ຄະນະຜູ້ແທນພັກ ປປ ລາວ ຢ້ຽມຢາມ ແລະ ເຮັດວຽກ ຢູ່ ສ ກູບາ

ໃນວັນທີ 8 ສິງຫາ ຜ່ານມາ, ສະຫາຍ ບຸນເຫຼືອ ພັນດານຸວົງ ໄດ້ເຂົ້າຢ້ຽມຂ່ຳນັບ ສະຫາຍ ມີແກນ ດີອັດຊ ກາແນນ (Miguel Díaz Canel) ເລຂາທີໜຶ່ງ ຄະນະບໍລິຫານງານສູນກາງພັກກອມມູນິດກູບາ ປະທານປະເທດ ແຫ່ງ ສ ກູບາ. ໃນການພົບປະ, ສະຫາຍ ເລຂາທິການທີໜຶ່ງ ໄດ້ສະແດງຄວາມຍິນດີຕ້ອນຮັບ ແລະ ຝາກຄວາມຢື້ຢາມຖາມຂ່າວອັນອົບອຸ່ນ ມາຍັງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ຕີລາຄາສູງຕໍ່ການຢ້ຽມຢາມ ຂອງຄະນະຜູ້ແທນພັກປະຊາຊົນ ປະຕິວັດລາວ ໃນໄລຍະປັດຈຸບັນ ທີ່ ກູບາ ພົບຄວາມຫຍຸ້ງຍາກ ຖືເປັນການໃຫ້ກໍາລັງໃຈ ແລະ ສະໜັບສະໜູນ, ທັງເປັນການປະກອບສ່ວນສໍາຄັນໃນການເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນ ແລະ ການຮ່ວມມື ອັນເປັນມູນເຊື້ອຖານສະຫາຍອ້າຍນ້ອງ ລາວ-ກູບາ. ພ້ອມທັງ ແຈ້ງສະພາບຂອງ ສ ກູບາ ໃຫ້ຄະນະຜູ້ແທນພັກປະຊາຊົນ ປະຕິວັດລາວຊາບ.

ໃນໂອກາດດັ່ງກ່າວ, ສະຫາຍ ບຸນເຫຼືອ ພັນດານຸວົງ ໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ສະໜິດສະໜົມ ຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນອປະຕິວັດລາວ ໄປຍັງ ສະຫາຍ ມີແກນ ດີອັດຊ ກາແນນ ເລຂາທີໜຶ່ງ ພັກກອມມູນິດກູບາປະທານປະເທດ ແຫ່ງ ສ ກູບາ, ແຈ້ງຜົນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງ ສູນກາງພັກປະຊາຊົນ ປະຕິວັດລາວ, ມອບສານອວຍພອນວັນເກີດ ສະຫາຍ ຟີແດນ ກາດສະໂຕຣ ຣຸດຊ ຄົບ ຮອບ 100 ປີ ຂອງຄະນະບໍລິຫານງານພັກປະຊາຊົນ ປະຕິວັດລາວ ໃຫ້ສະຫາຍເລຂາທີໜຶ່ງ ຄະນະບໍລິຫານງານສູນກາງພັກກອມມູນິດກູບາ ແລະ ໄດ້ແຈ້ງໂດຍຫຍໍ້ສະພາບພົ້ນເດັ່ນ ຂອງ ສປປ ລາວ ໃຫ້ ພັກກອມມູນິດກູບາຊາບ.

ການພົບປະດັ່ງກ່າວ, ສອງຝ່າຍໄດ້ຕີລາຄາສູງ ແລະ ປິຕິຍິນດີ ທີ່ສາຍພົວພັນ ແລະ ການຮ່ວມມື ທີ່ມີມູນເຊື້ອອັນດີງາມ ລະຫວ່າງ ລາວ ແລະ ກູບາ ສືບຕໍ່ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງ ເຮັດໃຫ້ການພົວພັນທາງດ້ານການເມືອງມີຄວາມໜັກແໜ້ນ, ມີຄວາມເຂົ້າອົກເຂົ້າໃຈກັນດີ ແລະ ສະໜັບສະໜູນຊຶ່ງກັນ ແລະ ກັນ ທັງໃນເວທີພາກພື້ນ ແລະ ສາກົນ; ການພົວພັນຮ່ວມມື ຂອງບັນດາຂະ ແໜງການຂອງສອງປະເທດ ໄດ້ຮັບການເສີມຂະຫຍາຍຢ່າງຕັ້ງໜ້າ ແລະ ມີໝາກຜົນ ນໍາເອົາຜົນປະ ໂຫຍດມາສູ່ປະຊາຊົນສອງຊາດຢ່າງແທ້ຈິງ.

ນອກຈາກ ເຂົ້າຢ້ຽມຂໍ່ານັບການນໍາຂັ້ນສູງຂອງພັກກອມມູນິດກູບາ, ສະຫາຍ ບຸນເຫຼືອ ພັນດານຸວົງ ຍັງໄດ້ພົບປະກັບ ສະຫາຍ ເອມີລິໂອ ຣັດມິຣ ໂລຊາດາ ກາຣເຊຍ ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດກູບາ. ສອງຝ່າຍໄດ້ຕີລາຄາສູງ ແລະ ປິຕິຍິນດີ ຕໍ່ການພົວພັນຮ່ວມມື ລະຫວ່າງ ສອງຄະນະພົວພັນຕ່າງປະເທດສູນກາງພັກ, ປຶກສາຫາລື ແລະ ແລກປ່ຽນທັດສະນະ ຕໍ່ບັນຫາພາກພື້ນ ແລະ ສາກົນ ທີ່ສອງຝ່າຍ ມີຄວາມສົນໃຈ ແລະ ເປັນເອກະພາບກັນ ໃນການສືບຕໍ່ພົວພັນ ແລະ ຮ່ວມມືກັນຢ່າງໃກ້ຊິດ ເພື່ອເຮັດໜ້າທີ່ເປັນເສນາທິການໃຫ້ແກ່ສອງພັກ-ສອງລັດ ມີຄວາມເຂັ້ມແຂງ ແລະ ມີປະສິດທິຜົນສູງຂຶ້ນກວ່າເກົ່າ.

(ຂ່າວ: ຄຕພ)