ແຂວງຄໍາມ່ວນ ໄດ້ປະກອບສ່ວນຢ່າງຕັ້ງໜ້າເຂົ້າໃນຜົນປະໂຫຍດລວມຂອງຊາດ

ໂດຍ: ຕະວິນຍານ

ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ໄດ້ກ່າວຜ່ານສື່ມວນຊົນຂອງແຂວງເນື່ອງໃນໂອກາດຄົບ ຮອບ 48 ປີ ວັນສະຖາປານາສາທາລະນະລັດ ປະຊາທິປະໄຕ ປະຊາຊົນລາວ ວ່າ: ໃນທ່າມກາງບັນຍາກາດ ທີ່ທົ່ວພັກ, ທົ່ວລັດ ແລະ ທົ່ວປວງຊົນລາວບັນດາເຜົ່າໃນທົ່ວປະເທດ ເວົ້າສະເພາະ ພາຍໃນແຂວງຄໍາມ່ວນ ພວມພ້ອມກັນອອກແຮງແຂ່ງຂັນສ້າງຜົນງານ ແລະ ຂະບວນການ ເພື່ອຂໍ່ານັບຮັບຕ້ອນວັນສໍາຄັນຕ່າງໆຂອງຊາດ-ຂອງພັກ ຢ່າງເປັນຂະບວນຟົດຟື້ນນີ້. ຕາງໜ້າໃຫ້ຄະນະພັກ-ອົງການປົກຄອງແຂວງຄໍາມ່ວນ ຂ້າພະເຈົ້າ ຮູ້ສຶກປິຕິຊົມຊື່ນ ແລະ ພາກພູມໃຈເປັນຢ່າງຍິ່ງ ທີ່ພວກເຮົາໄດ້ພ້ອມກັນຈັດຕັ້ງຫວນຄືນມູນເຊື້ອ ແລະ ສະເຫຼີມສະຫຼອງວັນຊາດ ທີ 2 ທັນວາ ຄົບຮອບ 48 ປີ ຢູ່ແຂວງຄໍາມ່ວນໃນປີນີ້, ເນື່ອງຈາກວັນຊາດ ທີ 2 ທັນວາ ແມ່ນວັນທີ່ມີຄວາມໝາຍທີ່ສຸດ ສໍາລັບທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ແມ່ນວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດແຫ່ງການຕໍ່ສູ້ເປັນພັນໆປີຂອງຊາວລາວເຮົາ, ແມ່ນວັນທີ່ປະຊາຊົນລາວບັນດາເຜົ່າ ໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ ທັງເປັນວັນແຫ່ງການກ້າວສູ່ຍຸກສະ ໄໝໃໝ່ ແຫ່ງການສ້າງປະເທດລາວ ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ ແລະ ຈະກ້າວຂຶ້ນສັງຄົມນິຍົມ ຕາມຄວາມມຸ້ງຫວັງຂອງທົ່ວປວງຊົນລາວທັງຊາດ ຢ່າງປະກົດເປັນຈິງ.

ເພື່ອສະແດງໃຫ້ເຫັນເຖິງນໍ້າໃຈຮັກຊາດໃນຕະຫຼອດ 1 ປີ ຜ່ານມາພາຍໃຕ້ການນໍາພາ-ຊີ້ນໍາຂອງຄະນະບໍລິຫານງານພັກແຂວງ, ຄະນະບໍລິຫານງານພັກແຂວງພວກເຮາ ກໍໄດ້ເອົາໃຈໃສ່ເປັນຄັນທຸງໃນການເພີ່ມທະວີຍົກສູງຄວາມສາມາດການນໍາພາ-ຊີ້ນໍາໃນການຈັດຕັ້ງປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ເວົ້າສະເພາະ ແມ່ນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທິ X ຂອງອົງຄະນະພັກແຂວງຄໍາມ່ວນ, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ແລະ ຂອງແຂວງ 5 ປີ ຕິດພັນກັບການຈັດຕັ້ງປະຕິບັດວຽກງານ ແຂ່ງຂັນຍ້ອງຍໍ ພາຍໃຕ້ຄໍາຂວັນ “ຮັກຊາດ ແລະ ພັດທະນາ” ຢ່າງເປັນເຈົ້າການ ໃຫ້ບັນລຸຜົນສໍາເລັດເປັນກ້າວໆ ຊຶ່ງເປັນການປະກອບສ່ວນອັນສໍາຄັນໃນການສ້າງສາ ແລະ ພັດທະນາ ກໍຄືການນໍາເອົາຜົນປະໂຫຍດລວມມາໃຫ້ປະເທດຊາດ ແລະ ປະຊາຊົນຂອງພວກເຮົາຊຶ່ງມີຜົນສໍາເລັດອັນພົ້ນເດັ່ນໃນການຈັດຕັ້ງປະຕິບັດໜ້າທີ່ວຽກງານໃນແຕ່ລະດ້ານຄື:

