ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຜົ້ງສາລີ, ມີແຂກຖືກເຊີນ ແລະ ຜູ້ແທນສົມບູນຈໍານວນ 125 ສະຫາຍ ຍິງ 14 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກໃນທົ່ວເມືອງ 1,287 ສະຫາຍ ຍິງ 337 ສະຫາຍເຂົ້າຮ່ວມ.
ສະຫາຍ ທອງຕື ເກຍສະບົງ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໆສຳພັນ ໄດ້ກ່າວເປີດກອງປະຊຸມ ຢ່າງເປັນທາງການ ພ້ອມທັງຜ່ານຮ່າງບົດລາຍງານເມືອງສອງພາກ ຊຶ່ງມີບາງຕອນສະຫາຍ ໄດ້ກ່າວວ່າ: ພາຍໃຕ້ການ ຊີ້ນໍາຈາກຄະນະບໍລິຫານງານພັກແຂວງ ແລະ ການນໍາພາ ຂອງຄະນະບໍລິຫານງານພັກເມືອງສຳພັນ ໃນການຈັດຕັ້ງປະຕິບັດ ມະຕິກອງປະຊຸມໃຫຍ່ຂອງພັກຂັ້ນຕ່າງໆ ໂດຍຍຶດໝັ້ນແນວທາງເສດຖະກິດຂອງພັກ, ຖືການພັດທະນາເສດຖະກິດເປັນໃຈກາງ ໃນ 5 ປີຜ່ານມາ ພວກເຮົາໄດ້ຫັນມະຕິກອງປະຊຸມໃຫຍ່ຄັ້ງທີ XIV ຂອງອົງຄະນະພັກເມືອງວາງອອກ ກໍຄືບັນດາ 9 ແຜນງານ ແລະ 5 ທາງອອກ ໃນແຜນພັດທະນາເສດຖະກິດ-ສັງຄົມ 5 ປີຄັ້ງທີ III (2020-2024) ຂອງເມືອງ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ; ໂດຍການສຸມໃສ່ກໍສ້າງພື້ນຖານໂຄງລ່າງຮັບໃຊ້ແກ່ການພັດທະນາ, ການດໍາລັງຊີວິດ ແລະ ການແກ້ໄຂຄວາມທຸກຍາກຂອງປະຊາຊົນ; ໃນ 5 ປີຜ່ານມາ ເສດຖະກິດຂອງເມືອງ ໄດ້ມີການຂະຫຍາຍຕົວສະເລ່ຍ 7.45%ຕໍ່ປີ.
ກອງປະຊຸມໃຫຍ່ຄັ້ງນີ້, ຜູ້ແທນຈະໄດ້ພ້ອມກັນຄົ້ນຄ້ວາ, ປະກອບຄໍາເຫັນໃສ່ຮ່າງບົດລາຍງານການເມືອງ, ແຜນພັດທະນາ ເສດຖະກິດ-ສັງຄົມ 5 ປີ ພ້ອມທັງທົບທວນຕີລາຄາຄືນ ກ່ຽວກັບການຈັດຕັ້ງປະຕິບັດແນວທາງການປ່ຽນແປງໃໝ່ ທີ່ມີຫຼັກການຂອງພັກກໍຄືການຈັດຕັ້ງປະຕິບັດເນື້ອໃນ ຈິດໃຈມະຕິກອງປະຊຸມໃຫຍ່ຄັ້ງທີ XV ຂອງອົງຄະນະພັກເມືອງກ່ຽວກັບດ້ານຕັ້ງໜ້າ, ຂໍ້ຂາດຕົກບົກຜ່ອງ ແລະ ຖອດຖອນບົດ ຮຽນຢ່າງພາວະວິໄສ ພ້ອມດຽວກັນນັ້ນຈະ ໄດ້ພ້ອມກັນກຳນົດທິດທາງໜ້າທີ່ແຕ່ນີ້ຮອດປີ 2029. ຈາກນັ້ນ, ຜູ້ແທນຈະໄດ້ພ້ອມກັນໃຊ້ສິດປະຊາທິປະໄຕ ເລືອກຕັ້ງເອົາຄະນະບໍລິຫານງານພັກເມືອງຊຸດ ໃໝ່. ພ້ອມກັນນັ້ນໃນ ກອງປະຊຸມຍັງຈະໄດ້ຮັບຟັງການໂອ້ລົມຈາກຄະນະພັກຂັ້ນເທິງ ເພື່ອເປັນບ່ອນອີງ ແລະ ຈັດຕັ້ງປະຕິບັດວຽກງານໃນຕໍ່ໜ້າ ໃຫ້ມີຜົນສໍາເລັດຕາມແຜນການທີ່ວາງໄວ້. ກອງປະຊຸມໃຫຍ່ຜູ້ແທນອົງຄະນະພັກເມືອງສຳພັນ ຄັ້ງທີ XV ຈະສືບຕໍ່ດໍາເນີນເປັນເວລາ 2 ວັນ ຈຶ່ງຈະສໍາເລັດ.
(ພາບ,ຂ່າວໂດຍ ຄໍາຮຸງຄູນປະສົງ)
ຄໍາເຫັນ