ໂຄງການສ້າງຄວາມອາດສາມາດໄລຍະ 2 ມີຄວາມສຳຄັນຕໍ່ລະບົບສະຖິິຕິແຫ່ງຊາດ

ໂດຍ: ສຳນານ ພົມພັກດີ

ໂຄງການສ້າງຄວາມອາດສາມາດຂອງລະບົບສະຖິຕິແຫ່ງຊາດໄລຍະ 2 (2023-2028), ເປັນໂຄງ ການທີ່ມີຄວາມໝາຍຄວາມສຳຄັນຕໍ່ລະບົບສະຖິິຕິແຫ່ງຊາດ ເພື່ອເປັນການປະກອບສ່ວນສະໜອງຂໍ້ມູນສະຖິຕິເຂົ້າໃນການການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຂອງ ສປປ ລາວ ໂດຍສະ ເພາະແມ່ນການສ້າງແຜນການ, ການສ້າງຄວາມເຂັ້ມແຂງໃນລະບົບການຕິດຕາມ, ປະເມີນ ແລະ ການຕີລາຄາຜົນຂອງການຈັດຕັ້ງປະຕິບັດນະໂຍບາຍ, ແຜນການ, ແຜນງານ ຂອງລັດຖະບານ.   
ທ່ານ ນາງ ພອນສະຫຼີ ສຸກສະຫວັດ ຫົວໜ້າສູນສະຖິິິຕິແຫ່ງຊາດ ກະຊວງແຜນການ ແລະ ການລົງທຶນໃຫ້ຮູ້ວ່າ: ໂຄງການດັ່ງກ່າວແມ່ນມີຄວາມໝາຍສຳຄັນຫຼາຍ ຕໍ່ການພັດທະນາລະບົບສະຖິຕິແຫ່ງຊາດ ໃຫ້ມີຄວາມເຂັ້ມແຂງຢ່າງຮອບດ້ານຊຶ່ງໃນໄລຍະຜ່ານມາ, ພັກ ແລະ ລັດຖະບານພວກເຮົາ ກໍໄດ້ມີຄວາມພະຍາຍາມສຸມໃສ່ວຽກງານສະຖິຕິ ຊຶ່ງສະແດງອອກຄື ໄດ້ສ້າງກົດໝາຍວ່າດ້ວຍສະຖິຕິ ແລະ ແຜນພັດທະນາລະບົບສະຖິຕິແຫ່ງຊາດ, ໂດຍມີກົງຈັກສະຖິຕິສາຍຕັ້ງ ແລະ ສາຍຂວາງ. ພ້ອມນີ້ກໍມີຜູ້ຮັບຜິດຊອບວຽກງານສະຖິຕິຈໍານວນໜຶ່ງ. ຜ່ານມາວຽກງານສະຖິຕິກໍໄດ້ຖືກສະໜັບສະໜູນຊ່ວຍເຫຼືອຈາກຫຼາຍພາກສ່ວນຄູ່ຮ່ວມພັດທະນາ ແລະ ອົງການຈັດຕັ້ງສາກົນໃນການສ້າງຄວາມອາດສາມາດ ແລະ ງົບປະມານ ເຮັດໃຫ້ສາມາດປະກອບສ່ວນເຂົ້າໃນການລາຍງານຂໍ້ມູນຕິດຕາມປະເມີນຜົນການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ ຂອງລັດຖະບານໃນແຕ່ລະໄລຍະ. ດັ່ງທີ່ພວກເຮົາໄດ້ຮັບຊາບອົງການທະນາຄານໂລກໄດ້ໃຫ້ການຊ່ວຍເຫຼືອ ສ້າງຄວາມອາສາມາດລະບົບສະຖິຕິແຫ່ງຊາດ ໄລຍະທີ 1 (2015-2017) ຊຶ່ງເປັນໂຄງການໜຶ່ງທີ່ສະໜັບສະໜູນ ຢ່າງແຂງແຮງໃນການສ້າງຄວາມອາດສາມາດໃຫ້ລະບົບສະຖິຕິແຫ່ງຊາດ ໃນໄລຍະຜ່ານມາຍາດມາໄດ້ຫຼາຍຜົນສຳເລັດເປັນຕົ້ນແມ່ນ ການສ້າງຄວາມເຂັ້ມແຂງໃຫ້ແກ່ການພັດທະນາ ແລະ ການຄຸ້ມຄອງຂໍ້ມູນສະຖິິຕິເສດຖະກິດມະຫາພາກ; ການປັບປຸງການຜະລິດຂໍ້ມູນສະຖິຕິ, ການແລກປ່ຽນຂໍ້ມູນ ແລະ ການເຂົ້າເຖິງຂໍ້ມູນສະຖິຕິທາງການ ທາງດ້ານເສດຖະກິດ ຊຶ່ງເນັ້ນໃສ່ການສ້າງ ແລະ ພັດທະນາ ເວັບໄຊ, ການສຳນວນຂໍ້ມູນ, ປະຫວັດຂອງຕົວຊີ້ບອກ ແລະ ການຄຸ້ມຄອງຖານຂໍ້ມູນດິບ.
