ໃນກອງປະຊຸມ, ສະຫາຍ ພັນເອກ ພັນວິໄລ ລາດສະຍົນ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງໄດ້ກ່າວເປີດກອງປະຊຸມຢ່າງເປັນທາງການ. ຈາກນັ້ນ, ສະຫາຍ ພັນເອກ ສຸກສະໝອນ ສີພັນດອນ ຮອງເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງ ໄດ້ຜ່ານຮ່າງບົດລາຍງານການເມືອງຕໍ່ກອງປະຊຸມ ຊຶ່ງສະຫາຍໄດ້ຍົກໃຫ້ເຫັນເຖິງຜົນສຳເລັດຫຼາຍດ້ານຂອງການນຳພາ-ຊີ້ນໍາຂອງຄະນະບໍລິຫານງານພັກ ກອງບັນຊາການທະຫານແຂວງໃນໄລຍະ 5 ປີຜ່ານ ໂດຍສະເພາະການຈັດຕັ້ງປະຕິບັດຜັນຂະຫຍາຍມະຕິກອງປະຊຸມໃຫຍ່ສະໄໝທີ XI ຂອງສູນກາງພັກ, ມະຕິກອງປະຊຸມໃຫຍ່ສະໄໝທີ IX ຂອງຄະນະບໍລິຫານງານພັກແຂວງ, ມະຕິກອງປະຊຸມໃຫຍ່ V ຂອງຄະນະພັກກະຊວງປ້ອງກັນປະເທດ ແລະ ມະຕິກອງປະຊຸມໃຫຍ່ສະໄໝທີ V ຂອງອົງຄະນະພັກກອງບັນຊາການທະຫານແຂວງ, ບົນພື້ນຖານຄວາມສາມັກຄີເປັນເອກະພາບພາຍໃນພັກ, ການຈັດຕັ້ງປະຕິບັດໜ້າທີ່ປ້ອງກັນຊາດ, ກໍຄືການປັບປຸງກໍ່ສ້າງພັກ, ກໍ່ສ້າງພະນັກງານ, ກໍ່ສ້າງກຳລັງເຕີບໃຫຍ່ເຂັ້ມແຂງໃນທຸກດ້ານຕາມແນວທາງປ່ຽນແປງໃໝ່ທີ່ມີຫຼັກການຂອງພັກ, ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກ, ຂອບເຂດການນຳພາໃນທົ່ວຄະນະພັກກອງບັນຊາການທະຫານແຂວງປະກອບມີ 13 ຄະນະພັກຮາກຖານ, 64 ໜ່ວຍພັກ.
ກອງປະຊຸມຄັ້ງນີ້, ມີຜູ້ແທນສົມບູນຈຳນວນ 167 ສະຫາຍ ຍິງ 7 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກ 1,520 ສະຫາຍ ຍິງ 329 ສະຫາຍ, ສຳຮອງ 117 ສະຫາຍ ທົ່ວກອງບັນຊາການທະຫານແຂວງສະຫວັນນະເຂດ ຈະໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະບໍລິຫານງານພັກຊຸດໃໝ່ຈຳນວນ 11 ສະຫາຍນໍາອີກດ້ວຍ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