ດ້ານວຽກງານ ປກຊ-ປກສ ມີການເຕີບໃຫຍ່ຂະຫຍາຍຕົວ ທັງປະລິມານ ແລະ ຄຸນນະພາບ ຂຶ້ນຢ່າງບໍ່ຢຸດຢັ້ງ, ຍັງສືບຕໍ່ປົກປັກຮັກສາໄດ້ເຂດນ້ຳ-ແດນດິນ, ຮັກສາໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ, ຮັບປະກັນໄດ້ຄວາມສະຫງົບ, ປອດໄພ, ສາມາດສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ໄດ້ຫຼາຍຍິ່ງຂຶ້ນ ເປັນພື້ນຖານສໍາຄັນ ໃຫ້ແກ່ການທໍາມາຫາກິນ, ການດໍາລົງຊີວິດ ແລະ ການຜະລິດທຸລະກິດພາຍໃນແຂວງຄໍາມ່ວນ.

ດ້ານເສດຖະກິດ ໃນໄລຍະຕົ້ນປີຜ່ານມາຮອດປັດຈຸບັນ ເສດຖະກິດຂອງແຂວງໄດ້ມີການຂະຫຍາຍຕົວຢ່າງຕໍ່ເນື່ອງ ໃນລະດັບ 5,45%, ລວມຍອດຜະລິດຕະພັນພາຍໃນປະຕິບັດ 14.854 ຕື້ກີບ, ລາຍຮັບສະເລ່ຍຕໍ່ຄົນຕໍ່ປີ ໄດ້ 1.905 ໂດລາ; ການລະດົມແຫຼ່ງທຶນ ເຂົ້າໃນການພັດທະນາໄດ້ທັງໝົດ 4.165,11 ຕຶ້ກີບ ເທົ່າກັບ 123%; ມູນຄ່າການສົ່ງອອກສິນ ຄ້າປະຕິບັດໄດ້ 597,55 ລ້ານໂດລາ ເທົ່າກັບ 125,55%, ມູນຄ່ານໍາເຂົ້າສິນຄ້າ 233,65 ລ້ານໂດລາ ເທົ່າກັບ 90,13% (ສົມທຽບກັບມູນຄ່າສົ່ງອອກເຫັນວ່າເກີນດຸນ); ການຈັດເກັບລາຍຮັບເຂົ້າງົບປະມານ ມາຮອດວັນທີ 29 ພະຈິກ 2023 ປະຕິບັດໄດ້ 2.411 ຕື້ກວ່າກີບ ເທົ່າກັບ 138%, ໃນນີ້ພູດສູນກາງ ປະຕິບັດໄດ້ 837,85 ຕື້ກວ່າກີບ ເທ່ົາກັບ 106,33%, ພູດທ້ອງຖິ່ນ ບັນລຸໄດ້ 1.573,57 ຕື້ກວ່າກີບ ເທົ່າກັບ 164,91% (ຄາດຄະເນໝົດປີພູດທ້ອງຖິ່ນຈະເກີນແຜນປະມານ 600 ກວ່າຕື້ກີບ); ທາງດ້ານການຜະລິດກະສິກໍາ ເພື່ອຮັບປະກັນຄວາມໝັ້ນຄົງທາງສະບຽງອາຫານ ເຫັນວ່າປັດຈຸບັນສາມາດເວົ້າໄດ້ວ່າ ແຂວງພວກເຮົາສາມາດກຸ້ມຕົນເອງໄດ້, ສ່ວນການຜະລິດເປັນສິນຄ້າກໍມີການຂະຫຍາຍຕົວເພີ່ມຂຶ້ນ ສາມາດສົ່ງອອກສິນຄ້າຂາຍພາຍໃນ ແລະ ສົ່ງອອກຕ່າງປະເທດໄດ້ຈໍານວນໜຶ່ງ.

