ພາຍໃຕ້ການເປັນປະທານຂອງສະຫາຍ ບຸນຄົບ ຈັນທະວົງ ເລຂາຄະນະບໍລິຫານພັກເມືອງປາກກະດິງ, ໃຫ້ກຽດເຂົ້າຮ່ວມຂອງສະຫາຍ ສອນທະນູ ທໍາມະວົງ ກໍາມະການສູນກາງພັກ ເລຂາຄະນະບໍລິຫານງານພັກແຂວງບໍລິຄຳໄຊ, ມີແຂກຖືກເຊີນ ແລະ ຜູ້ແທນສົມບູນເຂົ້າຮ່ວມທັງໝົດ 121 ສະຫາຍ, ຍິງ 10 ສະຫາຍ.
ສະຫາຍ ບຸນຄົບ ຈັນທະວົງ ໄດ້ກ່າວໄຂກອງປະຊຸມ ພ້ອມທັງກ່າວຈຸດປະສົງວາລະດຳເນີນກອງປະຊຸມວ່າ: ຕະຫຼອດໄລຍະ 5 ປີຜ່ານມາ ອົງຄະນະພັກເມືອງພ້ອມດ້ວຍປະຊາຊົນບັນດາເຜົ່າຊາວເມືອງປາກກະດິງ ໄດ້ອອກແຮງສູ້ຊົນ ແລະ ເສີມຂະຫຍາຍມູນເຊື້ອແຫ່ງຄວາມສາມັກຄີເປັນປຶກແຜ່ນພາຍໃຕ້ການນຳພາຂອງພັກ ບວກກັບການອຸ້ມຊູຊ່ວຍເຫຼືອຂອງທຸກພາກສ່ວນ ເຮັດໃຫ້ເມືອງມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ, ເສດຖະກິດຂະຫຍາຍຕົວຕໍ່ເນື່ອງ, ຊີວິດການເປັນຢູ່ຂອງພະນັກງານ, ກໍາລັງປະກອບອາວຸດ ແລະ ປະຊາຊົນບັນດາເຜົ່ານັບມື້ດີຂຶ້ນ, ຄວາມທຸກຍາກຂອງປະຊາຊົນໄດ້ຮັບການແກ້ໄຂຫຼຸດລົງເປັນກ້າວໆ.
ກອງປະຊຸມຄັ້ງນີ້, ຈະໄດ້ດໍາເນີນໄປເປັນເວລາ 2 ວັນ ຊື່ງຈະໄດ້ຮັບຮອງເອົາຮ່າງລາຍງານການເມືອງ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ V ແລະ ຈະໄດ້ດໍາເນີນການປ່ອນບັດຄັດເລືອກເອົາຄະນະບໍລິຫານງານພັກເມືອງປາກກະດິງ ສະໄໝທີ VIII, ຄັດເລືອກເອົາຜູ້ແທນສົມບູນໄປຮ່ວມກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ ແລະ ຈະໄດ້ຮັບຟັງການໂອ້ລົມຂອງ ສະຫາຍ ສອນທະນູ ທຳມະວົງ ເພື່ອຊີ້ທິດເຍືອງທາງໃຫ້ແກ່ຄະນະບໍລິຫານງານພັກເມືອງປາກກະດິງຊຸດໃໝ່ ຢ່າງໜັກແໜ້ນ ແລະ ມີຄວາມໝາຍໃນຕໍ່ໜ້າ ໃຫ້ປະກົດຜົນເປັນຈິງ.
(ຂ່າວ-ພາບ: ຄຳຟອງ)
ຄໍາເຫັນ