ທ່ານ ນາງ ທຸມມາລີ ວົງພະຈັນ ກ່າວວ່າ: ຄະນະປະຈໍາສະພາແຫ່ງຊາດ ສະແດງຄວາມຊົມເຊີຍ ແລະ ຕີລາຄາສູງຕໍ່ ສປສສ ທີ່ໄດ້ມີຄວາມພະຍາຍາມນໍາພາ-ຊີ້ນໍາ ສານປະຊາຊົນແຕ່ລະຂັ້ນ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ມະຕິກອງປະຊຸມສະພາແຫ່ງຊາດ ກ່ຽວກັບແຜນການເຄື່ອນໄຫວວຽກງານ 5 ປີ (2021-2025) ແລະ ປະຈໍາປີ 2025 ຂອງສານປະຊາຊົນສູງສຸດ ດ້ວຍຄວາມເປັນເຈົ້າການ ແລະ ມີຜົນສໍາເລັດຫຼາຍດ້ານ ເປັນຕົ້ນ ການພັດທະນາແບບແຜນ ແລະ ກົນໄກການດໍາເນີນຄະດີ; ການສ້າງ, ພັດທະນາບຸກຄະລາກອນ, ການແຕ່ງຕັ້ງ, ບັນຈຸສັບຊ້ອນໄດ້ມີຄຸນນະພາບດີຂຶ້ນ; ລະບົບການຈັດຕັ້ງໄດ້ຮັບການພັດທະນາຫຍັບເຂົ້າຫາປະຊາຊົນ, ສໍາເລັດການສ້າງຕັ້ງສານປົກຄອງ; ການຕັດສິນ, ພິພາກສາຄະດີມີຄວາມໂປ່ງໃສ, ວ່ອງໄວ, ຖືກຕ້ອງແລະມີຄວາມຍຸຕິທໍາດີຂຶ້ນຕາມລໍາດັບ; ກົດໝາຍແລະນິຕິກໍາໃຕ້ກົດໝາຍທີ່ພົວພັນກັບການຈັດຕັ້ງແລະການເຄື່ອນໄຫວຂອງສານປະຊາຊົນໄດ້ຮັບການສ້າງແລະປັບປຸງໃຫ້ມີຄວາມຖືກຕ້ອງ, ສອດຄ່ອງກັບສະພາບການພັດທະນາເສດຖະກິດ-ສັງຄົມເຮັດໃຫ້ການເຄື່ອນໄຫວວຽກງານຂອງສານປະຊາຊົນແຕ່ລະຂັ້ນມີຄວາມໜັກແໜ້ນແລະເຂັ້ມແຂງຂຶ້ນ.
ສຳລັບ, ການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2025ຄະນະປະຈໍາສະພາແຫ່ງຊາດເຫັນວ່າສປສສ ໄດ້ເອົາໃຈໃສ່ແລະເປັນເຈົ້າການປະຕິບັດເນື້ອໃນຄາດໝາຍທີ່ກໍານົດໄວ້ໃນມະຕິສະບັບເລກທີ 141/ສພຊ, ລົງວັນທີ 11 ທັນວາ 2024 ມີຜົນສໍາເລັດເປັນຕົ້ນການສ້າງຕັ້ງສານປະຊາຊົນເຂດ 2 ແຂວງອັດຕະປື, ບຸກຄະລາກອນໄດ້ຮັບການແຕ່ງຕັ້ງເປັນຜູ້ພິພາກສາຫຼາຍຂຶ້ນ; ການຕິດຕາມກວດກາ, ຊຸກຍູ້ການດໍາເນີນຄະດີຂອງສານປະຊາຊົນທ້ອງຖິ່ນໄດ້ມີຄວາມວ່ອງໄວແລະສອດຄ່ອງກັບກົດໝາຍ; ການສ້າງແລະປັບປຸງນິຕິກໍາເພື່ອເປັນບ່ອນອີງໃຫ້ແກ່ການເຄື່ອນໄຫວວຽກງານຂອງສານໂດຍສະເພາະແມ່ນກົນໄກການຄົ້ນຄວ້າຄໍາຮ້ອງແລະການພິຈາລະນາຮື້ຟື້ນຄະດີຕາມກົດໝາຍວ່າດ້ວຍການດໍາເນີນຄະດີແພ່ງສະບັບປັບປຸງປີ 2024 ໄດ້ມີການຫັນປ່ຽນທີ່ຕັ້ງໜ້າ.
