 |
ພິທີດັ່ງກ່າວ, ໄດ້ຈັດຂຶ້ນໃນວັນທີ 1 ກັນຍາ ຜ່ານມານີ້ ໂດຍມີ ສະຫາຍ ເກິນ ດິ້ງ ຕ້າຍ ຮອງຫົວໜ້າຫ້ອງວ່າການປະທານປະເທດ ຄະນະກຳມະການສະພາທີ່ປຶກສາອະໄພຍະໂທດ ປີ 2025; ສະຫາຍ ພັນເອກ ຟ້າມ ມິ່ງ ຟ່ອງ ຮອງຫົວໜ້າກົມຕໍາຫຼວດຄຸ້ມຄອງຄ້າຍຄຸມຂັງ-ພື້ນຖານການສຶກສາແບບບັງຄັບ-ໂຮງຮຽນດັດສ້າງພ້ອມດ້ວຍບັນດາສະຫາຍການນໍາກ່ຽວຂ້ອງ, ພະນັກງານພາຍໃນຄ້າຍຄຸມຂັງດັ່ງກ່າວ ແລະ ຕາງໜ້າບັນດານັກໂທດ ທີ່ໄດ້ຮັບການອະໄພຍະໂທດ.
ໃນພິທີ, ສະຫາຍ ພັນເອກ ຫວູ ຮ້າວ ຫຽບ ຜູ້ຄຸມຄ້າຍກັກຂັງ ນິ່ງແຄ໋ງ ໄດ້ປະກາດຂໍ້ຕົກລົງ ວ່າດ້ວຍການອະໄພຍະໂທດ ປີ 2025 (ງວດ 2) ແລະ ປະກາດການໃຫ້ອະໄພຍະໂທດ ໃຫ້ນັກໂທດ 377 ຄົນ ທີ່ກຳລັງປະຕິບັດຄໍາຕັດສິນໂທດ ຢູ່ຄ້າຍຄຸມຂັງ ນິ່ງແຄ໋ງ ຊຶ່ງໄດ້ໃຫ້ຮູ້ວ່າ: ກ່ອນໜ້ານັ້ນ, ບົນພື້ນຖານອີງຕາມຂໍ້ກຳນົດຂອງກົດໝາຍ ແລະ ສະພາບຄວາມເປັນຈິງ, ຄ້າຍຄຸມຂັງ ນິ່ງແຄ໋ງ ໄດ້ດຳເນີນວຽກງານການພິຈາລະນາ, ສະເໜີການພິຈາລະນາອະໄພຍະໂທດ ດ້ວຍຄວາມຮັບປະກັນຢ່າງໜັກແໜ້ນ, ເປີດເຜີຍ, ປະຊາທິປະໄຕ, ສະເໝີພາບ, ຖືກກັບເປົ້າໝາຍ ແລະ ເງື່ອນໄຂ. ບັນດານັກໂທດ ທີ່ໄດ້ຮັບການອະໄພຍະໂທດ ລ້ວນແຕ່ແມ່ນບັນດານັກໂທດທີ່ມີສະຕິ ດັດສ້າງເປັນຄົນດີ, ປະຕິບັດລະບຽບພາຍໃນ, ຂໍ້ກໍານົດຂອງຄ້າຍຄຸມຂັງ ຢ່າງເຂັ້ມງວດ, ຕັ້ງໜ້າຮໍ່າຮຽນ, ອອກແຮງງານ, ຮັບປະກັນໄດ້ບັນດາເງື່ອນໄຂ, ຄົບຖ້ວນດ້ານມາດຖານ ພິຈາລະນາອະໄພຍະໂທດ ຕາມຂໍ້ກໍານົດ.
ຈາກນັ້ນ, ສະຫາຍ ເກິນ ດິ້ງ ຕ້າຍ ພ້ອມດ້ວຍບັນດາສະຫາຍ ຄະນະປະທານ ກໍໄດ້ຜັດປ່ຽນຂຶ້ນ ມອບຢັ້ງຢືນການອະໄພຍະໂທດ ໃຫ້ນັກໂທດທີ່ໄດ້ຮັບການອະໄພຍະໂທດໃນຄັ້ງນີ້. ພ້ອມນີ້, ກໍມີຕາງໜ້ານັກໂທດຊາຍ ແລະ ຕາງໜ້ານັກໂທດຍິງ ຂຶ້ນສະແດງຄວາມຮູ້ສຶກ ທີ່ໄດ້ຮັບການອະໄພຍະໂທດ ຈາກປະທານປະເທດ; ພ້ອມທັງໄດ້ສັນຍາວ່າ ເມື່ອກັບຄືນສູ່ຊຸມຊົນ ກໍຈະປະພຶດດີ ບັນດາແຜນນະໂຍບາຍ, ແນວທາງຂອງພັກ, ນະໂຍບາຍ, ລະບຽບກົດໝາຍຂອງລັດ, ຈະສູ້ຊົນພະຍາຍາມ ໃຫ້ກາຍເປັນຄົນຊື່ສັດ, ມີປະໂຫຍດໃຫ້ຄອບຄົວ ແລະ ສັງຄົມ.
