ແຂ່ງຂັນລົດຖີບ ມິດຕະພາບຊົມເຊີຍກອງປະຊຸມສຸດຍອດລັດຖະສະພາCLV ຄັ້ງທີ 1

ຂະບວນແຂ່ງຂັນລົດຖີບມິດຕະພາບເພື່ອຂໍ່ານັບຊົມເຊີຍກອງປະຊຸມສຸດຍອດລັດຖະສະພາ ກໍາປູເຈຍ-ລາວ-ຫວຽດນາມ (CLV)ຄັ້ງທີ 1ໄດ້ຈັດຂຶ້ນໃນວັນທີ 6 ທັນວາ ນີ້, ໂດຍການເຂົ້າຮ່ວມຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດລາວ, ມີປະທານສະພາແຫ່ງຣາຊະອານາຈັກກໍາປູເຈຍ ແລະ ສສ ຫວຽດນາມ, ຮອງນາຍົກລັດຖະມົນຕີ, ບັນດາແຂກຈາກ 3 ຝ່າຍ ແລະ ແຂກຖືກເຊີນເຂົ້າຮ່ວມ.
ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ສະພາແຫ່ງຊາດ ໄດ້ກ່າວວ່າ: ຂະບວນການຖີບລົດໃນຄັ້ງນີ້ ເປັນກິດຈະກໍາທີ່ທັງ 3 ປະເທດຮ່ວມກັນຈັດຕັ້ງ ໃນໂອກາດສະເຫຼີມສະຫຼອງຜົນສໍາເລັດຂອງກອງປະຊຸມສຸດຍອດລັດຖະສະພາ ພ້ອມທັງເປັນການສົ່ງເສີມຂະຫຍາຍການພົວພັນຮ່ວມມື ແລະ ຄວາມສາມັກຄີລະຫວ່າງປະເທດ. ນອກນັ້ນ, ຍັງແນໃສ່ຊຸກຍູ້ ແລະ ເສີມສ້າງຄວາມສາມັກຄີຮັກແພງໃຫ້ແກ່ບັນດາສະມາຊິກສະພາ, ພະນັກງານ-ລັດຖະກອນ ແລະ ໄວໜຸ່ມຂອງ 3 ປະເທດໃຫ້ຮັບຮູ້ ແລະ ເຂົ້າໃຈຢ່າງເລິກເຊິ່ງເຖິງປະຫວັດສາດແຫ່ງການພົວພັນຮ່ວມມືທີ່ເປັນມູນເຊື້ອອັນດີງາມທີ່ການນໍາທັງສາມປະເທດໄດ້ຮ່ວມກັນສ້າງໄວ້ ເພື່ອໃຫ້ຄົນຮຸ່ນໃໝ່ໄດ້ສືບຕໍ່ຖະໜຸຖະໜອມ ແລະ ເພີິ່ມພູນຄູນສ້າງສາຍພົວພັນດັ່ງກ່າວໃຫ້ຍືນຍົງຕະຫຼອດໄປ.
ຈາກນັ້ນ, ບັນດາທ່ານການນຳທັງ 3 ປະເທດກໍໄດ້ຮ່ວມກັນເປີດຂະບວນຂີ່ລົດຖີບມິດຕະພາບ ໂດຍເລີ່ມຈາກເດີ່ນໜ້າສະພາແຫ່ງຊາດ ລາວ ໄປຫາ ປະຕູໄຊ ແລະ ຫໍຄຳແລ້ວກັບມາທີ່ເດີ່ນໜ້າສະພາ. ຫຼັງຈາກນັ້ນກໍໄດ້ເປີດການແຂ່ງຂັນລົດຖີບ 3 ປະເທດ ກຳປູເຈຍ-ລາວ-ຫວຽດນາມ ໂດຍປະກອບມີ 2 ປະເພດຄື ປະເພດທີມ ແລະ ປະເພດດ່ຽວ ຜ່ານການແຂ່ງຂັນ ປະເພດດ່ຽວ ທີ1 ໄດ້ແກ່ ປະເທດຫວຽດນາມ ໄດ້ຮັບເງິນສົດ 9 ລ້ານກີບ, ທີ2 ປະເທດກຳປູເຈຍ ໄດ້ຮັບເງິນສົດ 7ລ້ານກີບ ແລະ ທີ3 ໄດ້ແກ່ ຫວຽດນາມ ໄດ້ຮັບເງິນສົດ 4 ລ້ານກີບ, ສ່ວນປະເພດທີມ ທີ1 ໄດ້ແກ່ປະເທດກຳປູເຈຍ ໄດ້ຮັບຂັນທ່ານປະທານສະພາແຫ່ງຊາດແຫ່ງ ສປປ ລາວ, ທີ2 ສປປ ລາວ ໄດ້ຮັບຂັນ 1 ໜ່ວຍ, ທີ3 ໄດ້ແກ່ປະເທດຫວຽດນາມ ໄດ້ຮັບຂັນ 1 ໜ່ວຍ.
ພາບ-ຂ່າວ: ດວງດາວັນ+ທິດາ