ທ່ານ ຄໍາແພງ ວິລະພັນ ປະທານກຳມາທິການກົດໝາຍ ຂອງສະພາແຫ່ງຊາດ ໄດ້ຕາງໜ້າຄະນະປະຈໍາສະພາແຫ່ງຊາດ ກ່າວບົດປະກອບຄໍາເຫັນຕໍ່ບົດລາຍງານຂອງລັດຖະບານ ກ່ຽວກັບວຽກງານການໂຄສະນາ ເຜີຍແຜ່ກົດໝາຍ ຕໍ່ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ IX ໃນຕອນແລງວັນທີ 13 ມິຖຸນານີ້ ທີ່ຫໍສະພາແຫ່ງຊາດ ພາຍໃຕ້ການເປັນປະທານຂອງ ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ.
ທ່ານ ຄໍາແພງ ວິລະພັນ ກ່າວວ່າ: ຜ່ານການຈັດຕັ້ງການໂຄສະນາ ເຜີຍແຜ່ກົດໝາຍໃນຕະຫຼອດໄລຍະທີ່ຜ່ານມາ ສາມາດເຮັດໃຫ້ສະຕິກົດໝາຍຂອງສັງຄົມ ນັບມື້ໄດ້ຮັບການປັບປຸງໃຫ້ສູງຂຶ້ນ, ການເຄົາລົບ ແລະ ປະຕິບັດກົດໝາຍ ມີຄວາມເຂັ້ມງວດຫຼາຍຂຶ້ນໃນແຕ່ລະໄລຍະ ອັນເປັນການປະກອບສ່ວນສໍາຄັນ ເຂົ້າໃນການພັດທະນາເສດຖະກິດ-ສັງຄົມ, ປົກປັກຮັກສາຄວາມເປັນລະບຽບຮຽບຮ້ອຍ ແລະ ຄວາມຍຸຕິທໍາໃນສັງຄົມດີຂຶ້ນເປັນກ້າວໆ. ຄຽງຄູ່ກັບດ້ານດີ ທີ່ກ່າວມາຂ້າງເທິງນັ້ນ, ຄະນະປະຈໍາສະພາແຫ່ງຊາດ ຍັງເຫັນວ່າ ມີບາງດ້ານທີ່ຈະຕ້ອງໄດ້ເອົາໃຈໃສ່ ດັ່ງນີ້: ການໂຄສະນາ ເຜີຍແຜ່ກົດໝາຍ ໃນໄລຍະຜ່ານມາຂອງບັນດາກະຊວງ, ອົງການ, ອົງການປົກຄອງທ້ອງຖິ່ນ ຍັງບໍ່ທັນໄດ້ຮັບການຈັດຕັ້ງປະຕິບັດຢ່າງແຂງແຮງ, ກວ້າງຂວາງ ແລະ ເລິກເຊິ່ງ ທົ່ວທຸກເປົ້າໝາຍເທົ່າທີ່ຄວນ; ການໂຄສະນາ ເຜີຍແຜ່ກົດໝາຍ ຍັງບໍ່ທັນມີຫຼາຍຮູບ ຫຼາຍສີ, ບໍ່ທັນມີຈຸດສຸມ ແລະ ແທດເຖິງທຸກເປົ້າໝາຍ ສ່ວນຫຼາຍແມ່ນຍັງເຮັດຕິດພັນກັບວຽກງານອື່ນ ແລະ ບໍ່ຕໍ່ເນື່ອງ; ການເລືອກເຟັ້ນເອົາເນື້ອໃນຂອງກົດໝາຍ ໄປໂຄສະນາເຜີຍແຜ່ ຍັງບໍ່ທັນຕິດພັນກັບຊີວິດປະຈໍາວັນຂອງ ປະຊາຊົນ ແລະ ບໍ່ທັນມີຄວາມເປັນເອກະພາບກັນ, ມີລັກສະນະເຮັດພໍໃຜພໍລາວ ບໍ່ທັນມີແຜນການ ແລະ ມາດຕະການ ທີ່ເໝາະສົມ; ການກໍ່ສ້າງ, ບໍາລຸງ, ຍົກລະດັບພະນັກງານ-ລັດຖະກອນ ທີ່ເຮັດໜ້າທີ່ໃນການໂຄສະນາ ເຜີຍແຜ່ກົດໝາຍ ຍັງ ເຮັດໄດ້ໜ້ອຍ ບໍ່ທັນສາມາດສ້າງໄດ້ພະນັກງານທີ່ມີຄວາມຊໍານິຊໍານານແທ້; ງົບປະມານ, ພາຫະນະ ແລະ ອຸປະກອນ ສະໜອງໃຫ້ແກ່ວຽກງານໂຄສະນາເຜີຍແຜ່ກົດໝາຍ ບໍ່ທັນຕອບສະໜອງໄດ້ ຕາມຄວາມຮຽກຮ້ອງຕ້ອງການ ຍິ່ງໄປກວ່ານັ້ນບາງກະຊວງ, ອົງການ ບໍ່ທັນໄດ້ສ້າງແຜນງົບປະມານຮັບໃຊ້ວຽກງານດັ່ງກ່າວ.
ພ້ອມນີ້, ຄະນະປະຈໍາສະພາແຫ່ງຊາດ ເປັນເອກະພາບສູງຕໍ່ກັບ 6 ທິດທາງແຜນການ ທີ່ລັດຖະບານໄດ້ສະເໜີຢູ່ໃນບົດລາຍງານ; ແຕ່ເພື່ອເຮັດໃຫ້ວຽກງານໂຄສະນາເຜີຍແຜ່ກົດໝາຍ ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ ແລະ ປະສິດທິຜົນ, ຄະນະປະຈໍາສະພາແຫ່ງຊາດ ຂໍສະເໜີເພີ່ມເຕີມ ຄື: ໃຫ້ລັດຖະບານ, ອົງການ ຄົ້ນຄວ້າສ້າງຄູ່ມືການໂຄສະນາ ເຜີຍແຜ່ກົດໝາຍ ໂດຍຄັດຈ້ອນເອົາເນື້ອໃນຂອງກົດໝາຍ ທີ່ຕິດພັນກັບຄວາມຮັບຜິດຊອບການເມືອງ ຂອງພະນັກງານ-ລັດຖະກອນ, ທະຫານ, ຕໍາຫຼວດ ກໍຄືເນື້ອໃນທີ່ຕິດພັນກັບຊີວິດປະຈໍາວັນຂອງປະຊາຊົນ ເພື່ອໂຄສະນາ ເຜີຍແຜ່ ເຊື່ອມຊຶມໃຫ້ເລິກເຊິ່ງ ແລະ ທົ່ວເຖິງ; ໃຫ້ລັດຖະບານຊຸກຍູ້ບັນດາກະຊວງ, ອົງການລັດທຽບເທົ່າກະຊວງ, ອົງການປົກຄອງທ້ອງຖິ່ນ ຄົ້ນຄວ້າສ້າງຖານຂໍ້ມູນ-ຂ່າວສານ ທີ່ທັນສະໄຫມ ເພື່ອເປັນແຫຼ່ງຂໍ້ມູນໃຫ້ປະຊາຊົນລາວບັນດາເຜົ່າ ໄດ້ເຂົ້າເຖິງກົດໝາຍສະດວກ ແລະ ວ່ອງໄວ.
(ຂ່າວ-ພາບ: ສຸກສະຫວັນ)
ຄໍາເຫັນ