 |
ໃນພິທີ,ທ່ານຄໍາແດງກຸນທະປັນຍາໄດ້ສະຫຼຸບລາຍງານຜົນງານການເຄື່ອນໄຫວປະຈໍາປີ 2025 ວ່າ: ໃນດ້ານການປະຕິບັດສິນທໍາແລະດ້ານຈິດວິນຍານ (ຄວາມເຊື່ອ) ຄະນະສູນລວມຄຂລໄດ້ສົ່ງບັນດາອາຈານລົງສິດສອນຫຼັກຄຳສອນຢູ່ແຂວງຕ່າງໆ. ໃນຂະນະດຽວກັນ, ກໍໄດ້ລະດົມຊາວຜູ້ທີ່ເຊື່ອຖືປະຕິບັດສາສະໜາຄຣິດຕຽນໂດຍຕິດພັນກັບສອງວາລະແຫ່ງຊາດຂອງລັດຖະບານເຮັດວຽກໃກ້ຊິດກັບອົງການຈັດຕັ້ງພັກ-ລັດທີ່ກ່ຽວຂ້ອງຂັ້ນຕ່າງໆ, ພ້ອມທັງສ້າງຄວາມຮັກຄວາມສາມັກຄີປອງດອງກັບປະຊາຊົນຢູ່ພາຍໃນບ້ານຂອງຕົນ; ໄດ້ມີການປັບປຸງຊັບຊ້ອນຄະນະຮັບຜິດຊອບສູນຄຣິສຕະຈັກຂ່າວປະເສີດປະຈໍາແຂວງແລະຄຣິສຕະຈັກທ້ອງຖິ່ນຕາມລະບຽບການ. ສູນລວມຄຂລໄດ້ອອກບັດຄູສະໜາໃຫ້ບັນດາອາຈານທີ່ເໝາະສົມຕາມເງື່ອນໄຂແລະລະບຽບຂອງສູນລວມຄຂລໃນການເທດສະໜາ, ສອນສິນທຳແລະປະກອບພິທີກຳສາສະໜາຕ່າງໆ; ໄດ້ມີການຂາບໄຫວ້ນະມັດສະການແລະປະຕິບັດສິນທຳຢູ່ຕາມໂບດແລະຕາມສະຖານທີ່ບ່ອນນະມັດສະການແລະຕາມບ້ານເຮືອນບ່ອນທີ່ຍັງບໍ່ມີໂບດທຸກວັນອາທິດແລະວັນອື່ນໆທີ່ກຳນົດແລະມີການຝຶກອົບຮົມໃຫ້ຜູ້ທີ່ຈະເປັນອາຈານຮັບຜິດຊອບເບິ່ງແຍງພີ່ນ້ອງໃນແຂວງຕ່າງໆ. ໃນດ້ານຊີວິດຝ່າຍຮ່າງກາຍໄດ້ມີການຝຶກອົບຮົມວິຊາຊີບແລະສົ່ງເສີມ, ການປູກຝັງລ້ຽງສັດ, ສ້າງເສດຖະກິດຄອບຄົວ, ເບິ່ງແຍງແລະຊ່ວຍເຫຼືອຊຶ່ງກັນແລະກັນຍາມຕົກທຸກໄດ້ຍາກແລະເຈັບໄຂ້ໄດ້ປ່ວຍ; ສົ່ງເສີມການສຶກສາຮໍ່າຮຽນຂອງລູກ-ຫຼານ, ສ້າງຫໍພັກ, ຊອກຫາທຶນການສຶກໃຫ້, ສົ່ງເສີມກິລາຕ່າງໆ. ຄຽງຄູ່ກັບການເຮັດວຽກງານສາສະໜາບັນດາອາຈານໄດ້ນໍາເອົາແນວທາງນະໂຍບາຍຂອງພັກ-ລັດລົງເຜີຍແຜ່ໃຫ້ຜູ້ຮັບຜິດຊອບຊາວຄຣິສຕຽນໃນແຂວງຕ່າງໆແລະໄດ້ເຮັດວຽກຮ່ວມກັບກະຊວງພາຍໃນແລະສນຊປະກອບສ່ວນພັນທະໃຫ້ປະເທດຊາດແລະເຂົ້າຮ່ວມຂະບວນການຕ່າງໆທີ່ພັກ-ລັດຈັດຂຶ້ນ; ອົບຮົມເດັກນ້ອຍແລະຊາວໜຸ່ມໃຫ້ຫ່າງໄກຢາເສບຕິດແລະບໍ່ກ່ຽວຂ້ອງ (ບໍ່ຊື້ບໍ່ຂາຍບໍ່ເສບ); ຊາວຄຣິສຕຽນທົ່ວປະເທດໄດ້ພາວັນນາອະທິຖານອວຍພອນປະເທດຊາດ, ທ່ານຜູ້ນໍາພັກ-ລັດເພື່ອໃຫ້ໄດ້ພົບຄວາມຈະເລີນຮຸ່ງເຮືອງ.
