 |
ກອງປະຊຸມຄັ້ງນີ້, ທັງສອງຝ່າຍໄດ້ທົບທວນຄືນກ່ຽວກັບການຈັດຕັ້ງປະຕິບັດເນື້ອໃນບົດບັນທຶກກອງປະຊຸມ ຄະນະກຳມະການຮັກສາຄວາມສະຫງົບຮຽບຮ້ອຍຕາມຊາຍແດນ ຄຳມ່ວນ - ນະຄອນພະນົມ ຄັ້ງທີ XIII ທີ່ໄດ້ພ້ອມກັນລົງນາມ ໃນຄັ້ງວັນທີ 7 ກັນຍາ 2023 ທີ່ຈັງຫວັດນະຄອນພະນົມ ຣາຊະອານາຈັກໄທ. ຊຶ່ງສອງຝ່າຍໄດ້ປະຕິບັດຮ່ວມກັນໄດ້ເປັນຢ່າງດີ ແລະ ເປັນຮູບປະທຳຫຼາຍດ້ານ, ພາຍໃຕ້ບັນຍາກາດອັນດີບົນພື້ນຖານຄວາມຖືກຕ້ອງສອດຄ່ອງຕາມນະໂຍບາຍຂອງທັງສອງລັດຖະບານ ລາວ-ໄທ, ເຫັນວ່າກົນໄກຄວາມຮ່ວມມືດັ່ງກ່າວ ເປັນພື້ນຖານທີ່ດີໃນການສົ່ງເສີມການຮ່ວມມື ແລະ ແກ້ໄຂບັນຫາຮ່ວມກັນໃນລະດັບແຂວງ-ຈັງຫວັດ, ເມືອງ-ອໍາເພີ ຊຶ່ງເປັນສ່ວນສໍາຄັນໃນການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນລາວ-ໄທ, ເຮັດໃຫ້ເສັ້ນຊາຍແດນສອງປະເທດກາຍເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື.
ພ້ອມນັ້ນ, ກອງປະຊຸມຍັງໄດ້ຜ່ານຮ່າງບົດບັນທຶກການຮ່ວມມືຂອງສອງຝ່າຍໃນຕໍ່ໜ້າ ແລະ ເຫັນດີຮ່ວມກັນສືບຕໍ່ໃນ 8 ບັນຫາສໍາຄັນຄື: 1). ການຮ່ວມມືການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, 2). ການຮ່ວມມືໃນການຮັກສາເສັ້ນຊາຍແດນ ຄໍາມ່ວນ - ນະຄອນພະນົມ, 3). ການຮ່ວມມືໃນການອຳນວຍຄວາມສະດວກ ແລະ ຄວາມປອດໄພໃນການເຂົ້າ-ອອກເມືອງຕາມດ່ານຕ່າງໆ, 4). ການຮ່ວມມືໃນການປ້ອງກັນ ແລະ ປາບປາມຢາເສບຕິດຢູ່ຕາມບໍລິເວນຊາຍແດນ, 5). ການຮ່ວມມືໃນການຮັກສາ ແລະ ປ້ອງກັນຕະຝັ່ງເຈື່ອນ ແລະ ການແກ້ໄຂບັນຫາການດູດແຮ່ - ຊາຍຕາມແມ່ນໍ້າຂອງ, 6). ການຮ່ວມມືໃນກໍລະນີບຸກຄົນຂອງແຕ່ລະຝ່າຍຖືກກັກຕົວຄຸມຂັງ, 7). ການຮ່ວມມືດ້ານແຮງງານ, 8). ການຮ່ວມມືທາງດ້ານເສດຖະກິດ ລະຫວ່າງ ແຂວງຄຳມ່ວນ ແລະ ຈັງຫວັດນະຄອນພະນົມ ແລະ ກົນໄກການປະສານງານສອງຝ່າຍ. ການກຳນົດເວລາ ແລະ ສະຖານທີ່ຈັດກອງປະຊຸມໃນຄັ້ງຕໍ່ໄປໂດຍແມ່ນຈັງຫວັດນະຄອນພະນົມຮັບເປັນເຈົ້າພາບ.
ໃຫ້ກຽດລົງນາມເຊັນບົດບັນທຶກຝ່າຍແຂວງຄໍາມ່ວນໂດຍ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ຝ່າຍຈັງຫວັດນະຄອນພະນົມໂດຍ ທ່ານ ປຣາດຍາ ອຸ່ນເພັດວະຣາກອນ ຜູ້ວ່າຣາຊະການຈັງຫວັດນະຄອນພະນົມ.
(ຂ່າວ: ມະນີວັນ)
ຄໍາເຫັນ