ຂະບວນລົດໄຟຂົນສົ່ງສິນຄ້າ ລະຫວ່າງ ຊຽງໄຮ້-ຢູນນານ - ແມ່ນໍ້າລ້ານຊ້າງ - ແມ່ນໍ້າຂອງ ໄດ້ເປີດນໍາໃຊ້ຢ່າງເປັນທາງການ

ວັນທີ 8 ຕຸລາຜ່ານມາ, ພິທີເປີດນໍາໃຊ້ຂະບວນລົດໄຟຂົນສົ່ງສິນຄ້າສາກົນ ລະຫວ່າງ ນະຄອນຊຽງໄຮ້-ຢຸນນານ-ແມ່ນໍ້າລ້ານຊ້າງ-ແມ່ນໍ້າຂອງ ຖ້ຽວທໍາອິດໄດ້ຈັດຂຶ້ນທີ່ນະຄອນຄຸນໝິງ. ໄປຄຽງຄູ່ກັບຄໍາສັ່ງການອອກລົດ, ຂະບວນລົດໄຟທີ່ຂົນສົ່ງໝາກໄມ້, ຢາງພາລາ, ນໍ້າຕານຂາວ, ຊີລີຄອນໂລຫະ ແລະ ຜະລິດຕະພັນທີ່ມາຈາກປະເທດລາວ ແລະ ປະເທດອາຊີຕາເວັນອອກສ່ຽງໃຕ້ ໄດ້ບີບສຽງແກ ແລະ ຄ່ອຍໆເດີນທາງອອກຈາກສະຖານີ, ຫຼັງຈາກນັ້ນ 82 ຊົ່ວໂມງ, ຂະບວນລົດໄຟເດີນທາງໄປຮອດນະຄອນຊຽງໄຮ້.
ຂະບວນລົດໄຟຂົນສົ່ງສິນຄ້າສາກົນ ລະຫວ່າງ ຊຽງໄຮ້-ຢູນນານ-ແມ່ນໍ້າລ້ານຊ້າງ-ແມ່ນໍ້າຂອງ ແມ່ນຂະບວນລົດໄຟຂົນສົ່ງສິນຄ້າສາກົນສາຍທຳອິດທີ່ແຂວງຢູນນານ ແລະ ນະຄອນຊຽງໄຮ້ ຮ່ວມກັນເປີດນໍາໃຊ້. ການເປີດນໍາໃຊ້ຂະບວນລົດໄຟດັ່ງກ່າວເປັນການປະຕິບັດອັນຕັ້ງໜ້າສຳລັບນະຄອນຊຽງໄຮ້ ແລະ ແຂວງຢູນນານ ໃນການເສີມຂະຫຍາຍທ່າແຮງຂອງຊ່ອງທາງການຂົນສົ່ງທີ່ດີຕາມທາງລົດໄຟລາວ-ຈີນ, ຕັ້ງໜ້າຕອບສະໜອງຕາມຄວາມຮຽກຮ້ອງຂອງຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ພ້ອມທັງຊຸກຍູ້ການກໍ່ສ້າງທາງຂົນສົ່ງໃຫຍ່ທາງບົກ ແລະ ທາງທະເລທີ່ອວ່າຍໜ້າໄປສູ່ພາກໃຕ້ມະຫາສະມຸດອິນເດຍ. ຂະບວນຂົນສົ່ງສິນຄ້າສາກົນ ລະຫວ່າງ ຊຽງໄຮ້-ຢູນນານ-ແມ່ນໍ້າລ້ານຊ້າງ-ແມ່ນໍ້າຂອງ ຈະເຊື່ອມຕໍ່ເຂດທີ່ລຽບຕາມເສັ້ນທາງດັ່ງກ່າວ ຊຶ່ງຈະນໍາເອົາໂອກາດການພັດທະນາໃໝ່ໃຫ້ແກ່ຈີນ, ລາວ ແລະ ບັນດາປະເທດອາຊຽນໃກ້ຄຽງ.