ຄຽງຄູ່ກັບດ້ານດີ ແລະ ຜົນສໍາເລັດດັ່ງກ່າວ, ຄະນະປະຈໍາສະພາແຫ່ງຊາດ ສັງເກດເຫັນວ່າ ການຈັດຕັ້ງປະຕິບັດແຜນການ 5 ປີ ຜ່ານມາ ແລະ ວຽກງານປະຈໍາປີ 2025 ຂອງ ສປສສ ຍັງມີບາງດ້ານ ບໍ່ທັນບັນລຸຕາມແຜນການທີ່ກໍານົດໄວ້ ແລະ ຄວນສືບຕໍ່ເອົາໃຈໃສ່. ຄະນະປະຈໍາສະພາແຫ່ງຊາດເຫັນດີເປັນເອກະພາບໂດຍພຶ້ນຖານຕໍ່ທິດທາງແຜນການ 5 ປີ (2026- 2030) ຊຶ່ງໄດ້ກໍານົດ 5 ແຜນງານ 23 ໂຄງການ 77 ກິດຈະກໍາທີ່ຈະນໍາສະເໜີຕໍ່ກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີX ແຕ່ສະເໜີໃຫ້ ສປສສ ກວດກາຄືນແຜນງານ, ໂຄງການແລະກິດຈະກໍາທີ່ໄດ້ກໍານົດຢູ່ໃນແຜນ 5 ປີຜ່ານມາໂດຍສະເພາະວຽກທີ່ບໍ່ສາມາດຈັດຕັ້ງປະຕິບັດໄດ້ແລະຍັງມີຈັກວຽກ, ຈັກຄາດໝາຍທີ່ຈະສືບຕໍ່ປະຕິບັດເພື່ອເປັນບ່ອນອີງໃຫ້ແກ່ການກໍານົດທິດທາງແຜນການໃນ 5 ປີຕໍ່ໜ້າໃຫ້ມີຄວາມຖືກຕ້ອງທັງໃຫ້ສອດຄ່ອງແລະເຊື່ອມສານເຂົ້າກັບແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີX ແລະເປັນແຜນການທີ່ສາມາດປະຕິບັດໄດ້ຕົວຈິງ;ສໍາລັບທິດທາງແຜນການວຽກງານຈຸດສຸມປີ 2026 ຄະນະປະຈໍາສະພາແຫ່ງຊາດຂໍສະແດງຄວາມເຊີຍແລະເປັນເອກະພາບຕໍ່ການກໍານົດຄືດັ່ງກ່າວເພາະເປັນປີທໍາອິດຂອງການຈັດຕັ້ງປະຕິບັດປະຕິບັດແຜນ 5 ປີ (2026-2030) ແຕ່ເພື່ອເຮັດໃຫ້ທິດທາງແຜນການດັ່ງກ່າວໄດ້ຮັບການຈັດຕັ້ງປະຕິບັດມີຜົນສໍາເລັດຄະນະປະຈໍາສະພາແຫ່ງຊາດສະເໜີ 6 ຄໍາຄິດເຫັນດັ່ງນີ້:
1). ໃຫ້ເປັນເຈົ້າການຜັນຂະຫຍາຍແລະນໍາພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີXII ຂອງພັກ, ມະຕິກອງປະຊຸມໃຫຍ່ຄັ້ງທີV ຂອງອົງຄະນະພັກສານປະຊາຊົນສູງສຸດ, ມະຕິກອງປະຊຸມສະພາແຫ່ງຊາດຊຸດທີX ແລະແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີX ໃຫ້ມີປະສິດທິພາບແລະປະສິດທິຜົນ;
2). ເພີ່ມທະວີການສຶກສາອົບຮົມການເມືອງ-ແນວຄິດ, ຈັນຍາບັນ, ຈັນຍາທໍາໃຫ້ແກ່ຜູ້ພິພາກສາ, ພະນັກງານ-ລັດຖະກອນຂອງສານປະຊາຊົນຕິດພັນກັບການບໍາລຸງ, ຍົກລະດັບດ້ານວິຊາສະເພາະ, ຄວາມຮູ້ຄວາມສາມາດ, ທັກສະໃນການຄົ້ນຄວ້າຄະດີກໍຄືຄວາມເປັນແບບຢ່າງໃນການເຄົາລົບແລະປະຕິບັດກົດໝາຍຢ່າງເຂັ້ມງວດເພື່ອຮັບປະກັນໃຫ້ການປະຕິບັດພາລະບົດບາດ, ສິດແລະໜ້າທີ່ຂອງສານປະຊາຊົນແຕ່ລະຂັ້ນໃຫ້ມີຄວາມໜັກແໜ້ນແລະເຂັ້ມແຂງ, ສາມາດປະຕິບັດໜ້າທີ່ຕາມກົດໝາຍກໍານົດໄວ້ພ້ອມທັງເອົາໃຈໃສ່ຕິດຕາມກວດກາປະເມີນເພຶ່ອເລືອກເຟັ້ນໃຫ້ໄດ້ຜູ້ພິພາກສາດີ-ເກັ່ງຕອບສະໜອງກັບໜ້າທີ່ການເມືອງໃນໄລຍະໃໝ່;