 |
ດ້ານການປະກອບສ່ວນຊ່ວຍເຫຼືອສັງຄົມແລະປະກອບສ່ວນອຸປະກອນຮັບໃຊ້ຫ້ອງການເປັນຕົ້ນປຸກສ້າງສະໂມສອນ 1 ຫຼັງໃຫ້ກອງບັນຊາການທະຫານເມືອງຊໍາເໜືອແລະປະກອບໂຕະຕັ້ງ, ປູກະໂລ, ພັດລົມຢູ່ແຂວງຫົວພັນ; ເຮັດນໍ້າລິນໃຫ້ 4 ບ້ານຄື: 2 ບ້ານຢູ່ແຂວງຫົວພັນ, 1 ບ້ານຢູ່ແຂວງຊຽງຂວາງແລະ 1 ບ້ານຢູ່ແຂວງຄໍາມ່ວນ; ໄດ້ສ້າງສຸກສາລາ (ໂຮງໝໍນ້ອຍ) 1 ຫຼັງຢູ່ແຂວງຊຽງຂວາງ, ມອບປຣິນເຕີ່ 2 ຊຸດໃຫ້ສູນຄົ້ນຄວ້າແລະຝຶກອົບຮົມສນຊ, ຄອມພິວເຕີ 2 ຊຸດແລະປຣິນເຕີ່ 2 ຊຸດໃຫ້ກົມຈັດຕັ້ງ-ພະນັກງານສນຊ, ຄອມພິວເຕີ່ 2 ຊຸດແລະປຣິນເຕີ່ 1 ຊຸດໃຫ້ຫ້ອງການບ້ານທົ່ງປົ່ງ, ຄອມພິວເຕີ່ 2 ຊຸດແລະປຣິນເຕີ່ 2 ຊຸດໃຫ້ຫ້ອງການຍຸຕິທໍາເມືອງສີໂຄດຕະບອງ, ມອບຄອມພິວເຕີ່ 1 ຊຸດໃຫ້ຫ້ອງການພາຍໃນເມືອງຄໍາເກີດ, ຄອມພິວເຕີ່ 3 ຊຸດ, ປຣິນເຕີ່ 1ຊຸດແລະຕູ້ໃສ່ເອກະສານ 1 ໜ່ວຍໃຫ້ຫ້ອງການພາຍໃນເມືອງໃໝ່ແລະພາຍໃນແຂວງ, ຄອມພິວເຕີ່ 1 ຊຸດແລະປຣິນເຕີ່ 1 ຊຸດໃຫ້ຫ້ອງການແຮງງານ-ສະຫວັດດີການສັງຄົມເມືອງສີໂຄດຕະບອງ. ຄອມພິວເຕີ່ຕັ້ງໂຕະ 1 ຊຸດແລະປຣິນເຕີ່ 1 ຊຸດໃຫ້ປກສກຸ່ມ 2 ສີຖານເມືອງສີໂຄດຕະບອງ, ຄອມພິວເຕີ 2 ຊຸດໃຫ້ກົມໂຄສະນາສນຊ. ນອກນັ້ນ, ໄດ້ຊ່ວຍເຫຼືອປະຊາຊົນໄດ້ຮັບຜົນກະທົບຈາກໄພທໍາມະຊາດ (ນໍ້າຖ້ວມ) 4 ແຂວງ, ມອບເຄື່ອງກັນໜາວແລະຜ້າຫົ່ມ 1,200 ຊຸດ, ຊ່ວຍເຫຼືອທີ່ພັກ, ທຶນການສຶກສາແລະອຸປະກອນການຮຽນເພື່ອຊຸກຍູ້ໃຫ້ລູກຫຼານເຂົ້າໂຮງຮຽນ, ຊຸກຍູ້ກອງປະຊຸມແລະຂະບວນການທີ່ພັກ-ລັດຈັດຂຶ້ນ, ຊຸກຍູ້ການປ້ອງກັນຄວາມສະຫງົບຂັ້ນບ້ານ, ຂັ້ນເມືອງລວມມູນຄ່າທັງໝົດ 5,340,231,000 ກີບ. ນອກຈາກນີ້, ສູນຄຂລປະຈໍານວແລະ 17 ແຂວງຍັງໄດ້ປະກອບສ່ວນສັງຄົມຢູ່ພາຍໃນແຂວງຂອງຕົນລວມເປັນມູນຄ່າ 4,181,757,000 ກີບ.
 |
ໂອກາດນີ້, ທ່ານຄໍາຜອຍວັນນະສານໄດ້ກ່າວສະແດງຄວາມຍ້ອງຍໍຊົມເຊີຍຜົນງານແລະຜົນສໍາເລັດຕະຫຼອດໃລຍະ 1 ປີຜ່ານມາແລະອວຍພອນໄຊອັນປະເສີດໃຫ້ສູນລວມຄຂລກໍຄືພີ່ນ້ອງຜູ້ທີ່ເຊື້ອຖືອົງພະເຢຊູຄຣິສຈົ່ງມີສຸຂະພາບເຂັ້ມແຂງ, ມີຄວາມສຸກ, ໂຊກດີ, ຮັ່ງມີແລະມີຄວາມຈະເລີນຮຸ່ງເຮືອງຍິ່ງໆຂຶ້ນຕະຫຼອດໄປ.
 |
ງານໃນຄັ້ງນີ້, ຜູ້ເຂົ້າຮ່ວມຍັງໄດ້ຮັບຊົມລາຍການສະແດງສິລະປະ-ວັນນະຄະດີບົດຟ້ອນຕ່າງໆ, ຈັບສະຫຼາກເອົາລາງວັນ, ມອບຂອງຂັວນລາງວັນແລະພາວັນນາອະທິຖານຂໍພອນປີໃໝ່ 2026 ເພື່ອໃຫ້ຕົນເອງ, ຄອບຄົວມີຄວາມສຸກ, ໂຊກລາບຕະຫຼອດປີແລະຕະຫຼອດໄປ.
 |
(ຂ່າວ-ພາບ: ວັນເພັງ + ພູວັນ)
ຄໍາເຫັນ