ນອກຈາກການແຂ່ງຂັນເຮັດອາຫານແລ້ວ ພາຍໃນງານດັ່ງກ່າວຍັງເປັນເວທີແລກປ່ຽນວັດທະນະທຳ ປະດິດສ້າງເມນູອາຫານໃໝ່ໆ ແລະ ຮັດແໜ້ນສາຍພົວພັນສອງຝ່າຍໂດຍສະເພາະແມ່ນວັດທະນະທຳການປຸງແຕ່ງອາຫານ.
ຈຸດປະສົງຂອງງານເພື່ອໃຫ້ຄົນລາວຮູ້ຈັກ ແລະ ຄຸ້ນເຄີຍກັບອາຫານເກົາຫຼີ, ຄົນເກົາຫຼີຮູ້ຈັກອາຫານລາວຫຼາຍຂຶ້ນ ທັງເປັນການສົ່ງເສີມການຂາຍຜະລິດຕະພັນ ສເກົາຫຼີ ແລະ ລາວໃຫ້ມີຄວາມຍືນຍົງ.
ການແຂ່ງຂັນຄັ້ງນີ້ ຜູ້ເຂົ້າແຂ່ງຂັນຮ່ວມສ້າງສັນລາຍການອາຫານທີ່ປະສົມປະສານລະຫວ່າງ ລາວ ແລະ ສ ເກົາຫຼີ ໂດຍນໍາໃຊ້ວັດຖຸດິບທີ່ມີເອກະລັກຈາກ ສເກົາຫຼີ ນໍາມາປຸງແຕ່ງ ໂດຍໃຊ້ສູດອາຫານ ແລະ ເຄື່ອງປຸງຂອງລາວ.ການແຂ່ງຂັນດັ່ງກ່າວ ບໍ່ພຽງແຕ່ຊີ້ໃຫ້ເຫັນຄວາມນິຍົມ ຂອງອາຫານ ຈາກ ສເກົາຫຼີ ທີ່ເພີ່ມຂຶ້ນທົ່ວໂລກ ແຕ່ຍັງ ສະແດງໃຫ້ເຫັນເຖິງເມນູອາຫານທີ່ໂດດເດັ່ນຂອງແຕ່ລະປະເທດອີກດ້ວຍ.
ການແຂ່ງຂັນຄັ້ງນີ້ໄດ້ມີ 10 ທີມເຂົ້າຮ່ວມຜ່ານການຄັດເລືອກຈົນມາຮອດຮອບສຸດທ້າຍແມ່ນໄດ້ຄັດເລືອກເອົາ 3 ທີມສຸດທ້າຍທີ່ເຂົ້າຮອບແມ່ນໄດ້ຂຶ້ນເທີງເວທີ ແລະ ປຸງແຕ່ງເມນູອາຫານເພື່ອແຂ່ງຂັນຮອບສຸດທ້າຍຄັດເລືອກເອົາຜູ້ຊະນະເລີດຊຶ່ງຜູ້ເຂົ້າແຂ່ງຂັນໄດ້ປະສົມປະສານ ວັດຖຸປຸງແຕ່ງຂອງເກາຫຼີ ແລະ ລາວເຂົ້າດ້ວຍກັນເຊັ່ນ: ກິມຈິ, ເຫຼົ້າພື້ນເມືອງເກົາຫຼີ, ສາຫຼ່າຍ, ເຂົ້າໜຽວ ແລະ ຕອກບອກກີ ເຂົ້າກັບລົດຊາດທີ່ຖືກປາກຄົນລາວ ເຊັ່ນ: ລາບ, ແໜມເຂົ້າ ແລະ ເຂົ້າຊອຍ ເປັນຕົ້ນ.
