ໃນວັນທີ 22 ກັນຍາ ຜ່ານມາ ທີ່ຫ້ອງປະຊຸມອົງການກວດກາແຂວງວຽງຈັນ ໄດ້ຈັດພີທີມອໃບຢັ້ງຢືນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ໃຫ້ 2 ໜ່ວຍພັກ ຄື: ໜ່ວຍພັກເຕັກໂນໂລຊີ ແລະ ການສື່ສານ ແລະ ໜ່ວຍພັກ ບໍລິສັດ ລາວໂທລະຄົມມະນາຄົມມະຫາຊົນ, ໃຫ້ກຽດເຂົ້າຮ່ວມໂດຍ ສະຫາຍ ເທບພະໄທ ແກ້ວເຂັມເພັດ ຄະນະປະຈຳພັກແຂວງ ປະທານອົງການແນວລາວສ້າງຊາດແຂວງວຽງຈັນ, ມີຄະນະພັກຮາກຖານ, ເລຂາໜ່ວຍພັກອ້ອມຂ້າງ, ມີຄະນະພັກຮາກຖານພະແນກພະແນກເຕັກໂນໂລຊີ ແລະ ການສື່ສານ, ມີເລຂາ, ຮອງເລຂາໜ່ວຍພັກ, ພ້ອມດ້ວຍສະມາຊິກພັກທັງ 2 ໜ່ວຍດັ່ງກ່າວເຂົ້າຮ່ວມ.
ສະຫາຍ ພູທອງ ພັນທະວົງ ຮັກສາການເລຂາຄະນະພັກຮາກຖານ ເລຂາໜ່ວຍພັກເຕັກໂນໂລຊີ ແລະ ການສື່ສານ ຮອງຫົວໜ້າພະແນກເຕັກໂນໂລຊີ ແລະ ການສື່ສານແຂວງວຽງຈັນ ຕາງໜ້າທັງ 2 ໜ່ວຍພັກ ຂຶ້ນຜ່ານບົດສະຫຼຸບການປະເມີນໜ່ວຍພັກທີ່ຂຶ້ນກັບຄະນະພັກຮາກຖານ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ບາງຕອນສະຫາຍໄດ້ກ່າວວ່າ: ຄະນະພັກຮາກຖານພະແນກເຕັກໂນໂລຊີ ແລະ ການສື່ສານແຂວງວຽງຈັນ ປະກອບມີ 4 ໜ່ວຍພັກຂຶ້ນກັບ ຄື: ໜ່ວຍພັກເຕັກໂນໂລຊີ ແລະ ການສື່ສານ ແລະ ໜ່ວຍພັກບໍລິສັດລາວໂທລະຄົມມະນາຄົມມະຫາຊົນ, ໜ່ວຍພັກບໍລິສັດໂທລະຄົມລາວ ແລະ ໜ່ວຍພັກບໍລິສັດໄປສະນີລາວ, ປະກອບມີ ຄະນະພັກຮາກຖານ 7 ສະຫາຍ ຍິງ 2 ສະຫາຍ, ມີສະມາຊິກພັກທັງໝົດ 67 ສະຫາຍ ຍິງ 24 ສະຫາຍ, ໃນໄລຍະຜ່ານມາຄະນະພັກຮາກຖານໄດ້ເອົາໃຈໃສ່ຢ່າງເປັນເຈົ້າການໃນການຈັດຕັ້ງ, ເຊື່ອມຊຶມບັນດາເອກະສານຕ່າງໆຂອງພັກ-ລັດ ໃຫ້ແກ່ສະມາ ຊິກພັກ-ພະນັກງານລັດຖະກອນ ພາຍໃນພະແນກໄດ້ຮັບຮູ້ ແລະ ເຂົ້າໃຈ ເປັນຕົ້ນມະຕິ XI, ມະຕິ VI ຂອງອົງຄະນະພັກແຂວງວຽງຈັນ ແລະ ມະຕິກອງປະຊຸມໃຫຍ່ ຄັ້ງທີ II ຂອງຄະນະພັກຮາກຖານພະແນກ ມາຫັນເປັນແຜນການລະອຽດຂອງໜ່ວຍພັກທີ່ຂຶ້ນກັບ ພ້ອມນຳພາຈັດຕັ້ງປະຕິບັດໃນແຕ່ລະໄລຍະ. ສະມາຊິກພັກແຕ່ລະສະຫາຍມີຄວາມເປັນເອກະພາບສູງທີ່ໄດ້ຮັບຮອງແຜນກໍ່ສ້າງໜ່ວຍພັກປອດໃສ,ເຂັ້ມແຂງ, ໜັກແໜ້ນ ແລະ ພ້ອມກັນຈັດຕັ້ງປະຕິບັດແຜນການກໍ່ສ້າງໜ່ວຍພັກຕາມ 5 ເນື້ອໃນ ແລະ ມີຜົນສຳເລັດເປັນຢ່າງດີ, ຄະນະໜ່ວຍພັກ, ສະມາຊິກພັກໄດ້ຢຶດໝັ້ນ 5 ຫຼັກການ 3 ທິດນຳ ໃນການກໍ່ສ້າງ ແລະ ປັບປຸງພາຍໃນພັກ; ຢຶດໝັ້ນຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ມີການແບ່ງງານໃຫ້ບຸກຄົນຮັບຜິດຊອບ, ສຽງສ່ວນໜ້ອຍຂຶ້ນກັບສຽງສ່ວນຫຼາຍ. ແຕ່ລະໜ່ວຍໄດ້ເອົາໃຈໃສ່ຊີ້ນຳ-ນຳພາຈັດຕັ້ງປະຕິບັດໜ້າທີ່ການເມືອງຂອງຕົນຮັບຜິດຊອບສຳເລັດຕາມຄາດໝາຍທີ່ວາງໄວ້. ຜ່ານການສັງລວມຕີລາຄາ ແລະ ຈັດແບ່ງປະເພດສະມາຊິກພັກ, ໜ່ວຍພັກ ໃນການປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄື: ໜ່ວຍພັກເຕັກໂນໂລຊີ ແລະ ການສື່ສານ ແຂວງວຽງຈັນ ມີຈຳນວນສະມາຊິກພັກທັງໝົດ ທັງໝົດ 20 ສະຫາຍ ຍິງ 9 ສະຫາຍ, ຜູ້ມີສິດເຂົ້າຮ່ວມປະເມີນ 19 ສະຫາຍ ຍິງ 9 ສະຫາຍ ຜົນການປະເມີນປະເພດສະມາຊິກພັກແຂງ ມີ 17 ສະຫາຍ ຍິງ 7 ສະຫາຍ ກວມ 89,4%, ປະເພດສະມາຊິກພັກກາງມີ 2 ສະຫາຍ ຍິງ 2 ສະຫາຍ, ກວມ 15,7%, ບໍ່ໄດ້ຈັດປະເພດ 1 ສະຫາຍ (ເປັນສະມາຊິກພັກສໍາຮອງ) ຈັດປະເພດໜ່ວຍພັກປອດໃສ, ເຂັ້ມແຂງ, ໜັກແໜ້ນ. ໜ່ວຍພັກລາວໂທລະຄົມມະນາຄົມມະຫາຊົນ ມີຈໍານວນສະມາຊິກພັກເຂົ້າຮ່ວມປະເມີນທັງໝົດ 23 ສະຫາຍ ຍິງ 9 ສະຫາຍ ຊຶ່ງຜົນການປະເມີນ ປະເພດສະມາຊິກພັກແຂງມີ 20 ສະຫາຍ ຍິງ 9 ສະຫາຍ ກວມ 86,9%, ປະເພດສະມາຊິກພັກກາງມີ 3 ສະຫາຍ ຍິງ 0 ສະຫາຍ ກວມ 13% ຈັດປະເພດໜ່ວຍພັກປອດໃສ, ເຂັ້ມແຂງ, ໜັກແໜ້ນ.
ໃຫ້ກຽດຂຶ້ນມອບໃບຢັ້ງຢືນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ຄັ້ງນີ້ໂດຍ ສະຫາຍ ເທບພະໄທ ແກ້ວເຂັມເພັດ ຄະນະປະຈຳພັກແຂວງ ປະທານອົງການແນວລາວສ້າງຊາດແຂວງວຽງຈັນ ແລະ ຮັບໂດຍເລຂາໜ່ວຍພັກທັງ 2 ໜ່ວຍ.
ຂ່າວ: ແຂວງວຽງຈັນ
.
ຄໍາເຫັນ