ທີ່ສະໂມສອນເມືອງອະນຸວົງ ແຂວງໄຊສົມບູນ ໂດຍການເປັນປະທານຂອງທ່ານ ແດງ ປະທຸມທອງ ຮອງເລຂາພັກແຂວງປະທານສະພາປະຊາຊົນ ແຂວງ, ມີທ່ານ ພັອ ວິໄຊທໍ່ ເພຍຫຼວງຈົ່ງເສີ ຮອງປະທານສະພາປະຊາຊົນແຂວງ, ເປັນກຽດເຂົ້າຮ່ວມຂອງ ທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ,ມີສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ຕະຫຼອດຮອດພະແນກການ, ອົງການ, ກົມກອງ ອ້ອມຂ້າງແຂວງ ເຂົ້າຮ່ວມ.
ໂອກາດນີ້, ທ່ານ ແດງ ປະທຸມທອງ ໄດ້ກ່າວໄຂກອງປະຊຸມວ່າ: ກອງປະຊຸມໃນຄັ້ງນີ້, ເພື່ອສະຫຼຸບຖອດຖອນບົດຮຽນແບບແຜນການເຄື່ອນໄຫວວຽກງານ ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ປະຈຳປີ 2024 ແລະ ກໍານົດແຜນການເຄື່ອນໄຫວວຽກງານ ປີ 2025 ພ້ອມທັງຕີລາຄາຄືນຜົນການຈັດຕັ້ງປະຕິບັດວຽກງານຜ່ານມາຂອງສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ່ 18 ໂດຍສະເພາະແມ່ນບັນດາຈຸດອ່ອນ ແລະ ຂໍ້ຄົງຄ້າງຕ່າງໆ ຈົ່ງພ້ອມກັນຄົ້ນຄວ້າປະກອບຄໍາຄິດຄໍາເຫັນ, ສະເໜີວິທີການຈັດຕັ້ງປະຕິບັດ ພ້ອມທັງພິຈາລະນາ ແລະ ຮັບຮອງເອົາບັນຫາສໍາຄັນພື້ນຖານຂອງຊາດ ແລະ ຂອງແຂວງ ເພື່ອໃຫ້ມີເນື້ອໃນຄົບຖ້ວນສົມບູນ ແລະ ປັບປຸງ ໃຫ້ມີຄວາມຮັດກຸມຂຶ້ນກວ່າເກົ່າ.ຈາກນັ້ນ, ທ່ານ ພັອ ວິໄຊທໍ່ ເພຍຫຼວງຈົ່ງເສີ ໄດ້ລາຍງານການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ປະຈຳປີ 2024 ແລະ ທິດທາງແຜນການປີ 2025 ຊຶ່ງຕະຫຼອດໄລຍະ 1 ປີ ຜ່ານມາ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ໃນນາມເປັນຕົວແທນແຫ່ງສິດຜົນປະໂຫຍດຂອງປະຊາຊົນ ໄດ້ເອົາໃຈໃສ່ໃນການຈັດຕັ້ງພາລະບົດບາດຂອງຕົນ ຕໍ່ການປົກປັກຮັກສາ ແລະ ພັດທະນາ ແຂວງໄຊສົມບູນ ພ້ອມທັງ ຍົກສູງບົດບາດການເປັນຕົວແທນໃຫ້ແກ່ປະຊາຊົນ ເປັນຕົ້ນ ໄດ້ເຂົ້າຮ່ວມ ກອງປະຊຸມສະໄໝສາມັນ ຂອງສະພາແຫ່ງຊາດ ແລະ ໄດ້ຄົ້ນຄວ້າປະກອບຄໍາຄິດຄໍາເຫັນ ຕໍ່ກັບຫຼາຍບັນຫາທີ່ສໍາຄັນ ທີ່ນໍາມາພິຈາລະນາຄົ້ນຄວ້າໃນກອງປະຊຸມ ຊຶ່ງໄດ້ມີການພິຈາລະນາຮັບຮອງເອົາວຽກງານຂອງສະພາແຫ່ງຊາດ ແລະ ວຽກງານຂອງລັດຖະບານ ໂດຍໄດ້ອອກເປັນມະຕິ ຈຳນວນ 36 ສະບັບ, ຮັບຮອງເອົາການສ້າງ ແລະ ປັບປຸງກົດໝາຍ 31 ສະບັບ, ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ່ 18, ສະມາຊິກສະພາປະຊາຊົນແຂວງ ແລະ ອົງການປົກຄອງແຂວງ ໄດ້ປະເມີນກົດໝາຍ ຈຳນວນ 4 ສະບັບ, ສຳເລັດການເຂົ້າຮ່ວມກອງປະຊຸມ ກວດກາຄວາມສອດຄ່ອງທາງດ້ານເນື້ອໃນຂອງຮ່າງກົດໝາຍ ຈຳນວນ 8 ສະບັບ, ສຳເລັດການທາບທາມ ກົດໝາຍ ຈຳນວນ 3 ສະບັບ, ພ້ອມນີ້ຍັງໄດ້ລົງເຜີຍແຜ່ໂຄສະນາລັດຖະທຳມະນູນ ແລະ ມະຕິກອງ ປະຊຸມສະພາແຫ່ງຊາດ ໃຫ້ແກ່ຜູ້ມີສິດເລືອກຕັ້ງຕາມຂອບເຂດຄວາມຮັບຜິດຊອບຂອງຕົນ ໄດ້ 88 ກວ່າຈຸດ ແລະ ໄດ້ຕິດຕາມກວດກາສະເພາະບັນດານິຕິກຳຂອງລັດຖະບານ ເປັນຕົ້ນຈັດຕັ້ງປະຕິບັດດຳລັດ 414/ລບ ຂອງລັດຖະບານ ຕິດພັນກັບສອງວາລະແຫ່ງຊາດ, ການຈັດຕັ້ງປະຕິບັດຂໍ້ຕົກລົງ ວ່າດ້ວຍການກຳນົດເງືອນໄຂໃນການເຈລະຈາສັນຍາຂຸດຄົ້ນແຮ່ເຫຼັກໃນໄລຍະທົດລອງ ແລະ ແຮ່ຄໍາຕົກຂ້ອນແບບທົດລອງ ສ່ວນວຽກງານດ້ານອື່ນໆ ກໍໄດ້ມີການຈັດຕັ້ງປະຕິບັດ ແລະ ມີຜົນສຳເລັດຕາມລະດັບຄາດໝາຍ. ຈາກນັ້ນ ຜູ້ເຂົ້າຮ່ວມກອງປະຊຸມ ຍັງໄດ້ພ້ອມກັນຄົ້ນຄວ້າ ປະກອບຄຳຄິດຄຳເຫັນໃສ່ຮ່າງບົດສະຫຼຸບກົງໄປກົງມາຢ່າງມີຈຸດສຸມ ເພື່ອເຮັດໃຫ້ມີເນື້ອໃນຄົບຖ້ວນສົມບູນ ແລະ ສອດຄ່ອງກັບການຈັດຕັ້ງປະຕິບັດໜ້າທີວຽກງານຂອງບັນດາສະມາຊິກສະພາແຫ່ງຊາດໃນຕໍ່ໜ້າ.
(ແຫຼ່ງຂ່າວ: ແຂວງໄຊສົມບູນ)
ຄໍາເຫັນ