ຜູ້ເຂົ້າຮອບສຸດທ້າຍຂອງການແຂ່ງຂັນ ແມ່ນໄດ້ປຸງແຕ່ງອາຫານ ຕໍ່ໜ້າຄະນະກຳມະການ 10 ທ່ານ ຈາກ ຕົວແທນ ຈໍາໜ່າຍອາຫານ ຜູ້ຊ່ຽວຊານດ້ານອຸດສາຫະກຳຮ້ານອາຫານ ແລະ ສື່ມວນຊົນ ຊຶ່ງຄະແນນແມ່ນຕັດສິນຈາກ ຄວາມຄິດ, ສ້າງສັນ, ລົດຊາດ, ສັກກະຍະພາບທາງການຕະຫຼາດ. ຜ່ານການຕັດສິນຂອງຄະນະກຳມະການຜູ້ຊົງຄຸນວຸດທິ ລາງວັນທີ 1 ມູນຄ່າ 10ລ້ານກີບໄດ້ແກ່: ທ້າວ ພິບພະກອນ ພວງເພັດ, ລາງວັນທີ 2ມູນຄ່າ 5 ລ້ານກີບ ໄດ້ແກ່: ນາງ ວິສຸດາ ສົມສຸ, ລາງວັນທີ 3 ມູນຄ່າ 3ລ້ານກີບໄດ້ແກ່: ທ້າວ ພັນບໍລິນ ພິຈິດ ຊຶ່ງເມນູທີ່ໄດ້ຮັບໄຊຊະນະ ຈະໄດ້ຮັບການໂຄສະນາຜ່ານຊ່ອງທາງອອນລາຍຕ່າງໆ ແລະ ຈະໄດ້ນໍາໄປວາງສະແດງໃນງານ K-Food Festival ທີ່ຈະຈັດຂຶ້ນໃນວັນທີ 6-7 ມິຖຸນາ 2025 ທີ່ສູນການຄ້າລາວ-ໄອເຕັກ ແລະ ຈະຈັດຂຶ້ນທີ່ ສູນການຄ້າ ພາກຊັນ ນະຄອນຫຼວງວຽງຈັນ ໃນວັນທີ 1-2 ສິງຫາ 2025.
ໂອກາດນີ້, ທ່ານ ລີ ດອງຄູ ຕາງໜ້າສະຖານທູດເກົາຫຼີ ປະຈໍາລາວກ່າວວ່າ: ການແຂ່ງຂັນຄັ້ງນີ້ ແມ່ນເຫດການທີ່ມີຄວາມໝາຍຄວາມສໍາຄັນ ຕໍ່ການສະເຫຼີມສະຫຼອງສາຍພົວພັນລາວ-ເກົາຫຼີ ຄົບຮອບ 30 ປີ ຫວັງວ່າຈະສືບຕໍ່ຮ່ວມມື ໃນການນໍາເອົາອາຫານ ແລະ ວັດທະນະທຳ ຂອງເກົາຫຼີ ແລະລາວ ມາປະສົມປະສານກັນ.
ທ່ານ ປາກຈອງ ຈອງອິວ ຜູ້ອຳນວຍການອົງການ KOTRA ວຽງຈັນ ກ່າວວ່າ: ການແຂ່ງຂັນຄັ້ງນີ້ ບໍ່ພຽງແຕ່ເປັນການ ແຂ່ງຂັນສ້າງສັນເມນູອາຫານໃໝ່ ແຕ່ຍັງສະແດງເຖິງສາຍພົວພັນ ລາວ-ເກົາຫຼີ ຄົບຮອບ 30 ປີ ໂດຍການນໍາເອົາ ວັດທະນະທຳ ແລະ ອາຫານຂອງສອງປະເທດມາເຊື່ອມຕໍ່ເຂົ້າກັນ ຂ້າພະເຈົ້າຫວັງວ່າ ເມນູອາຫານທີ່ສ້າງສັນໂດຍຜູ້ເຂົ້າຮ່ວມການແຂ່ງຂັນໃນຄັ້ງນີ້ ຈະບໍ່ພຽງແຕ່ເປັນການສົ່ງເສີມຜະລິດຕະພັນອາຫານຂອງເກົາຫຼີ ໃນຕະຫຼາດຂອງລາວ ເທົ່ານັ້ນ ແຕ່ຍັງເປັນການສົ່ງເສີມການແລກປ່ຽນ ແລະ ເຂົ້າໃຈ ໃນວັດທະນະທຳຂອງທັງສອງປະເທດ ລາວ-ເກົາຫຼີອີກດ້ວຍ.
(ຂ່າວ:ໜິງ)
ຄໍາເຫັນ