ໂດຍໄດ້ຈັດຂຶ້ນໃນລະຫວ່າງວັນທີ 19-20 ມັງກອນ ຜ່ານມາທີ່ ລັດຈໍຮໍ ບາຣູປະເທດມາເລເຊຍ ພາຍໃຕ້ຄໍາຂວັນ “ສາມັກຄີໜຶ່ງດຽວ ສ້າງອະນາຄົດການທ່ອງທ່ຽວອາຊຽນດ້ວຍກັນ”. ໃນນັ້ນ, ໄດ້ເຂົ້າຮ່ວມກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 28, ກອງປະຊຸມລັດຖະມົນຕີທ່ອງທ່ຽວອາຊຽນ ບວກສາມ (ສປ ຈີນ, ຢີ່ປຸ່ນ, ສ ເກົາຫຼີ) ຄັ້ງທີ 24, ກອງປະຊຸມລັດຖະມົນຕີທ່ອງທ່ຽວ ອາຊຽນ-ອິນເດຍ ຄັ້ງທີ 12 ແລະ ກອງປະຊຸມລັດຖະມົນຕີ ທ່ອງທ່ຽວອາຊຽນ-ຣັດເຊຍ ຄັ້ງທີ 4 ແລະ ງານວາງສະແດງການທ່ອງທ່ຽວອາຊຽນ.
ກອງປະຊຸມໄດ້ທົບທວນ ແລະ ຕີລາຄາການຈັດຕັ້ງປະຕິບັດບັນດາກິດຈະກໍາບຸລິມະສິດ ໄລຍະ 2016-2025 ແລະ ປະກອບຄໍາເຫັນໃສ່ແຜນຍຸດທະສາດການທ່ອງທ່ຽວອາຊຽນ ປີ 2026-2030, ໂດຍເນັ້ນເປົ້າໝາຍຍົກສູງຄຸນນະພາບ, ການທ່ອງທ່ຽວທີ່ມີຄວາມຮັບຜິດຊອບ, ຄວາມຍືນຍົງ, ການມີສ່ວນຮ່ວມ ແລະ ຄວາມສາມາດໃນການປັບຕົວ. ກອງປະຊຸມ ໄດ້ເນັ້ນໜັກເຖິງຄວາມສໍາຄັນຂອງການຮ່ວມມືຂອງບັນດາປະເທດສະມາຊິກອາຊຽນ, ພາກສ່ວນຕ່າງໆທີ່ກ່ຽວຂ້ອງ ແລະ ພາກທຸລະກິດ ເພື່ອບັນລຸການພັດທະນາໃຫ້ມີຄວາມຍືນຍົງ; ກອງປະຊຸມໄດ້ຕີລາຄາຜົນສໍາເລັດຂອງການຮ່ວມມື ໃນປີ 2024 ພາກພື້ນອາຊຽນ ໄດ້ຕ້ອນຮັບນັກທ່ອງທ່ຽວຕ່າງປະເທດ ເຖິງ 123 ລ້ານກວ່າຄົນ ເພີ່ມຂຶ້ນ 30.6% ຈາກປີ 2023, ເນື່ອງຈາກວ່າຫຼາຍປະເທດໄດ້ມີນະໂຍບາຍຕ່າງໆ ເປັນຕົ້ນ ການມີນະໂຍບາຍວີຊາ ແລະ ການພັດທະນາຜະລິດຕະພັນການທ່ອງທ່ຽວໃໝ່ທີ່ຫຼາກຫຼາຍ. ພ້ອມກັນນີ້, ກອງປະຊຸມຍັງໄດ້ສະແດງຄວາມຍ້ອງຍໍຊົມເຊີຍຕໍ່ ສປປ ລາວ ທີ່ໄດ້ເປັນເຈົ້າການໃນການສ້າງມາດຕະຖານການທ່ອງທ່ຽວອະນຸລັກອາຊຽນ (ASEAN Ecotourism Standard), ໃນໄລຍະທີ່ ສປປ ລາວ ເປັນປະທານອາຊຽນ ຊຶ່ງໄດ້ຮັບຮອງຢູ່ກອງປະຊຸມສຸດຍອດອາຊຽນ ໃນເດືອນຕຸລາ 2024 ທີ່ນະຄອນຫຼວງວຽງຈັນ ສປປ ລາວ.
ນອກຈາກນີ້, ກອງປະຊຸມຍັງໄດ້ເຫັນດີ ແລະ ເປັນເອກະພາບກັນ ສົ່ງເສີມ ແລະ ເພີ່ມທະວີຂອບການຮ່ວມມືດ້ານການທ່ອງທ່ຽວອາຊຽນ ໃຫ້ມີຄວາມເຂັ້ມແຂງ ໂດຍສະແດງພັນທະຢ່າງແຂງແຮງໃນການປະກອບສ່ວນ ແລະ ຈັດຕັ້ງປະຕິບັດບັນດາກິດຈະກຳທ່ອງທ່ຽວຢູ່ໃນພາກພື້ນອາຊຽນ ແລະ ພາຍໃນປະເທດຂອງຕົນ ໃຫ້ມີຄວາມເຂັ້ມແຂງ ແລະ ປະກົດຜົນເປັນຈິງ ແລະ ພ້ອມກັນເຂົ້າຮ່ວມປີທ່ອງທ່ຽວອາຊຽນ-ຈີນ 2025, ປີທ່ອງທ່ຽວອາຊຽນ-ອິນເດຍ 2025 ແລະ ກິດຈະກຳທ່ອງທ່ຽວອື່ນໆ ທີ່ປິ່ນອ້ອມຢ່າງຕັ້ງໜ້າ.
(ຂ່າວ-ພາບ: ຍຸພິນທອງ)
ຄໍາເຫັນ