ຕອນທ້າຍຂອງພິທີ, ສະຫາຍ ເກິນ ດິ້ງ ຕ້າຍ ໄດ້ມີຄໍາເຫັນວ່າ: ນະໂຍບາຍອະໄພຍະໂທດ ແມ່ນແຜນນະໂຍບາຍໃຫຍ່ຂອງພັກ-ລັດ ທີ່ສະແດງໃຫ້ເຫັນເຖິງມູນເຊື້ອຄວາມມີເມດຕາຈິດ, ມະນຸດສະທໍາ, ໂອບເອື້ອອາລີຂອງຊົນຊາດ. ໃນປີຜ່ານໆມາ, ພັກ-ລັດເຮົາ ໄດ້ດຳເນີນຫຼາຍງວດການອະໄພຍະໂທດ ໃຫ້ນັກໂທດຫຼາຍແສນຄົນ; ບັນດາຜູ້ທີ່ໄດ້ຮັບການອະໄພຍະໂທດ ໄດ້ກັບຄືນສູ່ພື້ນຖານ ມີວຽກເຮັດງານທໍາ, ມີລາຍຮັບທີ່ໝັ້ນຄົງ; ຕັ້ງໜ້າເຂົ້າຮ່ວມການພັດທະນາເສດຖະກິດ-ສັງຄົມ ຢູ່ທ້ອງຖິ່ນ, ໄດ້ຮັບການຮັບຮູ້ຈາກຄະນະພັກ, ອຳນາດການປົກຄອງ ແລະ ປະຊາຊົນທຸກຊັ້ນຄົນ. ພ້ອມນີ້, ກໍອວຍພອນໃຫ້ບັນດານັກໂທດທີ່ໄດ້ຮັບການອະໄພຍະໂທດໃນງວດນີ້ ແລະ ສະແດງຄວາມຫວັງວ່າ ເມື່ອກັບຄືນສູ່ທ້ອງຖິ່ນ ຈະຂ້າມຜ່ານຄວາມຫຍຸ້ງຍາກ, ສິ່ງທ້າທາຍ, ມີຄວາມເຊື່ອໝັ້ນ, ກ້າວຂຶ້ນຢ່າງໝັ້ນຄົງ, ຕັ້ງໜ້າກໍ່ສ້າງຊີວິດທີ່ມີຄວາມໝັ້ນຄົງ, ຄອບຄົວກິນດີນຸ່ງອຸ່ນ, ມີຄວາມສຸກ, ບໍ່ມີການລະເມີດ ບໍ່ມີການເຮັດຜິດກົດໝາຍ ຢ່າງເດັດຂາດ.
 |
ໃນໄລຍະ 80 ປີຜ່ານມາ, ປະເທດຫວຽດນາມ ໄດ້ມີການອະໄພຍະໂທດ ໃຫ້ນັກໂທດແລ້ວ 40 ຄັ້ງ; ສະເພາະນັບແຕ່ປີ 2009 ມານີ້, ປະທານປະເທດ ເຊັນອະໄພຍະໂທດ 11 ຄັ້ງ ໃຫ້ອະໄພຍະໂທດ ແກ່ນັກໂທດ 104,000 ຄົນ ທີ່ມີຂະບວນການດັດສ້າງທີ່ດີ, ຄົບເງື່ອນໄຂຕາມຂໍ້ກົດນົດ. ພິເສດ, ໃນປີ 2025, ພັກ-ລັດ ຈັດຕັ້ງຫຼາຍເຫດການທີ່ສໍາຄັນ; ດັ່ງນັ້ນ, ການໃຫ້ອະໄພຍະໂທດ ໃນປີນີ້ ລວມມີ 2 ງວດ ຄື: ງວດທີ 1 ແມ່ນໂອກາດສະເຫຼີມສະຫຼອງ 50 ປີແຫ່ງວັນປົດປ່ອຍພາກໃຕ້ຫວຽດນາມ, ທ້ອນໂຮມປະເທດຊາດເປັນເອກະພາບ (30/4/1975-30/4/2025) ຊຶ່ງໄດ້ໃຫ້ອະໄພຍະໂທດແກ່ນັກໂທດ 8,055 ຄົນ ແລະ ໃນງວດ 2 ນີ້ ແມ່ນອະໄພຍະໂທດ ໃຫ້ນັກໂທດ 13,915 ຄົນ ທີ່ກຳລັງປະຕິບັດຄໍາຕັດສິນໂທດ ແລະ ຜູ້ທີ່ຖືກພັກໂທດ ຈໍານວນ 5 ຄົນ ມີສິດໄດ້ຮັບການປ່ອຍໂຕກ່ອນກຳນົດ.
(ຂ່າວ: ສຸກສະຫວັນ ຜາດີ)
ຄໍາເຫັນ