ພາຍໃຕ້ການເປັນປະທານຂອງ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ທັງເປັນປະທານ ຄອລ, ມີຄະນະບໍລິຫານງານ ຄອລ ພ້ອມດ້ວຍປະທານສະຫະພັນກິລາແຫ່ງຊາດ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນກອງປະຊຸມ ກໍໄດ້ມີການລາຍງານຜົນງານການເຄື່ອນໄຫວ ປະຈຳປີ 2024 ແລະ ວາງທິດທາງແຜນການ ປີ 2025 ໂດຍສະເພາະວຽກງານການເງິນຂອງ ຄອລ ປະຈໍາປີ 2024, ການຈັດຕັ້ງປະຕິບັດກອງທຶນສົ່ງເສີມກິລາສູ່ໂອແລັມປິກ, ວຽກງານກໍາມະການເຕັກນິກ, ວຽກງານກໍາມະການນັກກິລາ ລວມທັງການລາຍງານໂດຍຫຍໍ້ຂອງ 4 ສະຫະພັນກິລາທີ່ມີການເຄື່ອນໄຫວພົ້ນເດັ່ນໃນປີ 2024 ຂອງສະຫະພັນບານເຕະແຫ່ງຊາດ, ສະຫະພັນປິ່ງປ່ອງແຫ່ງຊາດ, ສະຫະພັນເພາະກາຍແຫ່ງຊາດ, ສະຫະພັນເປຕັງແຫ່ງຊາດ ແລະ ສະຫະພັນໝາກແລ້ແຫ່ງຊາດ.
ໃນປີ 2024 ຜ່ານມາ ເຖິງວ່າຈະພົບຄວາມຫຍຸ້ງຍາກດ້ານເສດຖະກິດ-ການເງິນ ຄະນະກຳມະການໂອແລັມປິກແຫ່ງຊາດລາວ ກໍໄດ້ເອົາໃຈໃສ່ຢ່າງຕັ້ງໜ້າ ຈັດຕັ້ງປະຕິບັດວຽກງານຂອງຕົນດ້ວຍຄວາມຮັບຜິດຊອບສູງ ທັງວຽກງານບໍລິຫານ, ການເງິນ, ການຮ່ວມມືສາກົນ ແລະ ວຽກງານພັດທະນາບຸກຄະລາກອນ, ພົ້ນເດັ່ນຄືການສົ່ງນັກກິລາເຂົ້າຮ່ວມງານມະຫະກຳກິລາໂອແລັມປິກສາກົນ 2024 ທີ່ນະຄອນຫຼວງປາຣີ ປະເທດຝຣັ່ງ, ນັກກິລາເພາະກາຍລາວ ສ້າງປະຫວັດສາດໄດ້ຫຼຽນຄຳ ລາຍການຊີງແຊັມໂລກຄັ້ງທຳອິດ ທີ່ປະເທດເມົາດິບ, ສະຫະພັນບານເຕະແຫ່ງຊາດລາວ ໄດ້ຮັບລາງວັນສະຫະພັນບານເຕະດີເດັ່ນແຫ່ງປີຂອງສະຫະພັນບານເຕະອາຊີ ຫຼື AFC Member Association of the Year ປະເພດ Ruby, ກິລາ
ໝາກແລ້ຖືກບັນຈຸເຂົ້າຊີງຫຼຽນໃນງານກິລານັກຮຽນທົ່ວປະເທດຄັ້ງທຳອິດ ທີ່ແຂວງສາລະວັນ, ສະຫະພັນປິ່ງປ່ອງແຫ່ງຊາດ ສຳເລັດການເປັນເຈົ້າພາບປິ່ງປ່ອງເຍົາວະຊົນ-ຊາວໜຸ່ມ ລະດັບໂລກຄັ້ງທຳອິດ ລາຍການ WTT Youth Contender, ສ່ວນສະຫະພັນເປຕັງແຫ່ງຊາດ ກໍນຳພາຄະນະນັກກິລາຄວ້າ 3 ຫຼຽນຄຳ 2 ຫຼຽນເງິນ 4 ຫຼຽນທອງ ໃນງານກິລາມະຫາວິທະຍາໄລອາຊຽນ ທີ່ອິນໂດເນເຊຍ.
ສຳລັບທິດທາງການເຄື່ອນໄຫວໃນປີ 2025 ຈະສືບຕໍ່ເປັນເສນາທິການ ປະສານງານທຸກຂົງເຂດວຽກງານທີ່ກ່ຽວຂ້ອງ ເພື່ອປັບປຸງ, ຍົກລະດັບ ແລະ ພັດທະນາ ກິລາລາວໃຫ້ເຕີບໃຫຍ່ຂະຫຍາຍຕົວ ແລະ ພົ້ນເດັ່ນກວ່າເກົ່າ ໃນເວທີພາກພື້ນ ແລະ ສາກົນ ໂດຍສະເພາະ ກຽມຄວາມພ້ອມເຂົ້າຮ່ວມແຂງຂັນ ໃນຊີເກມ ຄັ້ງທີ 33 ທີ່ປະເທດໄທ ແລະ ກຽມຮ່ວມຈັດງານກິລາແຫ່ງຊາດ ຄັ້ງທີ 12 ທີ່ນະຄອນຫຼວງວຽງຈັນ.
(ຂ່າວ-ພາບ:ຕຸໄລເພັດ)
ຄໍາເຫັນ