ກອງປະຊຸມຄັ້ງນີ້, ຜູ້ແທນກອງປະຊຸມໄດ້ ຄົ້ນຄວ້າ, ພິຈາລະນາ, ຮັບຮອງເອົາບົດລາຍງານການເມືອງ ແລະ ທິດທາງແຜນການ; ແຜນພັດທະນາວຽກງານແມ່ຍິງແຂວງຫຼວງນ້ຳທາ, ພິຈາລະນາແລະ ຮັບຮອງເອົາບົດສຳຫຼວດການນຳພາລວມຂອງຄະນະບໍລິຫານງານສະຫະພັນແມ່ຍິງແຂວງ.
ສະຫາຍ ນາງ ເກສອນ ແສງຍາວົງ ສະມາຊິກສະພາແຫ່ງຊາດ, ຄະນະປະຈຳສະພາປະຊາຊົນແຂວງ, ຄະນະບໍລິຫານງານສະຫະພັນແມ່ຍິງແຂວງ ໄດ້ຂຶ້ນຜ່ານຮ່າງບົດລາຍງານການເມືອງ ຂອງຄະນະບໍລິຫານງານສະຫະພັນແມ່ຍິງແຂວງ ໂດຍສະເພາະ ໄດ້ສະຫຼຸບຕີລາຄາຜົນການຈັດຕັ້ງປະຕິບັດ ມະຕິກອງປະຊຸມໃຫຍ່ຜູ້ແທນແມ່ຍິງແຂວງ ຄັ້ງທີ IX ໃນໄລຍະ 5 ປີ ຜ່ານມາ (2020-2024) ເປັນຕົ້ນແມ່ນໄດ້ຕີລາຄາດ້ານວຽກງານສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວພະນັກງານ - ລັດຖະກອນກໍ່ຄືສະມາຊິກແມ່ຍິງ, ແມ່ຍິງບັນດາເຜົ່າ ດ້ວຍການປຸກລະດົມສະມາຊິກສະຫະພັນແມ່ຍິງ ເຂົ້າຮ່ວມເຊື່ອມຊຶມແນວທາງນະໂຍບາຍຂອງພັກ, ລັດຖະທໍາມະນູນ, ກົດໝາຍ, ມະຕິຕ່າງໆເປັນປົກກະຕິ, ໄດ້ຮັບການປັບປຸງ ແລະ ເຄື່ອນໄຫວປະຕິບັດພາລະບົດບາດ, ສິດໜ້າທີ່ຂອງຕົນເຮັດໃຫ້ການຈັດຕັ້ງ ມີຄວາມໜັກ ແໜ້ນ, ເຂັ້ມແຂງ ທັງດ້ານປະລິມານ ແລະ ຄຸນນະພາບ. ພ້ອມກັນ ກໍເອົາໃຈໃສ່ບຸກທະລຸພັດທະນາແມ່ຍິງລາວຮອບດ້ານ ໃຫ້ເປັນພົນລະເມືອງດີ, ມີນໍ້າໃຈຮັກຊາດ, ຮັກລະບອບປະຊາທິປະໄຕ ປະຊາຊົນ, ມີຄວາມສາມັກຄີ, ສົ່ງເສີມຄວາມກ້າວໜ້າຂອງແມ່ຍິງໃຫ້ມີຄວາມສະເໝີພາບ ຍິງ-ຊາຍ, ອະນຸລັກ ແລະ ສົ່ງເສີມຄຸນລັກສະນະທີ່ເປັນມູນເຊື້ອຂອງແມ່ຍິງລາວບັນດາເຜົ່າ ສ້າງຄ່ານິຍົມອັນຖືກຕ້ອງ, ກ້າວໜ້າ ແລະ ມີວິທະຍາສາດ, ສ້າງວິຖີຊີວິດໃໝ່ເພື່ອພັດທະນາຕົນເອງ ແລະ ຄອບຄົວ ໃຫ້ຮັ່ງມີເຂັ້ມແຂງເທື່ອລະກ້າວ. ຈາກນັ້ນ, ຄະນະຜູ້ແທນກອງປະຊຸມໄດ້ໃຊ້ສິດປະຊາທິປະໄຕຂອງຕົນ ເລືອກຕັ້ງຄະນະບໍລິຫານງານສະຫະພັນແມ່ຍິງ ແຂວງຊຸດໃໝ່ໂດຍມີຜູ້ສະໝັກທັງໝົດ 28 ສະຫາຍ ເລືອກເອົາ 25 ສະຫາຍ. ຊຶ່ງໃນກອງປະຊຸມ ໄດ້ເປັນເອກະພາບເລືອກຕັ້ງເອົາຄະນະບໍລິຫານງານສະຫະພັນແມ່ຍິງແຂວງ ສະໄໝທີ X ຈຳນວນ 25 ສະຫາຍ ກອງປະຊຸມຄັ້ງປະຖົມມະລຶກ ໄດ້ເປັນເອກະສັນເລືອກຕັ້ງເອົາ ສະຫາຍ ນາງ ເກສອນ ແສງຍາວົງ ເປັນປະທານຄະນະບໍລິຫານງານສະຫະພັນແມ່ຍິງແຂວງ, ສະຫາຍ ນາງ ສຳລານ ລວງຍາວົງ ແລະ ສະຫາຍ ນາງ ຄຳພັດ ໄຊຍະວົງ ເປັນຮອງປະທານ, ເລືອກເອົາ ສະຫາຍ ນາງ ສຳລານ ລວງຍາວົງ ເປັນປະທານກວດກາ, ສະຫາຍ ນາງ ແສງຈັນ ພອນສາລີ ແລະ ສະຫາຍ ນາງ ສຸລິພອນ ລໍຫວັນເຊືອຍ ເປັນຮອງປະທານກວດກາ, ເລືອກເອົາຜູ້ແທນສົມບູນ ແລະ ສຳຮອງ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນສະຫະພັນສະຫະພັນແມ່ຍິງລາວ ທົ່ວປະເທດ ຄັ້ງທີ IX ຈຳນວນ 11 ສະຫາຍ.
(ຂ່າວ: ແກ້ວ ກ໋ວາງບັນແຄັດ)
ຄໍາເຫັນ