ແກ່ນທ້າວ ປະຖະກະຖາວັນແມ່ຍິງສາກົນ 

ເມືອງແກ່ນທ້າວ ແຂວງໄຊຍະບູລີ ໄດ້ຈັດພິທີ ປາຖະກະຖາວັນແມ່ຍິງສາກົນ ຄົບຮອບ 114 ປີ (8 ມີນາ 1910-8 ມີນາ 2024) ຂຶ້ນໃນວັນທີ 6 ມີນານີ້, ຢູ່ທີ່ສະໂມສອນຫ້ອງວ່າການເມືອງ. ໂດຍການເຂົ້າຮ່ວມຂອງທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ, ມີແຂກຖືກເຊີນ ແລະ ພາກສ່ວນກ່ຽວຂ້ອງອ້ອມຂ້າງເມືອງເຂົ້າຮ່ວມ.
ໃນພິທີ ຜູ້ເຂົ້າຮ່ວມໄດ້ຮັບຊົມການສະແດງ ສິລະປະ-ວັນນະຄະດີ ຂອງນັກຮຽນໂຮງຮຽນປະຖົມໂພນສະຫວ່າງ ແລະ ໂຮງຮຽນນະພັດສອນ. ຈາກນັ້ນ, ທ່ານ ເຈົ້າເມືອງແກ່ນທ້າວ ໄດ້ປະຖາກະຖາວັນສໍາຄັນດັ່ງກ່າວ,ໂດຍຍົກໃຫ້ເຫັນວ່າ: ວັນທີ 8 ມີນາ ແມ່ນເຫດການ-ການເມືອງທີ່ສຳຄັນ, ເປັນຂີດໝາຍແຫ່ງໄຊຊະນະອັນພື້ນຖານຂອງຂະບວນການແມ່ຍິງສາກົນໃນການຕໍ່ສູ້ທວງເອົາສິດຜົນປະໂຫຍດອັນເປັນທໍາໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ, ເປັນວັນລະນຶກເຖິງການຕໍ່ສູ້ຂອງແມ່ຍິງເພື່ອປົດປ່ອຍຕົນເອງ ແລະ ທວງໃຫ້ມີສິດສະເໝີພາບປະຊາທິປະໄຕຄືກັນກັບຜູ້ຊາຍ, ທວງໃຫ້ພວກນາຍທຶນແກ້ໄຂຊີວິດການເປັນຢູ່ພາຍໃຕ້ຄຳຂວັນ:ຜູ້ໜຶ່ງເຮັດວຽກມື້ລະ 8 ຊົ່ວໂມງ, ແມ່ຍິງ ແລະຜູ້ຊາຍເຮັດວຽກຄືກັນຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບອບປ້ອງກັນສຸຂະພາບຂອງແມ່ຍິງ ແລະ ເດັກນ້ອຍ, ຕ້ານສົງຄາມຮຸກຮານ, ປົກປັກຮັກສາສັນຕິພາບຂອງໂລກ. ໃນວັນທີ 19/03/1911 ວັນແມ່ຍິງສາກົນໄດ້ຮັບການສະເຫຼີມສະຫຼອງ ໂດຍມີປະຊາຊົນເຂົ້າຮ່ວມເປັນລ້ານໆຄົນ ຢູ່ໃນບັນດາປະເທດເອີລົບເຊັ່ນ: ປະເທດ ໂອຕິດ, ແດນມາກ, ເຢຍລະມັນ, ສະວິດເຊີແລນ.  ນັບແຕ່ນັ້ນມາວັນທີ 8 ມີນາຈຶ່ງເປັນວັນແມ່ຍິງສາກົນ.
ໃນພິທີຄັ້ງນີ້, ຍັງໄດ້ມອບໃບສົມມະນາບຸນຄຸນຂອງແຂວງ ໃຫ້ເມືອງ ທີ່ມີຜົນງານດີເດັ່ນໃນການປະກອບສ່ວນທາງດ້ານສະຕິເຫື່ອແຮງ ເຂົ້າໃນງານມະຫາກໍາບຸນຊ້າງ ແລະ ເປີດປີທ່ອງທ່ຽວລາວ ແຂວງໄຊຍະບູລີ ປະຈໍາປີ 2024 ແລະ ໃບຍ້ອງຍໍ ໃຫ້ ນາງ ສຸດທິດາ ກອງຊັບ ແລະ ນາງ ຍຸພາກອນ ປັນຍາສີ ທີ່ມີຜົນງານດີເດັ່ນໃນການເຂົ້າຮ່ວມປະກວດນາງສາວງາມ ໃນງານມະຫາກໍາບຸນຊ້າງ ປີ 2024. ເປັນກຽດມອບໂດຍທ່ານ ເຈົ້າເມືອງແກ່ນທ້າວ.
(ຂ່າວ: ແກ່ນທ້າວ).