 |
ສະຫາຍ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ໄດ້ກ່າວໄຂກອງປະຊຸມວ່າ: ກອງປະຊຸມໃຫຍ່ ຜູ້ແທນອົງຄະນະພັກແຂວງຫຼວງພະບາງ ຄັ້ງທີ IX ໄດ້ໄຂຂຶ້ນໃນບັນຍາກາດແຫ່ງຄວາມເບີກບານມ່ວນຊື່ນ ຕໍ່ຜົນສໍາເລັດອັນສໍາຄັນ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ, ມະຕິກອງປະຊຸມໃຫຍ່ຄັ້ງທີ Xl ຂອງພັກ, ເຮັດໃຫ້ແຂວງຫຼວງພະບາງ ມີສະຖຽນລະພາບດ້ານການເມືອງອັນໜັກແໜ້ນ, ທົ່ວສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດມີການຂະຫຍາຍຕົວດ້ວຍຈັ່ງຫວະທີ່ດີ-ຖືກທິດ ແລະ ໝັ້ນທ່ຽງ, ມີການພັດທະນາທ່ວງທ່າໃໝ່ທີ່ຕັ້ງໜ້າ, ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການປັບປຸງບູລະນະ, ຍົກລະດັບດີຂຶ້ນເປັນກ້າວໆ, ປະຊາຊົນ ມີຄວາມສາມັກຄີເປັນປຶກແຜ່ນ, ລະບົບການເມືອງແຕ່ລະຂັ້ນໄດ້ຮັບການປັບປຸງ ແລະ ເຕີບໃຫຍ່ເຂັ້ມແຂງຂຶ້ນໃນຂະບວນການນຳພາວຽກງານ, ຖັນແຖວພະນັກງານ, ສະມາຊິກພັກໄດ້ຮັບການຍົກລະດັບ, ບຳລຸງສ້າງເປັນລະບົບ ເຮັດໃຫ້ແຂວງຫຼວງພະບາງ ສືບຕໍ່ກ້າວຂຶ້ນຕາມແນວທາງປ່ຽນແປງໃໝ່ ຢ່າງມີຫຼັກການຂອງພັກ.
ກອງປະຊຸມໃຫຍ່ຄັ້ງນີ້, ຈະໄດ້ສຸມໃສ່ພິຈາລະນາ-ຮັບຮອງເອົາຮ່າງລາຍງານການເມືອງ, ບົດສຳຫຼວດການນຳພາລວມ ຂອງຄະນະບໍລິຫານງານພັກແຂວງສະໄໝທີ VIII, ຮ່າງແຜນພັດທະນາເສດຖະກິດ-ສັງຄົມ 5 ປີ (2026-2030), ໄດ້ຮັບຟັງການປະກອບຄໍາເຫັນ ຈາກຂະແໜງການ, ກົມກອງ, ຈໍານວນໜຶ່ງ, ທັງຈະໄດ້ດໍາເນີນການເລືອກຕັ້ງເອົາ ຄະນະບໍລິຫານງານພັກແຂວງ ສະໄໝທີ IX ເພື່ອເປັນຫຼັກແຫຼ່ງໃນການນໍາພາ-ຊີ້ນໍາ, ການຜັນຂະຫຍາຍ ແລະ ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ IX ໃຫ້ປະກົດຜົນເປັນຈິງ ພ້ອມນີ້ ຈະໄດ້ເລືອກເອົາຜູ້ແທນໄປຮ່ວມກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XII ຂອງພັກ ແລະ ຮັບຟັງການໂອ້ລົມ ໃຫ້ທິດຊີ້ນໍາຂອງການນຳຂັ້ນສູນກາງ ເພື່ອຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ ໃຫ້ປະກົດຜົນເປັນຈິງ.
 |
ກອງປະຊຸມຄັ້ງນີ້, ຈະດໍາເນີນໄປເປັນເວລາ 1 ວັນເຄີ່ງ. ພາຍຫຼັງກ່າວໄຂກອງປະຊຸມ ຜູ້ເຂົ້າຮ່ວມກອງປະຊຸມ ໄດ້ຮັບຟັງການຜ່ານຮ່າງບົດລາຍງານການເມືອງ ຂອງຄະນະບໍລິຫານງານພັກແຂວງ ສະໄໝທີ່ VIII, ຜ່ານແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII, ທັງມີການປະກອບຄຳເຫັນຈາກພະແນກການ-ກົມກອງ ແລະ ທ້ອງຖີ່ນ ຫຼາຍຫົວຂໍ້ ເຊັ່ນ: "ພັດທະນາການທ່ອງທ່ຽວ ຕິດພັນກັບການປົກປັກຮັກສາວັດທະນະທຳ ທີ່ເປັນເອກະລັກຂອງຫຼວງພະບາງ, ການສ້າງນະຄອນເຂັ້ມແຂງຮອບດ້ານ ແລະປົກປັກຮັກສາເມືອງມໍລະດົກໂລກ, ສ້າງບ້ານໃຫຍ່ນໍ້າຖ້ວມໃຕ້ ເປັນສີສັນຕົວເມືອງນ້ອຍໃນຊົນນະບົດ, ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕິດພັນການສ້າງບ້ານພັດທະນາ ແລະ ການຜະລິດສິນຄ້າຮັບໃຊ້ການທ່ອງທ່ຽວ". ສ່ວນຕອນບ່າຍຂອງວັນດຽວກັນ ຈະໄດ້ດຳເນີນການປ່ອນບັດ ເລືອກຕັ້ງເອົາຄະນະບໍລິຫານງານພັກແຂວງ ສະໄໝທີ IX ແລະ ປ່ອນບັດເລືອກເອົາຜູ້ແທນໄປຮ່ວມກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XII ຕື່ມອີກ.
(ຂ່າວ: ອາພຸດເດດ ບຸບຜາ, ພາບ: ເພັດສາຄອນ ແລະດາວອນ)
ຄໍາເຫັນ