 |
ສະຫາຍ ນາງ ມະໄລທອງ ທຳມະຕິກາ ປະທານສະຫະພັນແມ່ຍິງແຂວງ ໄດ້ກ່າວເປີດກອງປະຊຸມ ພ້ອມທັງຜ່ານຄຸນລັກສະນະຜູ້ແທນສົມບູນກອງປະຊຸມໃຫຍ່ຜູ້ແທນແມ່ຍິງແຂວງ ສະຫວັນນະເຂດ ຄັ້ງທີ XI. ຈາກນັ້ນ, ສະຫາຍ ນາງ ເພັດອຸດອນ ອາດສະຜັນທອງ ຮອງປະທານສະຫະພັນແມ່ຍິງແຂວງ ໄດ້ຜ່ານຮ່າງບົດລາຍງານການເມືອງຕໍ່ກອງປະຊຸມ ຊຶ່ງມີບາງຕອນວ່າ: ຄະນະສະຫະພັນແມ່ຍິງແຕ່ລະຂັ້ນ ໄດ້ຖືເປັນວຽກງານຕົ້ນຕໍ ແລະ ສຳຄັນຕໍ່ກັບການສຶກສາອົບຮົມການເມືອງ-ແນວຄິດໃຫ້ສະມາຊິກສະຫະພັນແມ່ຍິງ, ແມ່ຍິງລາວບັນດາເຜົ່າ ດ້ວຍຫຼາຍວິທີທີ່ສອດຄ່ອງກັບແຕ່ລະກຸ່ມເປົ້າໝາຍ ເຮັດໃຫ້ຖັນແຖວສະມາຊິກສະຫະພັນແມ່ຍິງ, ເອື້ອຍນ້ອງແມ່ຍິງບັນດາເຜົ່າ ມີຄວາມຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ-ລັດ, ມີຄວາມສາມັກຄີເປັນປຶກແຜ່ນແໜ້ນໜາ ຢູ່ພາຍໃຕ້ການນຳພາຂອງພັກ, ມີສະຕິເປັນເຈົ້າຂອງປະເທດຊາດ, ຮັກກຽດສັກສີຂອງແມ່ຍິງລາວ, ຊຶ່ງຢັ້ງຢືນໄດ້ເຖິງຄວາມເຊື່ອໜັ້ນຕໍ່ການນຳພາຂອງພັກ, ເຊື່ອໜັ້ນຕໍ່ພາລະບົດບາດຂອງອົງການຈັດຕັ້ງສະຫະພັນແມ່ຍິງ.
 |
ປັດຈຸບັນທົ່ວແຂວງ, ມີສະມາຊິກສະຫະພັນແມ່ຍິງທັງໝົດ 196,060 ສະຫາຍ ກວມ 35.31%ຂອງແມ່ຍິງທັງໝົດ. ໃນນັ້ນ, ຂະຫຍາຍສະມາຊິກໃໝ່ໄດ້ຈໍານວນ 14,329 ສະຫາຍ (ທຽບໃສ່ກອງປະຊຸມໃຫຍ່ ຄັ້ງທີ X ຈໍານວນ 181,731 ສະຫາຍ), ທົ່ວແຂວງປະກອບມີ 4 ໜ່ວຍ, 50 ຮາກຖານຂັ້ນແຂວງ, 195 ຮາກຖານ, 275 ໜ່ວຍຂັ້ນເມືອງ, ສາມາດຂະຫຍາຍຮາກຖານສະຫະພັນແມ່ຍິງໄປສູ່ຂົງເຂດທຸລະກິດໄດ້ 2 ຮາກຖານ, ໄດ້ຈັດຕັ້ງເຊື່ອມຊຶມເອກະສານກ່ຽວກັບການຈັດຕັ້ງປະຕິບັດຂໍ້ແຂ່ງຂັນ 3 ດີຂອງສະຫະພັນແມ່ຍິງລາວອ້ອມຂ້າງແຂວງ ແລະ ເມືອງ-ນະຄອນໄດ້ 6,232 ຄັ້ງ, ມີ 