວ້າ, ປຶກສາຫາລື ຮ່ວມກັນ ລະຫວ່າງ ສູນກາງ ກັບທ້ອງຖິ່ນ ແລະ ກັບບັນດາກະຊວງ-ອົງການ ເພື່ອຊອກຫາວິທີແກ້ໄຂບັນດາຂໍ້ຄົງຄ້າງ ຫຼື ສິ່ງທີ່ອຸດຕັນຕ່າງໆ ຢ່າງເປັນເອກະພາບ.
ກອງປະຊຸມ, ໄດ້ຮັບຟັງການລາຍງານຜົນການຈັດຕັ້ງປະຕິບັດວຽກງານວິຊາສະເພາະຂອງຂະແໜງການພາຍໃນ ໄລຍະ 1ປີຜ່ານມາ ຈາກ ທ່ານນາງ ລີວົງ ລາວລີ ຮອງລັດຖະມົນຕີກະຊວງພາຍໃນ ຊຶ່ງທ່ານໄດ້ຍົກໃຫ້ເຫັນໄລຍະໜຶ່ງປີຜ່ານມາສາມາດສະຫຼຸບ-ສັງລວມ ຜົນສຳເລັດດ້ານວຽກງານວິຊາສະເພາະໃນແຕ່ລະຂົງເຂດວຽກງານເປັນຕົ້ນແມ່ນ: ຂົງເຂດການປົກຄອງ, ຂົງເຂດລັດຖະກອນ ແລະ ຂົງເຂດເຕັກນິກການປົກຄອງຊຶ່ງມີວຽກງານທີ່ພົ້ນເດັ່ນ ຄື: ວຽກງານປັບປຸງກົງຈັກການຈັດຕັ້ງໄດ້ສໍາເລັດການຄົ້ນຄວ້າ ແລະ ສະເໜີນາຍົກລັດຖະມົນຕີ ພິຈາລະນາອະນຸມັດດໍາລັດວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງອົງການບໍລິຫານແຫ່ງລັດ ຈໍານວນ 8 ພາກສ່ວນ; ວຽກງານກໍານົດຕໍາແໜ່ງງານເຜີຍແຜ່ຄໍາແນະນໍາກ່ຽວກັບການກໍານົດຕໍາແໜ່ງງານ ແລະ ແຈ້ງການກ່ຽວກັບການແບ່ງຄວາມຮັບຜິດຊອບວຽກງານກໍານົດຕໍາແໜ່ງງານໃຫ້ບັນດາກະຊວງ, ອົງການຂັ້ນສູນກາງ ແລະ ອົງການປົກຄອງທ້ອງຖິ່ນຮັບຜິດຊອບໂດຍກົງ,ໄດ້ປັບປຸງ ແລະ ຮັບຮອງຕໍາແໜ່ງງານ 307 ຫົວໜ່ວຍ ເທົ່າກັບ 438,57%  ຂອງແຜນການປີ (ແຜນການ 2023 ແມ່ນ 70 ຫົວໜ່ວຍ);ວຽກງານຄຸ້ມຄອງພົນລະເມືອງໄດ້ຈົດທະບຽນ ແລະ ອອກໃບຢັ້ງຢືນການປ່ຽນສັນຊາດ ຈໍານວນ 4.761 ຄົນຍິງ 2.765 ຄົນ, ພົນລະເມືອງກິດຕິມະສັກ 3 ຄົນ; ໄດ້ປ້ອນຂໍ້ມູນເຂົ້າໃນລະບົບ ແລະ ອອກໃບຢັ້ງຢືນການເກີດ ແລະ ການເສຍຊີວິດ ໃຫ້ພົນລະເມືອງ ລວມຈໍານວນ 5.936 ຄົນ ແລະ ໄດ້ເຊື່ອມຕໍ່ລະບົບຂໍ້ມູນພົນລະເມືອງກັບກະຊວງການຕ່າງປະເທດ,ກະຊວງສຶກສາທິການ ແລະ ກິລາ; ວຽກງານການເກັບກໍາສະຖິຕິພົນລະເມືອງສັງລວມປະຈໍາປີ2023-ປັດຈຸບັນມີພົນລະເມືອງລາວ 7.257.020ຄົນຍິງ 3.617.802 ຄົນ ແລະ ໄດ້ຈົດທະບຽນ ແລະ ອອກໃບຢັ້ງຢືນການເກີດ 62.057 ຄົນຍິງ 30.869 ຄົນ; ການແຕ່ງດອງ 11.274 ຄູ່; ການຢ່າຮ້າງ 2.885 ຄູ່; ການປ່ຽນຊື່ 5.160 ຄົນຍິງ 2.650 ຄົນ, ການປ່ຽນນາມສະກຸນ 7.979 ຄົນຍິງ 4.338 ຄົນ; ການປ່ຽນສັນຊາດ ຈໍານວນ 4.761 ຄົນຍິງ 2.765 ຄົນ, ໃນນີ້ ໃຫ້ນາມມະຍົດພົນລະເມືອງກິດຕິມະສັກ 3 ທ່ານ (ສະວິສແລນ, ສປ ຈີນ ແລະ ສເກົາຫຼີ); ການເສຍຊີວິດ 13.362 ຍິງ 5.532 ຄົນ. ການຍົກຍ້າຍຂອງພົນລະເມືອງ 12.712 ຄົນຍິງ 6.215 ຄົນ ແລະ ວຽກງານອື່ນໆ.  