ທ່ານກ່າວຕື່ມວ່າ: ເຖິງຢ່າງໃດກໍຕາມ ການພັດທະນາລະບົບສະຖິຕິແຫ່ງຊາດ ແມ່ນເປັນຂະບວນການ ທີ່ມີການປ່ຽນແປງໄປຕາມການຫັນປ່ຽນຂອງແຕ່ລະຍຸກສະໄໝ ແຕ່ລະໄລຍະ ແລະ ຈະຕ້ອງໄດ້ສຸມທຶນຮອນ ແລະ ກຳລັງແຮງ ເພື່ອຈະສາມາດຕອບສະໜອງຄວາມຕ້ອງການໃຫ້ທັນການ, ທັນສະໄໝ ແລະ ວ່ອງໄວ. ດ້ວຍເຫດນັ້ນ ການສ້າງສະຖິຕິຂອງ ລາວເຮົາ ໃນປັດຈຸບັນ ຍັງເຫັນວ່າມີສິ່ງຫຍຸ້ງຍາກ ແລະ ທ້າທາຍຫຼາຍປະການ ເມື່ອທຽບກັບຄວາມຕ້ອງການຂໍ້ມູນສະຖິຕິ, ໂດຍສະເພາະໃນສະພາບການແຂ່ງຂັນທາງເອເລັກໂຕຣນິກ ທີ່ພວມນໍາໂລກໄປສູ່ຍຸກເປີດກວ້າງກັບສາກົນ ຂໍ້ມູນຂ່າວສານ ຈຶ່ງຍິ່ງມີຄວາມສໍາຄັນ. ຈາກສິ່ງທ້າທ້າຍດັ່ງກ່າວ ລັດຖະບານ ກໍໄດ້ຕັດສິນໃຈຢ່າງສູງໃນການສືບຕໍ່ໂຄງການສ້າງຄວາມອາດສາມາດລະບົບສະຖິ ຕິແຫ່ງຊາດໄລຍະ 2 ນີ້ ຂຶ້ນ ໃນຮູບແບບເງິນກູ້ຈາກທະນາຄານໂລກ, ຈຸດປະສົງລະດັບຄາດໝາຍ ຂອງ ໂຄງການໄລຍະ 2023-2028 ນີ້ ເປັນການຈັດຕັ້ງຜັນຂະຫຍາຍຍຸດທະສາດພັດທະນາລະບົບສະຖິຕິແຫ່ງຊາດ 2016-2025 ແລະ ວິໄສທັດ ຮອດປີ 2030 ແນໃສ່ການສະໜອງຂໍ້ມູນສະຖິຕິທາງການເຂົ້າໃນການຕິດຕາມ ແລະ ປະເມີນຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX  ແລະ ຄັ້ງທີ X, ເປົ້າໝາຍການຫຼຸດພົ້ນຈາກສະຖານະພາບປະເທດດ້ອຍພັດທະນາ (LDCs) ແລະ ການພັດທະນາແບບຍືນຍົງ (SDGs) ຮອດປີ 2030. ພ້ອມດຽວກັນນັ້ນ ກໍເປັນການຍົກລະດັບຄວາມເຂັ້ມແຂງໃນການຜະລິດສະຖິຕິ, ການປຸງແຕ່ງວິເຄາະ ແລະ ການເຜີຍແຜ່ຂໍ້ມູນສະຖິຕິໃຫ້ມີຄຸນນະພາບ ແລະ ທັນເວລາ ແລະ ເປັນການສ້າງຄວາມອາດສາມາດໃຫ້ແກ່ຜູ້ວາງນະໂຍບາຍ ແລະ ຜູ້ນຳໃຊ້ຂໍ້ມູນສະຖິຕິທາງການຄື: ປັບປຸງການຜະລິດ ແລະ ປັບປຸງຄຸນນະພາບສະຖິຕິເສດຖະກິດ ແລະ ສັງຄົມ, ການສ້າງຄວາມເຂັ້ມແຂງການນຳໃຊ້ ແລະ ເຊື່ອມສານຂໍ້ມູນສະຖິຕິ ແລະ ການສ້າງຄວາມອາດສາມາດ ແລະ ການຄຸ້ມຄອງບໍລິຫານໂຄງການ. ໂດຍແນໃສ່ການສ້າງຄວາມສາມາດຂອງ ການຈັດຕັ້ງສະຖິຕິຈັດຕັ້ງປະຕິບັດກົດໝາຍວ່າດ້ວຍສະຖິຕິ ແລະ ນິຕິກຳສະຖິຕິທີ່ກ່ຽວຂ້ອງ ພ້ອມທັງສ້າງຄວາມອາດສາມາດໃຫ້ບຸກຄະລາກອນສະຖິຕິ ໃນຂອບເຂດທົ່ວປະ ເທດ, ຍົກລະດັບຄວາມຮູ້ ຂອງ ບຸກຄະລາກອນສະຖິຕິ ໃນຂັ້ນສູນກາງ, ຂະແໜງການ ແລະ ທ້ອງຖິ່ນ ໃຫ້ ມີຄວາມພ້ອມເພື່ອຫັນເປັນມືອາຊີບ. ພ້ອມນັ້ນ ກໍເປັນການຍົງສູງການຮ່ວມມືດ້ານສະຖິຕິກັບບັນດາສະຖາບັນ ແລະ ອົງການສະຖິຕິພາກພື້ນ ແລະ ສາກົນ.