ສະຫາຍ ພັອ ຄໍາສິງ ນົນທະສອນ ໄດ້ກ່າວວ່າ: ນັບແຕ່ກອງປະຊຸມໃຫຍ່ຜູ້ແທນອົງຄະນະພັກເມືອງບົວລະພາ ຄັ້ງຜ່ານມາ ຮອດປັດຈຸບັນ ບັນດາຖັນແຖວສະມາຊິກພັກ-ພະນັກງານ ຕະຫຼອດຮອດປະຊາຊົນບັນດາເຜົ່າຊາວເມືອງບົວລະພາ ໄດ້ເປັນເຈົ້າການໃນການຈັດຕັ້ງຜັນຂະຫຍາຍຄາດໝາຍສູ້ຊົນຕ່າງໆ ທີ່ກອງປະຊຸມໃຫຍ່ຄັ້ງທີ XI ວາງອອກຢ່າງເປັນຂະບວນຟົດຟື້ນ ແລະ ມີຜົນສໍາເລັດຢ່າງໜ້າພໍໃຈ ຊຶ່ງສະແດງໃຫ້ເຫັນສະຖຽນລະພາບທາງດ້ານການເມືອງມີຄວາມໜັກແໜ້ນ, ສັງຄົມມີຄວາມສະຫງົບ-ເປັນລະບຽບຮຽບຮ້ອຍໂດຍພື້ນຖານ, ສະພາບເສດຖະກິດ-ສັງຄົມ ໄດ້ມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ, ພື້ນຖານໂຄງລ່າງໄດ້ຮັບການປັບປຸງ, ມີການຈັດສັນພູມລໍາເນົາອາຊີບຄົງທີ່ ແລະ ການແກ້ໄຂຄວາມທຸກຍາກໃຫ້ແກ່ປະຊາຊົນ, ການຂະຫຍາຍການສຶກສາ ແລະ ສາທາລະນະສຸກໄດ້ໄປຮອດເຂດຫ່າງໄກສອກຫຼີກ, ຈໍານວນບ້ານສາທາລະນສຸກ, ບ້ານວັດທະນະທໍາ ແລະ ບ້ານພັດທະນາເພີ່ມຂຶ້ນ, ຄຽງຄູ່ກັນນັ້ນ ດ້ານລະບົບການຈັດຕັ້ງທຸກຂັ້ນໄດ້ຮັບການປັບປຸງ, ດໍາເນີນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຕິດຕາມກວດກາການເຄື່ອນໄຫວນໍາພາ-ຊີ້ນໍາຂອງໜ່ວຍພັກຂັ້ນຕ່າງໆ ຢ່າງເປັນປະຈໍາ.
ກອງປະຊຸມຈະໄດ້ສຸມໃສ່ເນື້ອໃນສໍາຄັນຄື: ຮັບຟັງ ແລະ ປະກອບຄໍາຄິດ-ຄໍາເຫັນຕໍ່ຮ່າງລາຍງານການເມືອງຄັ້ງທີ XI, ແຜນພັດທະນາເສດຖະກິດ-ສັງຄົມໃນ 5 ປີຕໍ່ໜ້າ ແລະ ຮ່າງບົດສໍາຫຼວດການນໍາພາ- ຊີ້ນໍາລວມ ຂອງອົງຄະນະພັກເມືອງ ຊຸດທີຜ່ານມາ, ສິ່ງສໍາຄັນບັນດາຜູ້ແທນສົມບູນ ຈະໄດ້ໃຊ້ສິດປ່ອນບັດເລືອກເອົາຄະນະບໍລິຫານງານພັກເມືອງຊຸດໃໝ່, ເລືອກເອົາຜູ້ແທນສົມບູນ ແລະ ສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງ ແລະ ຮັບຟັງຄໍາເຫັນຊີ້ນໍາຈາກຄະນະພັກຂັ້ນເທິງ ເພື່ອເປັນທິດທາງ, ເປັນບ່ອນອີງໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ໃຫ້ມີຜົນສໍາເລັດ.
(ຂ່າວ: ມະນີວັນ)
ຄໍາເຫັນ