ຈາກນັ້ນ,ທ່ານ ສຸລິວັນ ອ່ອນຕາວົງ ຫົວໜ້າກົມພັດທະນາການບໍລິຫານລັດ ກະຊວງພາຍໃນໄດ້ຜ່ານບົດສະຫຼຸບວຽກງານປະຕູດຽວຕໍ່ກອງປະຊຸມວ່າ: ການຈັດຕັ້ງປະຕິບັດວຽກງານບໍລິການຜ່ານກົນໄກປະຕູດຽວ  ແມ່ນໄດ້ລິເລີ່ມຈັດຕັ້ງປະຕິບັດມາແຕ່ ປີ 2006 ໂດຍທົດລອງຢູ່ເມືອງໄຊເສດຖານະຄອນຫຼວງວຽງຈັນ.ພາຍຫຼັງການສະຫຼຸບຖອດຖອນບົດຮຽນຢູ່ເມືອງໄຊເສດຖາເຫັນວ່າມີຜົນສຳເລັດເປັນຢ່າງດີ. ດັ່ງນັ້ນ, ນາຍົກລັດຖະມົນຕີຈຶ່ງໄດ້ອອກຂໍ້ຕົກລົງສະບັບເລກທີ 86/ນຍ, ລົງວັນທີ 3 ສິງຫາ 2007 ວ່າດ້ວຍການຈັດຕັ້ງປະຕິບັດກົນໄກການບໍລິການຜ່ານປະຕູດຽວ ຢູ່ອົງການບໍລິຫານລັດ. ມາຮອດປັດຈຸບັນ ມີສູນບໍລິການຜ່ານປະຕູດຽວທັງໝົດ 58 ແຫ່ງ, ໃນນີ້ ຂັ້ນແຂວງ 20 ແຫ່ງ ແລະ ຂັ້ນເມືອງ 38 ແຫ່ງ ສາມາດປະຕິບັດໄດ້ລື່ນຄາດໝາຍສູ້ຊົນຂອງວາລະແຫ່ງຊາດ 2021-2023 ໃຫ້ສູນບໍລິການຜ່ານປະຕູດຽວເພີ່ມຂຶ້ນ 9 ແຫ່ງ, ສະເລ່ຍ 3 ແຫ່ງຕໍ່ປີ, ໃນຕົວຈິງປະຕິບັດໄດ້ 14 ແຫ່ງ ແລະ ໃນຄາດໝາຍສູ້ຊົນຕໍ່ໜ້າ ຈະຂະຫຍາຍການສ້າງຕັ້ງ ແລະ ປັບປຸງສູນການບໍລິການຜ່ານປະຕູດຽວ ເປັນຕົ້ນ ຄົ້ນຄວ້າສ້າງ ແລະ ອອກແບບ (ອາຄານ) ສະຖານທີ່ຕັ້ງສູນບໍລິການຜ່ານປະຕູດຽວ ທີ່ເປັນເອກະລັກ ແລະ ເອກະພາບທົ່ວປະເທດ ແລະ ຂະຫຍາຍສູນບໍລິການຜ່ານປະຕູດຽວໃຫ້ໄດ້ຢ່າງໜ້ອຍ 7 ສູນຕໍ່ປີ.
ໃນກອງປະຊຸມ, ກໍໄດ້ມີການສົນທະນາ-ແລກປ່ຽນກ່ຽວກັບການຈັດຕັ້ງປະຕິບັດວຽກງານຕົວຈິງ ຢູ່ໃນບັນດາກະຊວງ-ອົງການ ຂັ້ນສູນກາງ ແລະ ທ້ອງຖິ່ນ ເພື່ອຊອກເຫັນບັນດາບັນຫາຕ່າງໆ ທີ່ບໍ່ທັນໂລ່ງລ່ຽນ ແລະ ພ້ອມກັນຊອກຫາວິທີແກ້ໄຂທີ່ເໝາະສົມ ເພື່ອໃຫ້ບັນດາກະຊວງ-ອົງການຂັ້ນສູນກາງ ແລະ ຂະແໜງການພາຍໃນຂັ້ນທ້ອງຖິ່ນໄດ້ພ້ອມກັນຈັດຕັ້ງປະຕິບັດໃຫ້ມີຄວາມເປັນເອກະພາບສາມາດບັນລຸຄາດໝາຍທີ່ກຳນົດໄວ້.
(ຂ່າວ: ກະຊວງພາຍໃນ; ພາບ: ແສງຈັນ)