ໃນພິທີ, ຕາງໜ້າຄະນະຈັດຕັ້ງແຂວງ ໄດ້ຜ່ານບັນດາຂໍ້ຕົກລົງກ່ຽວກັບວຽກງານພະນັກງານ ໃນນັ້ນປະກອບມີການອະນຸມັດໃຫ້ພະນັກງານ-ລັດຖະກອນ ຈໍານວນ 3 ທ່ານ ອອກພັກການ-ຮັບອຸດໜູນບໍານານ ປະກອບມີ: ທ່ານ ໄພວັນ ໜຸ່ນຄໍາໄຊ, ທ່ານ ຄູນມີ ແສນປັນຍາ ແລະ ທ່ານ ອຸລິຄິດ ແກ້ວສີສະໂນ ພະນັກງານ-ລັດຖະກອນ ຄະນະຈັດຕັ້ງແຂວງຄໍາມ່ວນ.
ພ້ອມກັນນັ້ນ ຍັງໄດ້ປະກາດການຍົກຍ້າຍພະນັກງານນໍາພາ-ຄຸ້ມຄອງ ຈໍານວນ 2 ທ່ານ ໄປຮັບໜ້າທີ່ ໃໝ່ຢູ່ສະພາປະຊາຊົນແຂວງ ຄື: ທ່ານ ມະໂນທໍາ ມະນີສົດໃສ ຮອງຫົວໜ້າຫ້ອງວ່າການແຂວງ ແລະ ທ່ານ ນາງ ສຸດປະເສີດ ສຸລິວົງ ຮອງຫົວໜ້າໂຮງຮຽນການເມືອງ ແລະ ການປົກຄອງແຂວງ.
ສ່ວນການແຕ່ງຕັ້ງພະນັກງານນໍາພາ-ຄຸ້ມຄອງໃໝ່ ມີຈໍານວນ 6 ທ່ານ ປະກອບມີ: ທ່ານ ວັນທະວີ ສານຸວົງ ຮອງຫົວໜ້າພະແນກການຕ່າງປະເທດແຂວງ ເປັນວ່າການຫົວໜ້າພະແນກການຕ່າງປະເທດແຂວງ, ທ່ານ ນາງ ມິດທຸມພອນ ໄຊຊະນະວົງ ຫົວໜ້າຂະແໜງຄົ້ນຄວ້າ-ສັງລວມ, ທ່ານ ສຸພັນ ພັນທະລາສີ ຫົວໜ້າຂະແໜງກໍ່ສ້າງຮາກຖານການເມືອງ ແລະ ທ່ານ ທອງຫານ ສຸວັນທອງ ເລຂາທ່ານເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ ເປັນຮອງຫົວໜ້າຫ້ອງວ່າການແຂວງ, ທ່ານ ສຸລິໂຍ ແກ້ວແກ່ນຈັນ ເປັນຮອງຫົວໜ້າໂຮງຮຽນການເມືອງ-ການປົກຄອງແຂວງ ແລະ ທ່ານ ນາງ ດອກຊ້ອນ ມະນີຄໍາ ກຳມະການໜ່ວຍພັກ, ຫົວໜ້າຂະແໜງຄຸ້ມຄອງພະນັກງານ, ລັດຖະກອນ-ພະລາກອນ ເປັນຮອງຫົວໜ້າຄະນະຈັດຕັ້ງແຂວງຄໍາມ່ວນ.
ໃນໂອກາດດັ່ງກ່າວ, ທ່ານ ສົມໃຈ ພານີຈັນ ໄດ້ໃຫ້ຄໍາໂອ້ລົມ ໂດຍເນັ້ນໜັກວ່າ ການຍົກຍ້າຍ ແລະ ແຕ່ງຕັ້ງພະນັກງານໃນຄັ້ງນີ້ ແມ່ນເປັນວຽກງານປົກກະຕິ ຕາມຄວາມຈໍາເປັນຂອງໜ້າທີ່ວຽກງານ ເພື່ອເປັນການສ້າງປະສົບການ, ເພີ່ມທະວີຄວາມຮູ້ ແລະ ຄວາມຊໍານານໃນຫຼາຍຂົງເຂດ. ພ້ອມທັງຮຽກຮ້ອງໃຫ້ບັນດາພະນັກງານ ແລະ ສະມາຊິກພັກ ສືບຕໍ່ສ້າງຄວາມສາມັກຄີ, ສົ່ງເສີມຄວາມຮັບຜິດຊອບ, ປັບປຸງຄຸນນະພາບວຽກງານ ແລະ ຮ່ວມກັນຜັນຂະຫຍາຍມະຕິ ແລະ ແຜນງານຕ່າງໆ ໃຫ້ມີປະສິດທິຜົນ ເພື່ອຍົກລະດັບການພັດທະນາອົງກອນ ແລະ ວຽກງານໃຫ້ຂະຫຍາຍຕົວຢ່າງຕໍ່ເນື່ອງ.
ຂ່າວ: ກອງຄໍາ
ຄໍາເຫັນ