3). ສຸມໃສ່ຄົ້ນຄວ້າປັບປຸງກົງຈັກການຈັດຕັ້ງຂອງສານປະຊາຊົນແຕ່ລະຂັ້ນໃຫ້ເປັນລະບົບ, ເໝາະສົມແລະສອດຄ່ອງກັບການປັບປຸງອົງການປົກຄອງຖິ່ນຕາມລັດຖະທໍາມະນູນສະບັບປີ 2025 ເພື່ອສ້າງເງື່ອນໄຂແລະອໍານວຍຄວາມສະດວກການເຂົ້າເຖິງຂະບວນຍຸຕິທໍາຂອງປະຊາຊົນໃຫ້ຫຼາຍຂຶ້ນ;
4). ສືບຕໍ່ຍົກສູງຄຸນນະພາບໃນການດໍາເນີນຄະດີຂອງສານປະຊາຊົນໃຫ້ຮັບປະກັນຄວາມຖືກຕ້ອງຕາມຫຼັກການຂອງການດໍາເນີນຄະດີຄົບຖ້ວນ, ຮອບດ້ານແລະພາວະວິໄສ, ຖືກຕ້ອງແລະເປັນທໍາຕາມກົດໝາຍແລະຄວາມເປັນຈິງ, ຮັບປະກັນການດໍາເນີນຄະດີໃຫ້ມີຄຸນນະພາບພ້ອມທັງສຸມໃສ່ຄົ້ນຄວ້າປັບປຸງກົນໄກ, ຮູບການແລະວິທີການໃນການກວດກາຄໍາຕັດສິນ, ຄໍາພິພາກສາຂອງສານທີ່ມີການລະເມີດກົດໝາຍ, ຄໍາຕັດສິນຫຼືຄໍາພິພາກສາທີ່ມີເນື້ອໃນບໍ່ຈະແຈ້ງຫຼືມີເນື້ອໃນຂັດກັນຊຶ່ງເປັນສາເຫດໃຫ້ການປະຕິບັດຄໍາຕັດສິນຂອງສານມີຄວາມຫຍຸ້ງຍາກຫຼືບໍ່ສາມາດຈັດຕັ້ງປະຕິບັດໄດ້ນັ້ນໃຫ້ມີຜົນສໍາເລັດຢ່າງເປັນຮູບປະທໍາ;
5).ຄົ້ນຄວ້າປັບປຸງນິຕິກໍາໃຕ້ກົດໝາຍທີ່ຈໍາເປັນໂດຍສະເພາະແມ່ນກົນໄກການດໍາເນີນຄະດີແພ່ງທົ່ວໄປຕາມກົດໝາຍວ່າດ້ວຍການດໍາເນີນຄະດີແພ່ງສະບັບປັບປຸງປີ 2024 ແລະກົດໝາຍອື່ນທີ່ກ່ຽວຂ້ອງໃຫ້ມີຄວາມໂລ່ງລ່ຽນພ້ອມທັງໂຄສະນາເຜີຍແຜ່ໃຫ້ກວ້າງຂວາງແລະທົ່ວເຖິງໃຫ້ແກ່ຜູ້ພິພາກສາ, ຜູ້ຊ່ວຍຜູ້ພິພາກສາແລະຈ່າສານກໍຄືຜູ້ເຂົ້າຮ່ວມໃນການດໍາເນີນຄະດີໄດ້ຮັບຮູ້ແລະເຂົ້າໃຈສິດ, ພັນທະແລະຂັ້ນຕອນຂອງການດໍາເນີນຄະດີຢ່າງຈະແຈ້ງໂດຍໃຫ້ຖືສໍາຄັນການປະຕິບັດຫຼັກການໂຕ້ແຍ່ງ, ໂຕ້ຖຽງເລີ່ມແຕ່ຫົວທີໃນຂະບວນການດໍາເນີນຄະດີຂອງສານແຕ່ລະຂັ້ນໃຫ້ເຂັ້ມງວດແລະມີປະສິດທິພາບຢ່າງເປັນຮູບປະທໍາ;
6). ສືບຕໍ່ສ້າງແລະປັບປຸງນິຕິກໍາຮ່ວມກັບພາກສ່ວນກ່ຽວຂ້ອງຕ່າງໆເພື່ອປັບປຸງກົນໄກການປະສານສົມທົບລະຫວ່າງສະພາແຫ່ງຊາດກັບສປສສ, ອົງການໄອຍະການປະຊາຊົນສູງສຸດ, ກະຊວງປ້ອງກັນຄວາມສະຫງົບ, ກະຊວງຍຸຕິທໍາ, ອົງການກວດກາແຫ່ງລັດແລະພາກສ່ວນທີ່ກ່ຽວຂ້ອງໃນການດໍາເນີນຄະດີຕາມຂະບວນຍຸຕິທໍາໃຫ້ມີຄວາມຄ່ອງຕົວກວ່າເກົ່າແນໃສ່ຍົກສູງຄຸນນະພາບຂອງການດໍາເນີນຄະດີແລະໃຫ້ສອດຄ່ອງຕາມພາລະບົດບາດ,ສິດແລະໜ້າທີ່ຂອງແຕ່ລະພາກສ່ວນຕາມກໍານົດໄວ້ໃນກົດໝາຍ.
(ຂ່າວ-ພາບ: ບຸນຕອມ)
ຄໍາເຫັນ