ມີບັນດາສະຫາຍໃນຄະນະບໍລິຫານງານພັກແຂວງ, ເລຂາຄະນະພັກຮາກຖານພະແນກການ, ອົງການທຽບເທົ່າອ້ອມຂ້າງແຂວງເຂົ້າຮ່ວມ .
ກອງປະຊຸມຄັ້ງນີ້, ບັນດາສະຫາຍຜູ້ແທນທີ່ເຂົ້າຮ່ວມ ໄດ້ຮັບຟັງການສະຫຼຸບການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ແຜນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງແຂວງ ໃນໄລຍະ 1 ປີຜ່ານມາ ແລະ ທິດທາງແຜນການປີ 2025 ເພື່ອພ້ອມກັນຕີລາຄາ ແລະ ເບິ່ງບັນຫາຢ່າງພາວະວິໄສ ແລະ ແທດເຖິງຕົວຈິງ ກ່ຽວກັບໝາກຜົນຂອງການຈັດຕັ້ງປະຕິບັດ ແລະ ຄົ້ນຄວ້າ, ວິເຄາະ, ວິໄຈບັນຫາຂໍ້ຄົງຄ້າງໃນດ້ານຕ່າງໆ. ໃນໄລຍະ 1 ປີຜ່ານມາ ແຂວງຄໍາມ່ວນ ຍັງສາມາດຮັກສາໄດ້ຄວາມມີສະຖຽນລະພາບທາງດ້ານການເມືອງຢ່າງໜັກແໜ້ນ, ເສດຖະກິດສືບຕໍ່ຂະຫຍາຍຕົວ, ທົ່ວສັງຄົມຍັງມີຄວາມສະຫງົບ-ປອດໄພໂດຍພື້ນຖານ ແລະ ຍັງມີຄວາມເປັນລະບຽບຮຽບຮ້ອຍ, ດ້ານເສດຖະກິດມະຫາພາກ ອັດຕາຂະຫຍາຍຕົວເສດຖະກິດຂອງແຂວງ ປະຕິບັດໄດ້ 6.05%, ລວມຍອດຜະລິດຕະພັນພາຍໃນ (GDP) ບັນລຸໄດ້ 24,452 ຕື້ກີບ ເທົ່າກັບ 119.71%, ລາຍຮັບສະເລ່ຍຕໍ່ຫົວຄົນ ເທົ່າກັບ 53 ລ້ານກວ່າກີບຕໍ່ຄົນຕໍ່ປີ ຫຼື ເທົ່າກັບ 2,469 ໂດລາສະຫະລັດ, ລະດົມແຫຼ່ງທຶນເພື່ອການພັດທະນາ ປະຕິບັດໄດ້ 5,568.53 ຕື້ກີບ ເທົ່າກັບ 114.14%, ດ້ານລາຍຮັບງົບປະມານ ສາມາດເກັບລາຍຮັບໄດ້ທັງໝົດ 4,145.56 ຕື້ກີບ ເທົ່າກັບ 171,51%. ໃນນີ້, ລາຍຮັບສູນກາງປະຕິບັດໄດ້ 1,328.61 ຕື້ກີບ ເທົ່າກັບ 127.14%, ລາຍຮັບທ້ອງຖິ່ນ ປະຕິບັດໄດ້ 2,816.95 ຕື້ກີບ ເທົ່າກັບ 205.31%, ມາຮອດປັດຈຸບັນ ແຂວງຄໍາມ່ວນ ມີເມືອງພົ້ນທຸກ 6 ເມືອງ, ບ້ານພົ້ນທຸກ 480 ບ້ານ ກວມ 84% ຂອງຈໍານວນບ້ານໃນທົ່ວແຂວງ, ບ້ານພັດທະນາ 266 ບ້ານ ກວມ 46%, ຄອບຄົວພົ້ນທຸກ 73,380 ຄອບຄົວ ກວມ 86% ຂອງຈໍານວນຄອບຄົວທັງໝົດ, ຄອບຄົວພັດທະນາ 61,549 ຄອບຄົວ ກວມ 72%, ປັດຈຸບັນບ້ານພົ້ນທຸກຍັງເຫຼືອ 90 ບ້ານ ກວມ 15%, ຄອບຄົວທຸກຍາກຍັງເຫຼືອ 11,553 ຄອບຄົວ ກວມ 13% ຂອງຈໍານວນຄອບຄົວທັງໝົດ.
ໂອກາດນີ້, ສະຫາຍ ວັນໄຊ ພອງສະຫວັນ ຍັງໄດ້ຮຽກຮ້ອງໃຫ້ບັນດາສະຫາຍ ທີ່ເຂົ້າຮ່ວມ ຈົ່ງພ້ອມກັນເຊີດຊູຄວາມຮັບຜິດຊອບ ແລະ ເປັນເຈົ້າການສຸມສະຕິປັນຍາເຂົ້າໃນການຄົ້ນຄວ້າປະກອບຄໍາຄິດເຫັນຕໍ່ເນື້ອໃນບັນດາເອກະສານທີ່ໄດ້ນໍາສະເໜີຕໍ່ກອງປະຊຸມໃນຄັ້ງນີ້ ຢ່າງເລິກເຊິ່ງ, ພາວະວິໄສ ແລະ ກົງໄປກົງມາ ບົນພື້ນຖານສະພາບຄວາມເປັນຈິງ ແນໃສ່ເຮັດໃຫ້ຜົນຂອງກອງປະຊຸມ ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ແລະ ມີປະສິດທິຜົນໃນຕໍ່ໄປ.
(ຂ່າວ-ພາບ: ກອງຄໍາ)
ຄໍາເຫັນ