299 ໜ່ວຍ, 258 ຮາກຖານ, 1,025 ບ້ານ, ມີຜູ້ເຂົ້າຮ່ວມທັງໝົດ 791,651 ເທື່ອຄົນ, ນໍາພາເປີດບັ້ນຂໍ້ແຂ່ງຂັນ 3 ດີ ໄດ້ 14 ເມືອງ 1 ນະຄອນ, 299 ໜ່ວຍ, 258 ຮາກຖານ, 1,025 ບ້ານ, ຜູ້ເຂົ້າຮ່ວມແຂ່ງຂັນ 709,002 ເທື່ອຄົນ. ຜ່ານການຈັດຕັ້ງປະຕິບັດຂໍ້ແຂ່ງຂັນ 3 ດີ ສາມາດປະເມີນ ແລະ ຄັດເລືອກບຸກຄົນ 3 ດີ ປະເພດ 1 ໄດ້ 650,333 ເທື່ອຄົນ, ເທົ່າກັບ 91.72% ຂອງຜູ້ເຂົ້າຮ່ວມແຂ່ງຂັນ, ບຸກຄົນ 3 ດີ ປະເພດ 2 ໄດ້ 53,760 ເທື່ອຄົນ, ເທົ່າກັບ 7.58%, ກົມກອງ 3 ດີ ມີ 258 ຮາກຖານ, 299 ໜ່ວຍ, 1,025 ບ້ານ, ສະຫະພັນແມ່ຍິງເມືອງ 3 ດີ 14 ເມືອງ ແລະ 1 ນະຄອນ; ບຸກຄົນຕົວແບບ 5,823 ສະຫາຍ, ຄອບຄົວຕົວແບບ 6,405 ຄອບຄົວ, ບຸກຄົນ-ຄອບຄົວຕົວແບບ 2,500 ສະຫາຍ.
 |
ສະຫາຍ ນາງ ສົມຫວັງ ລຳພູວົງ ຮອງປະທານສະຫະພັນແມ່ຍິງແຂວງໄດ້ຜ່ານຮ່າງບົດສະຫຼຸບຕີລາຄາການຈັດຕັ້ງປະຕິບັດແຜນພັດທະນາແມ່ຍິງ 5 ປີ (2020-2025) ແລະ ແຜນພັດທະນາແມ່ຍິງ 5 ປີຕໍ່ໜ້າ (2026-2030). ຈາກນີ້, ໃນກອງປະຊຸມ ຍັງໄດ້ຮັບຟັງການປະກອບຄຳເຫັນຂອງຄອບຄົວຕົວແບບການຕ່ຳແພຝ້າຍລາວ ຢູ່ເມືອງສອງຄອນ ແລະ ຄອບຄົວຕົວແບບທາງດ້ານການຜະລິດກະສິກຳ ເມືອງຈຳພອນ ພ້ອມນັ້ນ ກໍຍັງໄດ້ມີການຜ່ານຮ່າງບົດສໍາຫຼວດການນໍາພາລວມຂອງຄະນະບໍລິຫານຊຸດເກົ່າ ແລະ ມີການມອບໃບຍ້ອງຍໍຂອງສູນກາງສະຫະພັນແມ່ຍິງລາວໃຫ້ຜູ້ມີຜົນງານພົ້ນເດັ່ນໃນການເຄື່ອນໄຫວວຽກງານແມ່ຍິງໃນໄລຍະຜ່ານມາ.
ໂອກາດນີ້, ບັນດາສະຫາຍຜູ້ແທນກອງປະຊຸມ ຈະໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະບໍລິຫານງານສະຫະພັນແມ່ຍິງແຂວງຊຸດໃໝ່ນຳອີກ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