ດ້ານວັດທະນະທໍາ-ສັງຄົມ ວຽກງານການສຶກສາ ແລະ ສາທາລະນະສຸກ ກໍໄດ້ເອົາໃຈໃສ່ປັບປຸງ ແລະ ກໍ່ສ້າງພື້ນຖານໂຄງລ່າງໃຫ້ຂະຫຍາຍຕົວເພີ່ມຂຶ້ນ ທັງຢູ່ໃນຕົວເມືອງ ແລະ ຊົນນະບົດ ຕິດພັນກັບການປັບປຸງ-ຍົກສູງຄຸນນະພາບການຮຽນ-ການສອນ ແລະ ການບໍລິການຢ່າງຕໍ່ເນື່ອງ; ເປົ້າໝາຍການພັດທະນາແບບຍືນຍົງໃນ 15 ຕົວຊີ້ວັດ ຂອງຂະແໜງການສຶກສາ ສາມາດບັນລຸໄດ້ແລ້ວ 11 ຕົວຊີ້ວັດ, ຍັງສືບຕໍ່ສຸມໃສ່ຈັດຕັ້ງປະຕິບັດ 4 ຕົວຊີ້ວັດ; ເປົ້າໝາຍຂອງຂະແໜງສາທາລະນະສຸກ ໃນ 11 ຕົວຊີ້ວັດ ສາມາດບັນລຸໄດ້ 7 ຕົວຊິ້ວັດ ຍັງສືບຕໍ່ 4 ຕົວຊີ້ວັດ; ວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ກໍໄດ້ຮັບການປັບປຸງ ແລະ ຂະຫຍາຍຕົົວຢ່າງຕໍ່ເນື່ອງ ທັງທາງດ້ານວຽກງານສື່ມວນຊົນ, ວຽກງານຊຸກຍູ້ສົ່ງເສີມວັດທະນະທໍາ-ຮີດຄອງປະເພນີອັນດີງາມຂອງທ້ອງຖິ່ນ ແລະ ວຽກງານທ້ອງທ່ຽວ ໂດຍສະເພາະ ວຽກງານທ່ອງທ່ຽວປັດຈຸບັນ ແຂວງກໍາລັງສຸມໃສ່ການກະກຽມເປີດປີທ່ອງທ່ຽວປີ 2024 ນີ້ ແຂວງໄດ້ສຸມໃສ່ຊຸກຍູ້ປັບປຸງພື້ນຖານໂຄງລ່າງ ແລະ ການບໍລິການ ເພື່ອດຶງດູດ, ຮອງຮັບນັກທ່ອງທ່ຽວ ແລະ ແຂກຄົນທີ່ຈະເຂົ້າມາທ່ອງທ່ຽວພາຍໃນແຂວງ ພ້ອມກັນນີ້ ກໍຍັງໄດ້ກໍານົດຫຼາຍກິດຈະກໍາ ເພື່ອໃຫ້ນັກທ່ອງທ່ຽວໄດ້ໄປທ່ອງທ່ຽວເພີ່ມຂຶ້ນ, ດ້ານວຽກງານປົກຄອງ ແລະ ບໍລິຫານລັດໄດ້ເອົາໃຈໃສ່ປັບປຸງການຈັດຕັ້ງຂັ້ນຮາກຖານໃຫ້ມີຄວາມເຂັ້ມແຂງ, ວຽກງານຕຸລາການກໍໄດ້ຮັບການປັບປຸງກໍ່ສ້າງ ທາງດ້ານການຈັດຕັ້ງ, ບຸກຄະລາກອນ ແລະ ຄຸນນະພາບໃນການຄົ້ນຄວ້າ-ຕັດສິນຄະດີຕ່າງໆໃຫ້ຊັດເຈນ, ຖືກຕ້ອງກັບກົດໝາຍ, ຖືກຕ້ອງກັບຄວາມເປັນຈິງ, ຮັບປະກັນໄດ້ຄວາມໂປ່ງໃສ ແລະ ວ່ອງໄວຍິ່ງຂຶ້ນ, ດ້ານວຽກງານສະພາປະຊາຊົນແຂວງ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ໄດ້ເພີ່ມທະວີຄວາມເອົາໃຈໃສ່ໃນການປັບປຸງແບບແຜນການເຮັດວຽກ ແລະ ເພີ່ມທະວີຄວາມເອົາໃຈໃສ່ໃນການຕິດຕາມ, ກວດກາການປະຕິບັດໜ້າທີ່ຂອງອົງການປົກຄອງແຂວງ, ຂອງອົງການຕຸລາການ, ອົງການກວດກາ-ກວດສອບ ແລະ ເປັນຕົວແທນປົກປ້ອງສິດຜົນປະໂຫຍດອັນຊອບທໍາຂອງປະຊາຊົນ ຕາມພາລະບົດບາດຂອງຕົນ ໄດ້ເປັນຢ່າງດີ, ນັບມື້ຍິ່ງມີຄວາມໂດບເດັ່ນ ແລະ ເຂັ້ມງວດຍິ່ງຂຶ້ນກວ່າເກົ່າ.

