ຄໍາມ່ວນ ເປີດງານຕະຫຼາດນັດ ແລະ ຈຳໜ່າຍສິນຄ້າ ບັ້ນຮົບປ້ອງກັນຕົວເມືອງທ່າແຂກ ແລະ ສະຫຼອງ ພູຫີນໜາມໜໍ່ ເປັນມໍລະດົກໂລກ

ໃນພິທີ, ຜຸ້ເຂົ້າຮ່ວມໄດ້ຮັບຊົມການສະແເດງສິລະປະ, ບົດຟ້ອນ, ບົດເພງ ທີ່ສ່ອງແສງໃຫ້ເຫັນເຫດການປະຫວັດສາດໃນບັ້ນຮົບປ້ອງກັນຕົວເມືອງທ່າແຂກ. ຈາກນັ້ນ, ກໍໄດ້ມອບໃບຍ້ອງຍໍໃຫ້ພາກສ່ວນທີ່ປະກອບສ່ວນສະໜັບສະໜູນໃນການຈັດງານຄັ້ງນີ້.

ທ່ານ ສົມສະອາດ ອຸ່ນສີດາ ປະທານຄະນະກຳມະການປົກຄອງແຂວງ ໄດ້ຂຶ້ນກ່າວເປີດງານຢ່າງເປັນທາງການວ່າ: ການຈັດງານໃນຄັ້ງນີ້, ມີຄວາມໝາຍສຳຄັນຢ່າງຍິ່ງ ໂດຍມີຈຸດປະສົງເພື່ອລະນຶກເຖິງວິລະກຳຂອງບັນພະບຸລຸດ, ພ້ອມທັງເປັນເວທີໃນການໂຄສະນາ ແລະ ສົ່ງເສີມຜະລິດຕະພັນສິນຄ້າພາຍໃນແຂວງ ໃຫ້ເປັນທີ່ຮູ້ຈັກຫຼາຍຂຶ້ນ ກະຕຸ້ນການຜະລິດ ແລະ ຂະຫຍາຍຕະຫຼາດພາຍໃນ ແລະ ຕ່າງປະເທດ. ມີສິນຄ້າຫຼາກຫຼາຍປະເພດທັງສິນຄ້າກະສິກຳ, ອຸດສາຫະກຳ, ຫັດຖະກຳ ແລະ ອຸປະໂພກບໍລິໂພກ ມາວາງສະແດງ ແລະ ຈຳໜ່າຍຫຼາຍກວ່າ 30 ຮ້ານ. ພິເສດມີເພື່ອນຫວຽດນາມ ແລະ ແຂວງໃກ້ຄຽງຣາຊະອະນາຈັກໄທໄດ້ເອົາສິນຄ້າແຂວງຕົນມາວາງຂາຍ ສ້າງບັນຍາກາດຄືກຄື້ນ. ງານວາງສະແດງ, ຈຳໜ່າຍສິນຄ້າໃນຄັ້ງນີ້ ບໍ່ພຽງແຕ່ສະທ້ອນເຖິງການລະນຶກປະຫວັດສາດອັນສຳຄັນ ແຕ່ຍັງເປັນໂອກາດດີໃນການສົ່ງເສີມເສດຖະກິດ, ການທ່ອງທ່ຽວ ແລະ ການຮ່ວມມື ລະຫວ່າງ ລາວ, ຫວຽດນາມ ແລະ ໄທ ໃຫ້ແໜ້ນແຟ້ນຍິ່ງຂຶ້ນ ຊຶ່ງການຈັດງານຄັ້ງນີ້ ຈະດຳເນີນໄປເປັນເວລາ 4 ວັນ (ວັນທີ 18-21 ມີນາ).

ໃນນາມຕາງໜ້າອົງການປົກຄອງແຂວງ, ຂໍເຊື້ອເຊີນບັນດາແຂກທີ່ເຂົ້າຮ່ວມທ່ຽວຊົມຮ້ານວາງສະແດງ ແລະ ຈຳໜ່າຍສິນຄ້າ ທີ່ໄດ້ຈັດຂຶ້ນນະທີ່ນີ້, ພ້ອມທັງເຊີນຊວນໄປທ່ຽວຊົມ ສະຖານທີ່ແຫຼ່ງທ່ອງທ່ຽວທີ່ສໍາຄັນຫຼາຍແຫ່ງພາຍໃນແຂວງ ແລະ ເຂົ້າຮ່ວມພິທີ ເປີດບໍລິການແຫຼ່ງທ່ອງທ່ຽວ ຂຸນກອງແລງ ຊຶ່ງຈະໄດ້ຈັດຂຶ້ນໃນວັນທີ 20 ມີນາ 2026ນີ້.

ເພື່ອຄວາມເປັນສິຣິມຸງຄຸນ ແລະ ເປີດງານຢ່າງເປັນທາງການໂອກາດດັ່ງກ່າວ, ທ່ານ ໄຊຊະນະ ໂຄດພູທອນ ຍັງໄດ້ໃຫ້ກຽດ ຕັດແຖບຜ້າ ແລະ ລັ່ນຄ້ອງ ຮ່ວມກັບບັນດາການນໍາແຂວງ, ພ້ອມທັງ ເລາະຢ້ຽມຊົມ-ຊື້ສິນຄ້າ ພາຍໃນງານ.

(ຂ່າວ: ມະນີວັນ. ພາບ: ກອງຄໍາ)