ກະຊວງຜທຊີ້ແຈງຈະປະສານພາກສ່ວນກ່ຽວຂ້ອງດຳເນີນໃຫ້ຖືກລະບຽບກົດໝາຍ

ທ່ານ ຄໍາເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ (ຜທ) ໄດ້ຂຶ້ນຊີ້ແຈງຕໍ່ຄຳຖາມເຈາະຈີ້ມຂອງສະພາແຫ່ງຊາດ ຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ໃນວັນທີ 8 ພະຈິກນີ້ ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ. ໂອກາດນີ້, ກໍໄດ້ຊີ້ແຈງຫຼາຍຄໍາຖາມ ຊຶ່ງໃນນີ້ໄດ້ຊີ້ແຈງວ່າ: ຕາມຜົນການກວດສອບປະຈໍາປີ 2023 ຂອງອົງການກວດສອບແຫ່ງລັດ ທີ່ໄດ້ລາຍງານຕໍ່ກອງປະຊຸມຄັ້ງນີ້ ໄດ້ກວດສອບເຫັນຫຼາຍບັນຫາ ຕິດພັນກັບກະຊວງ ຜທ ຊຶ່ງກະຊວງເອງ ກໍໄດ້ມີທິດທາງແກ້ໄຂ ໂດຍຈະປະສານກັບພາກສ່ວນກ່ຽວຂ້ອງ ເພື່ອດຳເນີນການໃຫ້ຖືກລະບຽບກົດໝາຍ.
    ຕາມຜົນການກວດສອບປະຈໍາປີ 2023 ຂອງອົງການກວດສອບແຫ່ງລັດ ທີ່ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ໃນວັນທີ 7 ພະຈິກຜ່ານມາ ໄດ້ກວດສອບເຫັນຫຼາຍບັນຫາ ຕິດພັນກັບກະຊວງ ຜທ; ພ້ອມນັ້ນ, ອົງການກວດສອບແຫ່ງລັດ ກໍໄດ້ສະເໜີ 3 ມາດຕະການ ຕໍ່ການປັບປຸງແກ້ໄຂ ຜົນການກວດສອບຄື: ມາດຕະການທາງດ້ານເສດຖະກິດ, ມາດຕະການການປັບປຸງ ແລະ ແກ້ໄຂທາງດ້ານນິຕິກໍາ, ມາດຕະການດ້ານຄວາມຮັບຜິດຊອບແຕ່ລະຂັ້ນ.  ໃນນີ້, ກະຊວງ ຜທ ເອງກໍຈະມີທິດທາງແກ້ໄຂ ໂດຍຈະສືບຕໍ່ປະສານສົມທົບກັບ ກະຊວງພະລັງງານ ແລະ ບໍ່ແຮ່ ແລະ ກະຊວງກ່ຽວຂ້ອງ ເພື່ອດຳເນີນການປະເມີນຄືນບັນດາໂຄງການບໍ່ແຮ່ໃນທົ່ວປະເທດໃຫ້ສຳເລັດ ແລະ ຕີລາຄາຈັດປະເພດ ແລະ ແກ້ໄຂໂຄງການທີ່ບໍ່ປະຕິບັດຕາມລະບຽບກົດໝາຍ ແລະ ສັນຍາ ທີ່ໄດ້ຮັບອະນຸຍາດຜ່ານມາ ຊຶ່ງຕາມແຜນການເຄື່ອນໄຫວຂອງຄະນະ19/ກມສພ ແມ່ນມີໜ້າວຽກນີ້ແລ້ວ; ພ້ອມນັ້ນ, ກໍຈະສືບຕໍ່ປັບປຸງກົດໝາຍສົ່ງເສີມການລົງທຶນ ເພື່ອປັບປຸງບັນດາຂອດຂັ້ນ ແລະ ກົນໄກອະນຸມັດການລົງທຶນ ເພື່ອສະເໜີຕໍ່ກອງປະຊຸມສະໄໝສາມັນຂອງສະພາແຫ່ງຊາດຄັ້ງຕໍ່ໄປ.
    ສໍາລັບການກວດກາຄືນບັນດາໂຄງການນອກແຜນ ຈໍານວນ 37 ໂຄງການ, ມູນຄ່າ 1.244,71 ຕື້ກີບ ບໍ່ມີບົດສະເໜີໂຄງການ, ບົດສຶກສາຄວາມເປັນໄປໄດ້, ບົດວິພາກເສດຖະກິດເຕັກນິກ, ບົດລາຍງານການສໍາຫຼວດ-ອອກແບບ, ໃບຢັ້ງຢຶນແບບ ແລະ ມູນຄ່າໂຄງການ, ບົດສຶກສາຜົນກະທົບຕໍ່ສິ່ງແວດລ້ອມບໍ່ໄດ້ດໍາເນີນການປະເມີນ ແລະ ບໍ່ໄດ້ດໍາເນີນຂັ້ນຕອນການປະມູນຕາມລະບຽບການ ແລະ ຕໍ່ກັບ 2 ພາກສ່ວນທີ່ຈະຕ້ອງໄດ້ຫັກລົບມູນຄ່າໜ້າວຽກທີ່ບໍ່ໄດ້ຈັດຕັ້ງປະຕິບັດ ຈໍານວນ 2 ໂຄງການ, ມູນຄ່າ 9,58 ຕື້ກີບ ອອກຈາກມູນຄ່າໂຄງການ ຊຶ່ງກະຊວງແຜນການ ແລະ ການລົງທຶນ ຍັງບໍ່ທັນມີຂໍ້ມູນລະອຽດຂອງໂຄງການເທື່ອ. ສະນັ້ນ, ຈະໄດ້ສືບຕໍ່ປະສານສົມທົບກັບອົງການກວດສອບແຫ່ງລັດ ເພື່ອເອົາຂໍ້ມູນລະອຽດ ແລະ ດຳເນີນການປະສານພາກສ່ວນກ່ຽວຂ້ອງ ຫຼື ທ້ອງຖິ່ນ ດຳເນີນການໃຫ້ຖືກລະບຽບກົດໝາຍ. ໃນກໍລະນີກ່ຽວພັນກັບບຸກຄະລາກອນ, ກໍຈະມີການຄົ້ນຄ້ວາປະຕິບັດລະບຽບວິໄນ ທີ່ກຳນົດໄວ້ ແລະ ຈະລາຍງານຜົນການເຮັດວຽກ ຕໍ່ອົງການກວດສອບແຫ່ງລັດໃນສົກປີ 2024 ຕໍໍ່ໄປ.
(ຂ່າວ-ພາບ: ສຸກສະຫວັນ)