ຂະບວນລົດໄຟຂົນສົ່ງສິນຄ້າສາກົນ ລະຫວ່າງ ຊຽງໄຮ້-ຢູນນານ-ແມ່ນໍ້າລ້ານຊ້າງ-ແມ່ນໍ້າຂອງ ຂາກັບຖ້ຽວທຳອິດ (ສະຖານີນະຄອນຫຼວງວຽງຈັນໃຕ້-ສະຖານີຫວາງຈ່າຢິງ ພາກຕາເວັນຕົກນະຄອນຄຸນໝິງ-ສະຖານີນະຄອນຊຽງໄຮ້) ໄດ້ເດີນທາງອອກຈາກສະຖານີວຽງຈັນໃຕ້ໃນວັນທີ 6 ຕຸລາຜ່ານມາ, ຫຼັງຈາກເດີນທາງເປັນເວລາ 26 ຊົ່ວໂມງ, ຂະບວນລົດໄຟໄດ້ເດີນທາງມາຮອດສະຖານີຫວາງຈ່າຢີງພາກຕາເວັນຕົກນະຄອນຄຸນໝິງ. ໃນມື້ດຽວກັນ, ຂະບວນລົດໄຟຂົນສົ່ງສິນຄ້າສາກົນ ລະຫວ່າງ ຊຽງໄຮ້-ຢູນນານ-ແມ່ນໍ້າລ້ານຊ້າງ-ແມ່ນໍ້າຂອງ ຂາໄປຖ້ຽວທຳອິດ ໄດ້ເດີນທາງອອກຈາກສະຖານີຕູ້ຄອນເທນເນີທ່າໂຫຼສາວເຂດໃໝ່ຫຼີນກາງຂອງເຂດທົດລອງການຄ້າເສລີຊຽງໄຮ້, ລົດໄຟ 26 ຕູ້ທີ່ໄດ້ບັນທຸກຈັກຕັດຫຍ້າ, ເຄື່ອງພົ່ນຢາ, ຈັກຊັກເຄື່ອງ, ຕູ້ແຊ່ແຂງ ແລະ ຜະລິດຕະພັນອື່ນໆທີ່ຜະລິດຢູ່ເຂດສາມຫຼ່ຽມປາກແມ່ນໍ້າຢາງຊີກຽງ ໄດ້ອອກຈາກນະຄອນຊຽງໄຮ້. ຂະບວນລົດໄຟດັ່ງກ່າວແລ່ນຜ່ານນະຄອນຄຸນໝິງແຂວງຢູນນານແລ້ວເດີນທາງໄປເຖິງ ສະຖານີນະຄອນຫຼວງວຽງຈັນໃຕ້ ຂອງປະເທດລາວ, ມີໄລຍະທາງຍາວທັງໝົດ 3.756 ກິໂລແມັດ, ຄາດວ່າຈະໃຊ້ເວລາ 4 ຫາ 5 ມື້.
ພາຍຫຼັງໄດ້ເປີດນຳໃຊ້ຂະບວນຂົນສົ່ງສິນຄ້າສາກົນ ລະຫວ່າງ ຊຽງໄຮ້-ຢຸນນານ-ແມ່ນໍ້າລ້ານຊ້າງ-ແມ່ນໍ້າຂອງແລ້ວ, ຜະລິດຕະພັນທີ່ມາຈາກປະເທດລ້ອງແມ່ນໍ້າຂອງຈະສາມາດສົ່ງຕໍ່ໄປເຖິງພາກເໜືອ ເຊັ່ນ: ນະຄອນຄຸນໝິງ, ນະຄອນຊຽງໄຮ້, ແຂວງເຈີ້ຈ່ຽງ, ນະຄອນເສີງຕູ່, ນະຄອນຊົງຊິງ ແລະ ສູນຈໍລະຈອນສິນຄ້າອື່ນໆຂອງຈີນ, ໂດຍຜ່ານຕາໜ່າງລົດໄຟຂອງຈີນ ຈະຖືກຂົນສົ່ງໄປຕາມຂະບວນລົດໄຟຂົນສົ່ງສິນຄ້າຈີນ-ເອີຣົບໄປເຖິງຣັດເຊຍ, ເຢຍລະມັນ, ແອສປາຍ ແລະ ປະເທດອື່ນໆ.
ໃນຂະນະດຽວກັນນັ້ນ, ຜະລິດຕະພັນຂອງເອີຣົບກໍສາມາດສົ່ງອອກບັນດາປະເທດລ້ອງແມ່ນໍ້າຂອງ ລວມທັງມາເລເຊຍ, ສິງກະໂປ ແລະ ປະເທດອາຊີໃຕ້-ອາຊີຕາເວັນອອກສ່ຽງໃຕ້ທີ່ຢູ່ໃກ້ຄຽງໄດ້ຢ່າງສະດວກວ່ອງໄວໂດຍຜ່ານຂະບວນລົດໄຟຂົນສົ່ງສິນຄ້າ ຈີນ-ເອີຣົບ ແລະ ຂະບວນລົດໄຟຂົນສົ່ງສິນຄ້າສາກົນ ລະຫວ່າງ ຊຽງໄຮ້-ຢູນນານ-ແມ່ນໍ້າລ້ານຊ້າງ-ແມ່ນໍ້າຂອງ. ຕາມການຄິດໄລ່ຂອງທະນາຄານໂລກໃຫ້ຮູ້ວ່າ, ທາງລົດໄຟລາວ-ຈີນສາມາດເຮັດໃຫ້ຕົ້ນທຶນການຂົນສົ່ງສິນຄ້າຈາກນະຄອນຄຸນໝິງຫານະຄອນຫຼວງວຽງຈັນຫຼຸດລົງ 40% ຫາ 50%.
ແຫຼ່ງຂ່າວ: ໜັງສືພິມລາຍວັນຢູນນານ, ຫ້ອງການຖະແຫຼ່ງຂ່າວແຂວງຢູນນານ, ໜັງສືພິມຄໍ່າເມືອງລະດູບານໃໝ່