 |
ການພົບປະລະຫວ່າງ ສອງກະຊວງ ໃນຄັ້ງນີ້ ຖືເປັນນິມິດໝາຍອັນດີ ແລະ ສຸດທີ່ມີຄວາມສໍາຄັນ ເປັນຢ່າງຍິ່ງ ເພື່ອເສີມສ້າງສາຍພົວພັນມິດຕະພາບອັນເປັນມູນເຊື້ອ, ເພີ່ມທະວີການຮ່ວມມື ແລະ ແລກປ່ຽນບົດຮຽນໃນຂະແໜງກະສິກຳ ແລະ ສິ່ງແວດລ້ອມ, ການຄົ້ນຄວ້າ, ການສຶກສາ ແລະ ການລົງທຶນ ຊຶ່ງເປັນຂະແໜງການທີ່ມີບົດບາດສຳຄັນໃນການພັດທະນາເສດຖະກິດ-ສັງຄົມ, ສ້າງວຽກເຮັດງານທຳ ແລະ ເປີດໂອ ກາດການຮ່ວມມືຕົວຈິງລະຫວ່າງ ສອງກະຊວງ ໃນຕໍ່ໜ້າ.
ໃນໂອກາດດັ່ງກ່າວ, ທ່ານ ລິນຄຳ ດວງສະຫວັນ ໄດ້ຕີລາຄາສູງຕໍ່ຄວາມກ້າວໜ້າດ້ານເຕັກໂນໂລຊີກະສິກຳຂອງສະຫະພັນຣັດເຊຍ, ໂດຍສະເພາະຄວາມກ້າວໜ້າ ດ້ານລະບົບຊົນລະປະທານ, ການປັບປຸງສະມັດຖະພາບພັນພືດ, ການຜະລິດຝຸ່ນ ແລະ ວິທະຍາສາດການສັດຕະວະແພດຂອງຣັດເຊຍ ຊຶ່ງສິ່ງເຫຼົ່ານີ້ຈະຊ່ວຍໃຫ້ ສປປ ລາວ ສາມາດຖອດຖອນບົດຮຽນຕົວຈິງເພື່ອນຳມາພັດທະນານະໂຍບາຍ ແລະ ຍົກລະດັບຂະແໜງກະສິກຳຂອງລາວໃຫ້ມີປະສິດທິພາບຍິ່ງຂຶ້ນ.
ສຳລັບທິດທາງການຮ່ວມມືໃນຕໍ່ໜ້າ ຂອງທັງສອງກະຊວງ ແມ່ນຈະສືບຕໍ່ຊຸກຍູ້ສະໜັບສະໜູນການຄ້າສິນຄ້າກະສິກຳ, ໂດຍສະເພາະການສ້າງກົນໄກຮ່ວມມືດ້ານສຸຂານາໄມ ແລະ ສຸຂານາໄມພືດ (SPS) ເພື່ອຍົກລະດັບຄຸນນະພາບຜະລິດຕະພັນລາວ, ລວມທັງການສົ່ງເສີມການລົງທຶນດ້ານອຸດສາຫະກຳປຸງແຕ່ງເພື່ອເພີ່ມມູນຄ່າຜະລິດຕະພັນກະສິກຳໃຫ້ມີຄວາມຍືນຍົງ. ນອກຈາກນັ້ນ, ຣັດເຊຍຈະໃຫ້ການສະໜັບສະໜູນດ້ານເຕັກໂນໂລຊີ, ການຖ່າຍທອດຄວາມຮູ້ຜ່ານການແລກປ່ຽນຜູ້ຊ່ຽວຊານ, ນັກຄົ້ນຄວ້າ ແລະ ນັກສຶກສາ ແລະ ມີຄວາມສົນໃຈໃນການຂະຫຍາຍການຮ່ວມມືໄປສູ່ການຄົ້ນຄວ້າດ້ານການປັບປຸງພັນເຂົ້າ, ການພັດທະນາການລ້ຽງສັດ, ການປະມົງ ແລະ ການຄຸ້ມຄອງຊັບພະຍາກອນປ່າໄມ້ຢ່າງຮອບດ້ານ. ທັງສອງຝ່າຍ ເຫັນດີ ແຕ່ງຕັ້ງຈຸດປະສານງານ ຂອງກະຊວງ ເພື່ອເຮັດວຽກຮ່ວມກັນ ໃນການກະກຽມຮ່າງບົດບັນທຶກຄວາມເຂົ້າໃຈ (MoU) ເພື່ອເປັນຂອບການຮ່ວມມືໄລຍະຍາວ ຊຶ່ງຈະເປັນພື້ນຖານສຳຄັນໃນການສົ່ງເສີມການລົງທຶນ, ນະວັດຕະກຳ ແລະ ການພັດທະນາກະສິກຳທີ່ປັບຕົວເຂົ້າກັບການປ່ຽນແປງດິນຟ້າອາກາດ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນທັງສອງປະເທດ.
(ແຫຼ່ງຂ່າວ: ພະແນກເຕັກໂນໂລຊີຂໍ້ມູນ-ຂ່າວສານ, ຫ້ອງການກະຊວງ ກສ)
ຄໍາເຫັນ