 |
ທ່ານ ບຸນທະວີ ພິລະວັນ ຮອງປະທານຄະນະກຳມະການເລືອກຕັ້ງຂັ້ນເມືອງ ຫົວໜ້າຄະນະປະຈໍາການ ໄດ້ລາຍງານການຈັດຕັ້ງປະຕິບັດວຽດງານ ໃນບາດກ້າວທີ 1 ແລະ ແຜນການເຄື່ອນໄຫວບາດກ້າວທີ 2 ຂອງຄະນະກຳມະການເລືອກຕັ້ງຂັ້ນເມືອງ ໂດຍປະຕິບັດຕາມ ຄຳແນະນຳ ສະບັບເລກທີ 03/ຄລຂ.ຄມ, ລົງວັນທີ 05 ທັນວາ 2025 ກ່ຽວກັບການແຕ່ງຕັ້ງຄະນະກຳມະການເລືອກຕັ້ງຂັ້ນເມືອງ ແລະ ຄະນະຮັບຜິດຊອບ ໜ່ວຍປ່ອນບັດເລືອກຕັ້ງ.
ເມືອງໄຊບົວທອງ ໄດ້ດຳເນີນການກະກຽມຄວາມພ້ອມ ໃຫ້ແກ່ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຄື: ຈັດກອງປະຊຸມປຶກສາຫາລືຮ່ວມກັບ ຄະນະ ສສຂ ປະຈໍາເຂດເລືອກຕັ້ງເມືອງ ກ່ຽວກັບການກະກຽມການເລືອກຕັ້ງ, ດຳເນີນກອງປະຊຸມ ປະຖົມມະລຶກ ເພື່ອຄົ້ນຄວ້າ ພິຈາລະນາ ຮັບຮອງເອົາບັນດາເນື້ອໃນເອກະສານສໍາຄັນ ເປັນຕົ້ນ ມະຕິ ວ່າດ້ວຍການແຕ່ງຕັ້ງ ແລະ ການເຄື່ອນໄຫວ ຂອງບັນດາອະນຸກຳມະການຊ່ວຍວຽກ, ມະຕິ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຄະນະກຳມະການເລືອກຕັ້ງຂັ້ນເມືອງ, ແຜນດໍາເນີນງານ ຂອງຄະນະກຳມະການເລືອກຕັ້ງຂັ້ນເມືອງ, ມະຕິ ວ່າດ້ວຍການແບ່ງຄວາມຮັບຜິດຊອບ ພາຍໃນຄະນະກຳມະການເລືອກຕັ້ງເມືອງໄຊບົວທອງ, ມະຕິ ຂອງຄະນະກໍາມະການເລືອກຕັ້ງຂັ້ນເມືອງ ວ່າດ້ວຍການແຕ່ງຕັ້ງຄະນະຮັບຜິດຊອບໜ່ວຍປ່ອນບັດເລືອກຕັ້ງ, ແຜນງົບປະມານຮັບໃຊ້ໃຫ້ແກ່ບັ້ນເລືອກຕັ້ງ, ເກັບກໍາຂໍ້ມູນ ເປົ້າໝາຍຜູ້ມີສິດປ່ອນບັດເລືອກຕັ້ງ ແລະ ການຄົ້ນຄວ້າບຸກຄະລາກອນຜູ້ອອກສະໝັກຮັບເລືອກຕັ້ງຂັ້ນເມືອງ.
ສໍາລັບມາດຕະການ ຈັດຕັ້ງປະຕິບັດ ໃນບາດກ້າວທີ 2, ຄະນະກໍາມະການເລືອກຕັ້ງຂັ້ນເມືອງ ນໍາພາ-ຊີ້ນໍາ ວຽກງານຢູ່ແຕ່ລະຂົງເຂດ ເປັນເຈົ້າການຕິດຕາມຊຸກຍູ້, ກວດກາການຈັດຕັ້ງປະຕິບັດວຽກງານທີ່ຍັງຄ້າງໃນບາດກ້າວທີ 1 ແລະ ວຽກງານໃນບາດກ້າວທີ່ 2 ເພື່ອຮັບປະກັນເຮັດໃຫ້ການດໍາເນີນການເລືອກຕັ້ງ ສໍາເລັດຕາມກໍານົດເວລາ, ບັນດາອະນຸກໍາມະການ ເປັນເຈົ້າການຜັນຂະຫຍາຍແຜນການເຄື່ອນໄຫວວຽກງານ ຂອງຄະນະກໍາມະການເລືອກຕັ້ງຂັ້ນເມືອງ ເປັນແຜນວຽກລະອຽດ ແລະ ຍົກສູງຄວາມຮັບຜິດຊອບໃນການຈັດຕັ້ງປະຕິບັດ ແນໃສ່ເຮັດໃຫ້ແຜນວຽກຂອງຄະນະກໍາມະການເລືອກຕັ້ງຂັ້ນເມືອງ ໄດ້ບັນລຸຕາມຄາດໝາຍທີ່ວາງໄວ້, ການຈັດຕັ້ງປະຕິບັດວຽກງານຕົວຈິງ ຂອງແຕ່ລະອະນຸກໍາມະການ ຫາກພົບຄວາມຫຍຸ້ງຍາກ ໃຫ້ຮີບຮ້ອນລາຍງານ ຄະນະປະຈໍາການ ຄະນະກໍາມະການເລືອກຕັ້ງຂັ້ນເມືອງ ເພື່ອມີທິດຊີ້ນໍາໃນການແກ້ໄຂໃຫ້ທັນເວລາ ແລະ ຮັບປະກັນປະສິດທິຜົນຂອງວຽກງານ.
ຈຸດປະສົງໃນການລົງເຄື່ອນໄຫວຂອງຄະນະກຳມະການເລືອກຕັ້ງລະດັບຊາດ ແລະ ລະດັບແຂວງ ໃນຄັ້ງນີ້, ເພື່ອຕິດຕາມ, ຊຸກຍູ້ ການກະກຽມຄວາມພ້ອມ ໃຫ້ແກ່ບັ້ນເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຢູ່ເມືອງໄຊບົວທອງ ເພື່ອແນໃສ່ເຮັດໃຫ້ບັ້ນເລືອກຕັ້ງ ຮັບປະກັນໄດ້ 4 ຄາດໝາຍໃຫຍ່ຄື: ຮັບປະກັນໃຫ້ຜູ້ມີສິດເລືອກຕັ້ງໄປໃຊ້ສິດຢ່າງຄົບຖ້ວນ, ຮັບປະກັນການໃຊ້ສິດ (ຂີດບັດ) ຢ່າງຖືກຕ້ອງ, ຮັບປະກັນຄວາມສະຫງົບ ຄວາມປອດໄພ ຕະຫຼອດໄລຍະການເຄື່ອນໄຫວໃນບັ້ນເລືອກຕັ້ງ ແລະ ຮັບປະກັນຄວາມໂປ່ງໃສ ແລະ ຢຸດຕິທຳ.
(ຂ່າວ-ພາບ: ກອງຄໍາ)
ຄໍາເຫັນ