ດ້ານວຽກງານການຕ່າງປະເທດໄດ້ເພີ່ມທະວີຄວາມເອົາໃຈໃສ່ໃນການປະຕິບັດແນວທາງການຕ່າງປະເທດຂອງພັກ ເພີ່ມທະວີການພົວພັນຮ່ວມມືກັບປະເທດເພື່ອນມິດ ທັງປະເທດທີ່ຢູ່ໃກ້ຄຽງ ແລະ ປະເທດທີ່ຢູ່ຫ່າງໄກ ເພື່ອສ້າງສາຍພົວພັນທີ່ດີນໍາກັນນັບມື້ຍິ່ງກວ້າງຂວາງ ແລະ ຮັບປະກັນໄດ້ບົນຫຼັກການ ຕ່າງຝ່າຍຕ່າງມີຜົນປະໂຫຍດ ແລະ ສາມາດດຶງດູດ-ຍາດແຍ່ງການຊ່ວຍເຫຼືອ ແລະ ການລົງທຶນໄດ້ຫຼາຍຂຶ້ນ.

ບັນດາຜົນສໍາເລັດດັ່ງກ່າວມາຂ້າເທິງນັ້ນ ແມ່ນເກີດມາຈາກການຮ່ວມແຮງ-ຮ່ວມໃຈ ແລະ ສຸມສະຕິປັນຍາ ຂອງສະມາຊິກພັກ, ພະນັກງານ, ທະຫານ, ຕໍາຫຼວດ, ປະຊາຊົນບັນດາເຜົ່າ ແລະ ທຸກພາກສ່ວນໃນສັງຄົມ ຕະຫຼອດຮອດການອູ້ມຊູຊ່ວຍເຫຼືອຂອງບັນດາປະເທດເພື່ອນມິດ ພວກເຮົາຈຶ່ງສາມາດຍາດໄດ້ຜົນງານ ແລະ ບັນລຸໄດ້ແຜນງານແຕ່ລະດ້ານຕາມຄາດໝາຍທີ່ວາງໄວ້.